តៃប៉ិ៖ កាលពីថ្ងៃចន្ទ ទី១១ ខែវិច្ឆិកា រដ្ឋបាលកោះតៃវ៉ាន់ បានអះអាងថាបច្ចុប្បន្ន មិនមានឡើយដំណាក់កាលថ្មីនៃកិច្ចចរចាជាមួយសហរដ្ឋអាមេរិកពាក់ព័ន្ធនឹងការលក់អាវុធ ខណៈតៃវ៉ាន់ កំពុងពិចារណាថាតើត្រូវឆ្លើយតបយ៉ាងណា ចំពោះការទាមទាររបស់ប្រធានាធិបតីជាប់ឆ្នោត លោក ដូណាល់ ត្រាំ ឱ្យទីក្រុងតៃប៉ិ បង់ថ្លៃការពារ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ការគូសបញ្ជាក់របស់រដ្ឋបាលកោះតៃវ៉ាន់ ធ្វើឡើងក្រោយមានសេចក្ដីរាយការណ៍ថាតៃប៉ិ មានផែនការទិញអាវុធយ៉ាងសម្បើមពីសហរដ្ឋអាមេរិក។
រដ្ឋបាលកោះតៃវ៉ាន់ បានបញ្ជាក់ក្នុងសេចក្ដីថ្លែងការណ៍មួយថា ប្រឈមមុខនឹងការកើនឡើងការគំរាមកំហែងពីយោធាចិន តៃវ៉ាន់ និងប្រទេសក្បែរខាងរបស់ខ្លួន បាននិងកំពុងបន្តពង្រឹងសមត្ថភាពការពារខ្លួនឯង ដែលនេះបង្ហាញពីការប្ដេជ្ញាចិត្តការពារខ្លួន ដោយពឹងលើ ខ្លួនឯង។
សេចក្ដីថ្លែងការណ៍នេះដដែល បានបន្ថែមថា ពិតណាស់វាជាពេលសម្រាប់កិច្ចពិភាក្សារវាងតៃវ៉ាន់ និងសហរដ្ឋអាមេរិកស្ដីពីតម្រូវការយោធា។ ប៉ុន្តែនៅខណៈពេលនេះ គ្មានដំណាក់កាលថ្មីនៃ កិច្ចចរចានោះទេ។
សូមបញ្ជាក់ថា លោក ដូណាល់ ត្រាំ ដែលបានជាប់ឆ្នោតជាប្រធានាធិបតីសម្រាប់អាណត្តិទី២ កាលពីសប្ដាហ៍មុន បានធ្វើឱ្យតៃវ៉ាន់ច្របូកច្របល់ចិត្ត បន្ទាប់ពីលោកបាននិយាយថាតៃវ៉ាន់ត្រូវបង់ថ្លៃការពារឱ្យ សហរដ្ឋអាមេរិក ហើយថែមទាំងបានចោទប្រកាន់ទៀតផងថាតៃវ៉ាន់បានលួចឧស្សហកម្មផលិតបន្ទះឈីបពីសហរដ្ឋអាមេរិក។ សហរដ្ឋអាមេរិកគឺជាអ្នកគាំទ្រដ៏សំខាន់បំផុតសម្រាប់តៃវ៉ាន់ ជាពិសេសលើ ការផ្គត់ផ្គង់អាវុធ បើទោះជាមិនមានទំនាក់ទំនងការទូតផ្លូវការនឹងគ្នាក៏ដោយ។
