ឧត្តមសេនីយ៍ឯក ងួន ស្រេង៖ រដ្ឋបាលខេត្តកណ្តាល ពិតជាបានចូលរួមយ៉ាងសកម្ម ក្នុងការអនុវត្តស្របតាមគោលនយោបាយកែទម្រង់នានា របស់រាជរដ្ឋាភិបាល

ភ្នំពេញ៖ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ បានអញ្ជើញជាអធិបតីក្នុងកិច្ចប្រជុំបិទសវនកម្មផ្ទៃក្នុង នៅរដ្ឋបាលខេត្តកណ្តាល សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ នៅថ្ងៃទី២ ខែធ្នូ ឆ្នាំ២០២៤ ដោយមានការអញ្ជើញចូលរួមពី ឯកឧត្តម ឌឹម បូរ៉ា អភិបាលរងខេត្ត តំណាង ឯកឧត្តម គួច ចំរើន អភិបាល នៃគណៈអភិបាលខេត្តកណ្តាល ឯកឧត្តម លោក លោកស្រី គណៈប្រតិភូសវនកម្មផ្ទៃក្នុង លោក លោកស្រី ថ្នាក់ដឹកនាំខេត្ត លោកនាយក នាយករងរដ្ឋបាលខេត្ត នាយកទីចាត់ការ នាយករងទីចាត់ការ មន្ត្រីរាជការ និងអង្គភាពក្រោមចំណុះរដ្ឋបាលខេត្ត ជាច្រើនរូបទៀត។

ក្នុងឱកាសនេះ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង បានធ្វើការវាយតម្លៃខ្ពស់ និងកោតសរសើរចំពោះកិច្ចខិតខំប្រឹងប្រែង និងការដឹកនាំអភិវឌ្ឍន៍របស់រដ្ឋបាលខេត្តកណ្តាល ស្របតាមកម្មវិធីនយោបាយនានារបស់រាជរដ្ឋាភិបាលចូលរួមចំណែកនៅក្នុងការលើកកម្ពស់ ការអនុវត្តយុទ្ធសាស្រ្តបញ្ចកោណ ដំណាក់កាលទី១ ឱ្យទទួលបានជោគជ័យ ព្រមទាំងអភិវឌ្ឍន៍សមត្ថភាពស្ថាប័នក្នុងដំណើរការធ្វើបរិវត្តកម្មឌីជីថល ស្របតាមគោលនយោបាយរដ្ឋាភិបាលឌីជីថលកម្ពុជា។

ទន្ទឹមនឹងនេះ ឯកឧត្តម ឧត្តមសេនីយ៍ឯក អគ្គនាយក ក៏បានគូសបញ្ជាក់ផងដែរថា រដ្ឋបាលខេត្តកណ្តាល ពិតជាបានចូលរួមយ៉ាងសកម្មក្នុងការអនុវត្តស្របតាមគោលនយោបាយកែទម្រង់នានារបស់រាជរដ្ឋាភិបាល ជាពិសេស កម្មវិធីកែទម្រង់វិមជ្ឈការ និងវិសហមជ្ឈការ កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ និងគោលនយោបាយ “ភូមិ-ឃុំ សង្កាត់មានសុវត្ថិភាព” ក្រោមការដឹកនាំដោយផ្ទាល់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

ឯកឧត្តម បានបញ្ជាក់បន្ថែមទៀតថា ដើម្បីធានាសម្រេចឱ្យបាននូវសមទិ្ធផលការងារបន្ថែមសម្រាប់ខេត្តកណ្តាល ឯកឧត្តម បានផ្តល់ជូនអនុសាសន៍សំខាន់ៗលើការពង្រឹងការគ្រប់គ្រងចំណូល-ចំណាយ ការអនុវត្តវិធាន និងបទប្បញ្ញត្តិលទ្ធកម្មសាធារណៈ ការគ្រប់គ្រងទ្រព្យសម្បត្តិរដ្ឋ និងការគ្រប់គ្រងបុគ្គលិក ធ្វើជាត្រីវិស័យតម្រង់ទិសការអនុវត្តការងារ និងការផ្តល់សេវារដ្ឋបាលឱ្យកាន់តែល្អប្រសើរ។

ឯកឧត្តម ឧត្តមសេនីយ៍ឯក អគ្គនាយក បានប្រសិទ្ធពរជ័យជូនចំពោះ ឯកឧត្តម លោកជំទាវ លោក លោកស្រី និងអង្គពិធីទាំងមូល សូមទទួលបាននូវពុទ្ធពរទាំង ៤ ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ពិសេសសម្រេចបានគ្រប់ភារកិច្ច ដែលរាជរដ្ឋាភិបាលកម្ពុជា និងក្រសួងមហាផ្ទៃ ប្រគល់ជូន និងបានប្រកាសបិទកម្មវិធីចុះធ្វើការងារសវនកម្មផ្ទៃក្នុង នៅរដ្ឋបាលខេត្តកណ្តាល រដ្ឋបាលក្រុង ស្រុក និងរដ្ឋបាលឃុំ សង្កាត់ក្រោមចំណុះ សម្រាប់ការិយបរិច្ឆេទ២០២៣ និងបណ្តាឆ្នាំពាក់ព័ន្ធ៕