ឥណ្ឌូណេស៊ី និងកាណាដា ចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចទូលំទូលាយ ដែលមានគោលបំណងពង្រឹងទំនាក់ទំនងសេដ្ឋកិច្ចរវាងសមាជិក G20 ទាំង២

ហ្សាការតា៖ ឥណ្ឌូណេស៊ី និងកាណាដា នៅថ្ងៃចន្ទទី២ ខែធ្នី បានចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចទូលំទូលាយ (CEPA) ដែលមានគោលបំណងពង្រឹងទំនាក់ទំនងសេដ្ឋកិច្ចរវាងសមាជិកនៃក្រុមប្រទេសមានសេដ្ឋកិច្ចរីកចម្រើនទាំង២០(G20) ទាំង២ ។ ការណ៍នេះកើតឡើង៣ ឆ្នាំបន្ទាប់ពីការចរចាបានចាប់ផ្តើម។

កិច្ចព្រមព្រៀងនេះនឹងចូលជាធរមាននៅឆ្នាំ២០២៦ ហើយត្រូវបានចុះហត្ថលេខានៅទីក្រុងហ្សាការតាដោយរដ្ឋមន្ត្រីពាណិជ្ជកម្មនៃប្រទេសទាំងពីរ។ រដ្ឋមន្ត្រីពាណិជ្ជកម្មឥណ្ឌូណេស៊ី លោក ប៊ូឌី សាន់តូសូ (Budi Santoso) បាននិយាយថា ឥណ្ឌូណេស៊ីបានកោតសរសើរចំពោះការគាំទ្ររបស់កាណាដាសម្រាប់ផែនការរបស់ខ្លួនក្នុងការផ្ដល់អាទិភាពដល់វិស័យរ៉ែដ៏សំខាន់ ដែលមានសារសំខាន់សម្រាប់កំណើនប្រកបដោយនិរន្តរភាព។

លោកបានប្រាប់សន្និសីទសារព័ត៌មានរួមថា៖ «រួមគ្នា យើងជំរុញការគ្រប់គ្រងរ៉ែដ៏សំខាន់ប្រកបដោយនិរន្តរភាព គាំទ្រដល់គោលដៅឈប់បំភាយកាបូនឌីអុកស៊ីតរបស់ឥណ្ឌូណេស៊ីនៅឆ្នាំ២០៦០ និងជំរុញការវិនិយោគរបស់កាណាដា ខណៈពេលដែលជំរុញកំណើនបៃតងនៅក្នុងប្រទេសទាំង២»។

ឥណ្ឌូណេស៊ីមានធនធាននៃរ៉ែដ៏សម្បូរបែបនៃសំណប៉ាហាំង ទង់ដែង និងបាស៊ីត ក្នុងចំណោមលោហៈដទៃទៀត ហើយជាប្រភពរ៉ែនីកែលដ៏ធំបំផុតរបស់ពិភពលោក។ បងធំតំបន់អាស៊ាននេះកំពុងស្វែងរកការទាញយកអត្ថប្រយោជន៍បន្ថែមពីរ៉ែ ដោយទាក់ទាញការវិនិយោគទៅក្នុងដំណើរការផលិត និងក្នុងការផលិតអាគុយរថយន្តអគ្គិសនី។

សហរដ្ឋអាម៉េរិកកាលពីខែកក្កដា បានបញ្ជាក់ថា ខ្លួនបានទាក់ទងជាមួយប្រទេសឥណ្ឌូណេស៊ីអំពីការចូលរួមក្នុងភាពជាដៃគូសន្តិសុខរ៉ែពហុជាតិដែលមានគោលបំណងពន្លឿនការអភិវឌ្ឍខ្សែច្រវាក់ផ្គត់ផ្គង់រ៉ែសំខាន់ៗប្រកបដោយនិរន្តរភាព។ ឥណ្ឌូណេស៊ី ក៏បាន ធ្វើ កិច្ចព្រមព្រៀង ជាមួយ អង់គ្លេស កាលពី ខែកញ្ញា ដើម្បី សហការ លើ រ៉ែ សំខាន់ៗ ។

ពាណិជ្ជកម្មទ្វេភាគីរវាងឥណ្ឌូណេស៊ី និងកាណាដា មានចំនួន ៣,៤ពាន់លានដុល្លារកាលពីឆ្នាំមុន។ នេះបើយោងតាមក្រសួងពាណិជ្ជកម្មរបស់ប្រទេសឥណ្ឌូណេស៊ី។

កាណាដាបានប៉ាន់ប្រមាណពាណិជ្ជកម្មទ្វេភាគីចំនួន ៥,១ពាន់លានដុល្លារក្នុងឆ្នាំ២០២៣។ ការនាំចេញចម្បងរបស់កាណាដាទៅកាន់ប្រទេសឥណ្ឌូណេស៊ីគឺផលិតផលកសិកម្ម និងជី ខណៈដែលឥណ្ឌូណេស៊ីបាននាំចេញជាចម្បងនូវគ្រឿងម៉ាស៊ីន ព្រមទាំងសម្លៀកបំពាក់ និងស្បែកជើង។

គួររំឭកថា នាយករដ្ឋមន្ត្រីកាណាដា លោក ចាស្ទីន ទ្រូដូ និងប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីយ៉ាតូ បានជួបប្រជុំគ្នាក្នុងកិច្ចប្រជុំកំពូលមេដឹកនាំនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសប៉េរូកាលពីខែមុន។ លោក ប្រាបូវ៉ូ បានអះអាងថាកំពុងស្វែងរកកិច្ចសហប្រតិបត្តិការបន្ថែមទៀតលើវិស័យជលផល ការផលិត និងថាមពលកកើតឡើងវិញ៕