រដ្ឋបាលខេត្តស្ទឹងត្រែង រៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត អាណត្តិទី៤ នៅស្រុកសៀមប៉ាង

ភំ្នពេញ៖ ឯកឧត្តម ឈាង ឡាក់ ប្រធានក្រុមប្រឹក្សាខេត្តស្ទឹងត្រែង និងឯកឧត្តម សរ សុពុត្រា អភិបាលខេត្តស្ទឹងត្រែង នៅព្រឹកថ្ងៃទី០៨ ខែវិច្ឆិកា ឆ្នាំ២០២៤ បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនៅស្រុកសៀមប៉ាង ក្នុងគោលបំណងដើម្បីផ្សព្វផ្សាយអំពីតួនាទី ភារកិច្ចរបស់ក្រុមប្រឹក្សា និងគណៈអភិបាលខេត្ត ព្រមទាំងលទ្ធផលសំខាន់ៗ ដែលរដ្ឋបាលខេត្តទទួលបានតាមរយៈការអនុវត្តនូវសកម្មភាពនាបណ្តាឆ្នាំកន្លងមក និងធ្វើការពិភាក្សា ពិគ្រោះយោបល់ ជាមួយបងប្អូនប្រជាពលរដ្ឋ ដើម្បីរកនូវបញ្ហាអាទិភាពសំខាន់ៗ សម្រាប់រដ្ឋបាលខេត្តយកទៅធ្វើការពិចារណាដោះស្រាយ និងបន្តអនុវត្ត ដើម្បីលើកកម្ពស់ជីវភាពប្រជាពលរដ្ឋនៅគ្រប់មូលដ្ឋាន ភូមិ ឃុំ សង្កាត់ ស្រុក ឲ្យកាន់តែល្អប្រសើរឡើង។

ឯកឧត្តម ឈាង ឡាក់ ប្រធានក្រុមប្រឹក្សាខេត្តស្ទឹងត្រែង បានមានប្រសាសន៍ថាការចូលរួមរបស់ប្រជាពលរដ្ឋក្នុងសកម្មភាពសង្គម ការឆ្លើយតបតម្រូវការ និងការធ្វើសេចក្តីសម្រេចចិត្តក្នុងការអភិវឌ្ឍសេដ្ឋកិច្ចទាំងក្នុងក្របខ័ណ្ឌ មីក្រូ និងម៉ាក្រូ ជាមួយភាពសុខដុមរមនាក្នុងសង្គមជាតិ រួមទាំងសមិទ្ធផលជាច្រើននៅទូទាំង ប្រទេស និងក្នុងខេត្ត ក្រុង ស្រុក មូលដ្ឋានឃុំ សង្កាត់សម្រេចបានជាបន្តបន្ទាប់ ដែលកត្តាទាំង អស់នេះបានក្លាយទៅជាកត្តាលីករ នាំឱ្យប្រជាពលរដ្ឋកាន់តែមានទំនុកចិត្ត និងជំនឿជឿជាក់ លើការដឹកនាំរបស់រាជរដ្ឋាភិបាលកម្ពុជា និងអាជ្ញាធរមូលដ្ឋាន។

ឯកឧត្តម ប្រធានក្រុមប្រឹក្សាបន្តថា ដើម្បីចូលរួមចែករំលែកគំនិតយោបល់ និងការយល់ឃើញរបស់ប្រជាពលរដ្ឋ ក្នុងនោះប្រជាពលរដ្ឋមានចម្ងល់ ឬយោបល់ ត្រូវលើកដៃ ឬសរសេរលើក្រដាស ហើយប្រជាពលរដ្ឋគ្រប់រូប មានសិទ្ធិស្មើៗគ្នាក្នុងការបញ្ចេញមតិយោបល់សូមបងប្អូនប្រជាពលរដ្ឋទាំងអស់ រួមទាំងមន្ត្រីរាជការ សូមមេត្តាលើកឡើងនៅបញ្ហាដែលបានជួបប្រទះកន្លងមក ក៏ដូចជាសំណូមពរផ្សេងៗ ពាក់ព័ន្ធនឹងការផ្តល់សេវាសាធារណៈសេវាតម្រូវការ និងសេវាសំណូមពរ។

ឯកឧត្តម សរ សុពុត្រា អភិបាលខេត្តស្ទឹងត្រែងបានមានប្រសាសន៍ថា នូវរាល់បញ្ហារបស់ប្រជាពលរដ្ឋអាជ្ញាធរឃុំស្រុកត្រូវធ្វើជារបាយការណ៍រាយការណ៍មកខេត្តដើម្បីឲ្យខេត្តមានដំណោះស្រាយ ហើយកុំផ្អាប់បញ្ហាទាំងទោះទុកចោលចៀសវាងមិនដោះស្រាយ។

ឯកឧត្តម សរ សុពុត្រា បានបង្ហាញពីការយកចិត្តទុកដាក់ខ្ពស់ ក្នុងការដោះស្រាយបញ្ហាជូនប្រជាពលរដ្ឋនៅមូលដ្ឋាន។ទន្ទឹមនិងក៏ស្នើសុំដល់ប្រជាពលរដ្ឋទាំងអស់មេត្តាចូលរួមជាមួយអាជ្ញាធរក្នុងការបង្ការទប់ស្កាត់នូវរាល់បទល្មើសផ្សេងៗ និងបានធានាដោះស្រាយនូវរាល់បញ្ហារបស់ប្រជាពលរដ្ឋដែលបានលើកឡើងនាពេលនេះក្នុងឋានៈអាណត្តិឯកឧត្តម ជាអភិបាលខេត្ត ដោយមិនទុកចោលនោះឡើយ។

គួឲ្យដឹងថាបញ្ហាប្រឈម និងសំណូមពរដែលប្រជាប្រជាពលរដ្ឋលើកឡើងនៅក្នុងវេទិការនៅស្រុកសៀមប៉ាងមានចំនួន៤៣ បញ្ហានិងសំនូមពរ ហើយបានដោះស្រាយភ្លាមៗទាំង៤៣បញ្ហានិងសំនូមពរ៕