ឧត្តមអគ្គានុរក្ស.១ ឈន សាណាត អញ្ជើញជាអធិបតីក្នុងពិធីប្រគល់ភារកិច្ចជូន ប្រធានស្តីទីពន្ធនាគារខេត្តកោះកុង

ភ្នំពេញ៖ នៅព្រឹកថ្ងៃទី១៨ ខែវិច្ឆិកា ឆ្នាំ២០២៤ ឯកឧត្តម ឧត្តមអគ្គានុរក្ស.១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានអញ្ជើញជាអធិបតីក្នុងពិធីប្រគល់ភារកិច្ចជូនប្រធានស្តីទី ពន្ធនាគារខេត្តកោះកុង ដោយមានការអញ្ជើញចូលរួមពីឯកឧត្តម អគ្គនាយករង ប្រធាននាយកដ្ឋាន ប្រធានមណ្ឌលអប់រំកែប្រែ ពន្ធនាគាររាជធានីខេត្ត និងមន្រ្តីពាក់ព័ន្ធ ពិធីនេះរៀបចំធ្វើឡើងនៅសាលប្រជុំពន្ធនាគារខេត្តកោះកុង។

ឯកឧត្តម អគ្គនាយក បានមានប្រសាសន៍ផ្តាំផ្ញើរដល់មន្រ្តីក្រោមឱវាទទាំងអស់ ឱ្យបន្តយកចិត្តទុកដាក់ខ្ពស់ចំពោះការងារ និងបានដាក់ចេញជាគន្លឹះក្នុងការដឹកនាំដូចខាងក្រោម៖

១. ត្រូវធ្វើការពង្រឹង និងធ្វើការឆែកឆេរយ៉ាងម៉ឺងម៉ាត់រាល់យកវត្ថុហាមឃាត់ចូល ក្នុងពន្ធនាគារជាពិសេសត្រូវធ្វើការលុបបំបាត់នូវការនាំចូលទូរសព្ទ និងគ្រឿងញៀន។

២. បន្តលើកកម្ពស់ក្នុងការស្វែងយល់អំពីច្បាប់ និងលិខិតបទដ្ឋាននានា ជាពិសេសច្បាប់របស់អគ្គនាយកដ្ឋានពន្ធនាគារ។

៣. ត្រូវបន្តពង្រឹងសមត្ថភាពស្ថាប័ន និងអភិវឌ្ឍន៍ធនធានរបស់មន្រ្តីទាំងចំណេះជំនាញហើយ ធ្វើលើកទឹកចិត្តដល់មន្ត្រីឲ្យទៅរៀននៅវគ្គបណ្តុះបណ្តាលផ្សេងៗដើម្បីពង្រឹងសមត្ថភាព។

សូមបញ្ជាក់ផងដែរថា លោកឧត្តមអគ្គានុរក្សថ្នាក់លេខ៣ ទេស សាឡាត់ អត្តលេខ ០១៧២ ឋានៈ អនុប្រធានពន្ធនាគារខេត្តកោះកុង ត្រូវបានប្រគល់ភារកិច្ចជាប្រធានស្តីទី ពន្ធនាគារខេត្តកោះកុង នៃអគ្គនាយកដ្ឋានពន្ធនាគារ ក្រសួងមហាផ្ទៃ។

ឆ្លៀតក្នុងឱកាសនោះ ឯកឧត្តម អគ្គនាយក និងថ្នាក់ដឹកនាំអគ្គនាយកដ្ឋានពន្ធនាគារ បានចូលត្រួតពិនិត្យស្ថានភាពជនជាប់ឃុំ ហេដ្ឋានរចនាសម្ព័ន្ធ និងវឌ្ឍនភាពការងារក្នុងពន្ធនាគារខេត្តកោះកុងផងដែរ៕