មន្ទីរផែនការខេត្តស្ទឹងត្រែង និងទីចាត់ការផែនការនិងវិនិយោគខេត្ត រៀបចំកិច្ចប្រជុំស្តីពីកម្មវិធីវិនិយោគបីឆ្នាំរំកិល

ភ្នំពេញ៖ ដោយមានកិច្ចសហការរវាងមន្ទីរផែនការខេត្តស្ទឹងត្រែងនិងទីចាត់ការផែនការនិងវិនិយោគខេត្តនៃសាលាខេត្តស្ទឹងត្រែងនាព្រឹកថ្ងៃទី១១ ខែវិច្ឆិការ ឆ្នាំ២០២៤ បានរៀបចំកិច្ចប្រជុំស្តីពីកម្មវិធីវិនិយោគបីឆ្នាំរំកិល(២០២៥-២០២៧) និងផ្សព្វផ្សាយដំណើរការសិក្ខសាលាសមាហរណកម្មផែនការ ក្រុង ស្រុក និងឃុំសង្កាត់នៅថ្នាក់ក្រុងស្រុក ក្រោមអធិបតីភាពលោក ធូ ចាន់ពៅ អភិបាលរងខេត្តស្ទឹងត្រែង។

ថ្លែងក្នុងកិច្ចប្រជុំដែលធ្វើឡើងសាលាខេត្តស្ទឹងត្រែងនាឱកាសនេះ លោម ធូ ចាន់ពៅ អភិបាលរងខេត្តបានមានប្រសាសន៍ថាកិច្ចប្រជុំនេះមានគោលបំណងផ្សព្វផ្សាយកម្មវិធីវិនិយោគបីឆ្នាំរំកិល ការបង្ហាញនិងពិនិត្យមើលការអនុវត្តគម្រោងរបស់មន្ទីរវិស័យ និងអង្គការដៃគូអផិវឌ្ឍក្នុងឆ្នាំ២០២៤ និងបង្ហាញអំពីគម្រោងអទិភាពដែលឃុំ សង្កាត់ និងក្រុងស្រុកស្នើឡើងតាមវិស័យនីមួយៗ ព្រមទាំងផ្សព្វផ្សាយអំពីដំណើរការសិក្ខាសាលាសមាហរណកម្មផែនការនៅថ្នាក់ក្រុង ស្រុក។

លោកអភិបាលរងខេត្តស្ទឹងត្រែងបានលើកឡើងថាការអភិវឌ្ឍនៅមូលដ្ឋានពិតជាមានសារសំខាន់ខ្លាំងណាស់ ហើយដើម្បីឲ្យមូលដ្ឋានមានការអភិវឌ្ឍរីកចំរើនទៅបានគឺទាមទាឲ្យមានការចូលរួមគ្រប់ពីអ្នកពាក់ព័ន្ធទាំងអស់ ជាពិសេសការអភិវឌ្ឍទាមទាឲ្យមានការយកចិត្តទុកដាក់ខ្ពស់ក្នុងការរៀបចំផែន ការសកម្មភាពអភិវឌ្ឍន៍វិស័យស្នូល មានទិសដៅច្បាស់លាស់ សំដៅរួមចំណែក អភិវឌ្ឍន៍ខឿនសេដ្ឋកិច្ច-សង្គមកិច្ចខេត្ត ឱ្យមានសន្ទុះរីកចម្រើនរឹងមាំ ស្របតាមកម្មវិធីនយោបាយរបស់រាជរដ្ឋាភិបាល។

ដើម្បីបង្កើនល្បឿនអភិវឌ្ឍន៍ឱ្យបានខ្លាំងក្លា លោក ធូ ចាន់ពៅ អភិបាលរងខេត្តស្ទឹងត្រែងបានអំពាវនាវដល់អង្គការដៃគូអភិវឌ្ឍន៍ ក្នុងខេត្តទាំងអស់ សូមបន្តចូលរួមឱ្យបានខ្លាំងក្លាថែមទៀត ក្នុងគ្រប់សកម្មភាពអភិវឌ្ឍន៍ខេត្ត និងដំណើរការអភិវឌ្ឍន៍មូលដ្ឋាន ដើម្បីធានាបាននូវការអភិវឌ្ឍតាមបែបប្រជាធិបតេយ្យ និងសកម្មភាពអភិបាលកិច្ចនៅមូលដ្ឋាន កាន់តែស៊ីជម្រៅ និងមានប្រសិទ្ធភាព៕