ព្រៃផ្សៃបំផុត! គ្លីនិកឯកជនមួយនៅស្រុកបាទី ចាក់ថ្នាំធ្វើឱ្យស្ត្រីម្នាក់ស្លាប់ រួចយកសព និងក្មេងស្រីទៅប្លុងចោល

ភ្នំពេញ៖ ជារឿងព្រៃផ្សៃបំផុត ដែលមន្ទីរសម្រាកព្យាបាល និងសម្ភព សុង ហាក់ ម៉ារីណា ស្ថិតនៅឃុំត្រពាំងក្រសាំង ស្រុកបាទី ខេត្តតាកែវ បានចាក់ថ្នាំធ្វើឱ្យស្ត្រីម្នាក់បាត់បង់ជីវិត រួចដឹកយកសព និងក្មេងស្រី អាយុ៣ខួប ទៅប្លុងចោល នៅចំណុចភូមិម្រះព្រៅកើត ឃុំចំបក់ ស្រុកបាទី បង្កការភ្ញាក់ផ្អើលនៅព្រឹកថ្ងៃទី១៩ ខែវិច្ឆិកា ឆ្នាំ២០២៤នេះ។

លោក ឆាយ កែវមុន្នី អធិការនៃអធិការដ្ឋាននគរបាលស្រុកបាទី បញ្ជាក់ថា ម្ចាស់គ្លីនិក ត្រូវសមត្ថកិច្ចឃាត់ខ្លួនបានហើយ ជំនាញកំពុងបើកការសាកសួរ និងស៊ើបអង្កេតលើអង្គហេតុនៃរឿងឃាតកម្មនេះ ដូច្នេះ លោកសុំមិនទាន់អាចបំភ្លឺព័ត៌មានអ្វីបានទេ រង់ចាំការបញ្ចប់នីតិវិធីរបស់មន្ត្រីជំនាញធ្វើកោសល្យវិច័យ និងបញ្ចប់ការសាកសួរទៅលើជនជាប់ចោទសិន ទើបលោកអាចជម្រាបជូនព័ត៌មានលម្អិតនៅពេលក្រោយបាន។ យ៉ាងណា គ្លីនិកដែលបង្កកំហុសរហូតធ្វើឱ្យមានការបាត់បង់ជីវិតមនុស្សនេះ ត្រូវបានគេស្គាល់ថា ជា មន្ទីរសម្រាកព្យាបាល និងសម្ភព សុង ហាក់ ម៉ារីណា សិ្តតនៅឃុំត្រពាំងក្រសាំង ស្រុកបាទី ខេត្តតាកែវ។

ដោយឡែក បើយោងតាមគណនីហ្វេសប៊ុកមួយមានឈ្មោះថា Phan Raksa ដែលអះអាងថា ជាសាច់ញាតិរបស់ស្ត្រីរងគ្រោះ និងក្មេងស្រីដែលត្រូវគេយកទៅប្លុងចោលក្នុងព្រៃកាលពីម្សិលមិញ បានបង្ហោះសំណេរស្វែងសមាជិកគ្រួសារ ដែលមានខ្លឹមសារយ៉ាងដូច្នេះថា៖«សូមពឹងបងប្អូនទាំងអស់គ្នា ប្រសិនបើបានឃើញ ឬជួបគ្នា សូមជួយផ្តល់ដំណឹងផង គាត់ទៅចាក់ថ្នាំនៅពេទ្យខាងត្បូងវត្តពញ្ញាគុក តាំងពីម៉ោង៦ល្ងាចមកទល់ម៉ោងជិត១១យប់នេះ មិនទាន់ឃើញមកផ្ទះវិញទេ គាត់ជិះម៉ូតូ២នាក់កូនតូចស្រីម្នាក់ទៀត បើបងអូនបានឃើញម្តាយខ្ញុំជួយទាក់ទងមកលេខ 011 354 275, 069 222 233»។ លុះព្រឹកឡើង ម្ចាស់គណនីខាងលើបានទទួលដំណឹងថា ស្ត្រីបាត់ខ្លួននោះបានបាត់បង់ជីវិតបាត់ទៅហើយ។

សូមបញ្ជាក់ថា បើតាមការឱ្យដឹងពីមន្ត្រីសមត្ថកិច្ច ជនរងគ្រោះបាត់បង់អាយុជីវិតមានឈ្មោះ ណាំ ចន្ធូ អាយុ៤១ឆ្នាំ ធ្វើដំណើរជាមួយក្មេងស្រីឈ្មោះ ណ សហ អាយុ៣ឆ្នាំ មានទីលំនៅភូមិទឹកថ្លា ឃុំត្រពាំងក្រសាំង ស្រុកបាទីខេត្តតាកែវ បានប្រាប់ក្រុមគ្រួសារថា ទៅរកពេទ្យដើម្បីឱ្យចាក់ថ្នាំព្យាបាលជំងឺរបស់ខ្លួន។ ចំណែក ភាគីម្ចាស់មន្ទីរសម្រាកព្យាបាល និងសម្ភព សុង ហាក់ ម៉ារីណា មានឈ្មោះទី១.ហៀង សុងហាក់ អាយុ៣៧ឆ្នាំ មានមុខរបរជាគ្រូពេទ្យ និងទី២.ឈ្មោះ ស៊ុន ម៉ារីណា អាយុ៣៩ឆ្នាំ មានមុខរបរពេទ្យបង្អែកស្រុកបាទី មានទីលំនៅភូមិបឹងពញាកគុក ឃុំត្រពាំងក្រសាំង ស្រុកបាទី ខេត្តតាកែវ៕