មូលនិធិជាតិជំនួយសង្គម ជូនដំណឹង ពីការចុះឈ្មោះសិស្សានុសិស្ស ចូលក្នុងកម្មវិធីអាហារូបករណ៍សិស្សក្រីក្រ នៅបឋមសិក្សា និងមធ្យមសិក្សាចំណេះទូទៅ

ភ្នំពេញ៖ មូលនិធិជាតិជំនួយសង្គម ជូនដំណឹង ពីការចុះឈ្មោះសិស្សានុសិស្ស ចូលក្នុងកម្មវិធីអាហារូបករណ៍សិស្សក្រីក្រ នៅបឋមសិក្សា និងមធ្យមសិក្សាចំណេះទូទៅ នៃ “កម្មវិធីជាតិជំនួយសង្គមក្នុងកញ្ចប់គ្រួសារ” ។

យោងតាមអនុក្រឹត្យលេខ ៣៧២អនក្រ.បក ចុះថ្ងៃទី២៩ ខែធ្នូ ឆ្នាំ២០២៣ ស្តីពីការអនុវត្តកម្មវិធីជាតិជំនួយ សង្គមក្នុងកញ្ចប់គ្រួសារ រាជរដ្ឋាភិបាលកម្ពុជាបានដាក់អនុវត្តជាផ្លូវការនាខែមេសា ឆ្នាំ២០២៤ ក្នុងនោះសម្រាប់ការឧបត្ថម្ភ អាហារូបករណ៍សម្រាប់សិស្សក្រីក្រនៅបឋមសិក្សា និងមធ្យមសិក្សាចំណេះទូទៅ គ្រោងដំណើរការអនុវត្តនៅខែមករា ឆ្នាំ២០២៥ ខាងមុខនេះ។ ដូចនេះ ដើម្បីការអនុវត្តកម្មវិធីអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យម សិក្សាចំណេះទូទៅ នៃកម្មវិធីជាតិជំនួយសង្គម ដំណើរការទាន់ពេលវេលា និងប្រកបដោយប្រសិទ្ធភាព មូលនិធិជាតិ ជំនួយសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា មានកិត្តិយសសូមជម្រាបជូន ដល់សិស្សានុសិស្ស ដែលស្ថិតក្នុងគ្រួសារមានបណ្ណសមធម៌(ក្រីក្រ១ និងក្រីក្រ២) អញ្ជើញទៅធ្វើការចុះឈ្មោះចូលក្នុងកម្មវិធីជាតិជំនួយសង្គម ក្នុងកញ្ចប់គ្រួសារ ចាប់ពីថ្ងៃទី១ ខែធ្នូ ឆ្នាំ២០២៤ តទៅ តាមនីតិវិធីដូចខាងក្រោម៖

១. សិស្សានុសិស្សត្រូវទៅជួបមន្ត្រីកម្មវិធីនៅតាមសាលារៀនដែលខ្លួនកំពុងសិក្សា ដោយភ្ជាប់ទៅជាមួយបណ្ណ សមធម៌ច្បាប់ដើមមានសុពលភាព និងលិខិតចុះឈ្មោះចូលរៀន ដើម្បីធ្វើការបញ្ជាក់ការចុះឈ្មោះចូលរៀន ក្នុងប្រព័ន្ធអែប (App)របស់កម្មវិធីជាតិជំនួយសង្គមក្នុងកញ្ចប់គ្រួសារ

២. បន្ទាប់មកត្រូវទៅជួបមន្ត្រីកម្មវិធីនៅសាលាឃុំ សង្កាត់ ដោយភ្ជាប់ទៅជាមួយនូវបណ្ណសមធម៌ច្បាប់ដើម មានសុពលភាព និងលិខិតចុះឈ្មោះចូលរៀន ដើម្បីចុះឈ្មោះចូលក្នុងកម្មវិធី។

ចំពោះការបើកផ្តល់ប្រាក់ឧបត្ថម្ភអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យមសិក្សាចំណេះ ទូទៅ នៃកម្មវិធីជាតិជំនួយសង្គម លើកដំបូង គឺធ្វើឡើងនៅថ្ងៃទី៣០ ខែមករា ឆ្នាំ២០២៥។

អាស្រ័យដូចបានជម្រាបជូនខាងលើ សូមសាធារណជន និងស្ថាប័នពាក់ព័ន្ធ ចូលរួមផ្សព្វផ្សាយឱ្យបានទូលំទូលាយ និងអាណាព្យាបាល ឬសិស្សានុសិស្ស ដែលស្ថិតក្នុងគ្រួសារមានបណ្ណសមធម៌ អញ្ជើញទៅចុះឈ្មោះ ឬនាំកូនៗទៅចុះ ឈ្មោះទទួលបានប្រាក់ឧបត្ថម្ភឱ្យបានគ្រប់ៗគ្នា ៕