កូនដំរីទឹកដ៏ល្បីឈ្មោះ នៅប្រទេសថៃ ទាយថា អតីតប្រធានាធិបតី Donald Trump នឹងត្រលប់មកគ្រប់គ្រងសេតវិមានសាជាថ្មី
បាងកក៖ ការទស្សន៍ទាយ ថាតើនរណានឹងក្លាយជាប្រធានាធិបតីអាមេរិកថ្មី នៅតែមាន ខណៈប្រជាជនអាមេរិក ត្រូវនាំគ្នាធ្វើការបោះឆ្នោត នៅថ្ងៃទី៥ ខែវិច្ឆិកានេះ រីឯកូនដំរីទឹកដ៏ល្បីឈ្មោះ នៅឯប្រទេសថៃ ហៅថា Moo Deng បានទាយថា អតីតប្រធានាធិបតី លោក Donald Trump នឹងត្រលប់មកគ្រប់គ្រងសេតវិមានសាជាថ្មី។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP។
កូនដំរីទឹកញី Moo Deng នៅសួនសត្វ Khao Kheow Open Zoo ដែលកំពុងល្បីល្បាញពេញអ៉ីនធឺណេត បានក្លាយគោលដៅបំផុសគំនិត ធ្វើទីផ្សារលក់ទំនិញ។ កាលពីថ្ងៃចន្ទសប្តាហ៍នេះ សួនសត្វ Khao Kheow Open Zoo ស្ថិតនៅក្នុងខេត្តឈុនបុរី ប្រទេសថៃ បានបង្ហោះវីដេអូមួយបង្ហាញពី ការដាក់ចានផ្លែឈើឆ្លាក់ពីរ ដែលនីមួយៗតុបតែងដោយឈ្មោះ លោក Trump និង លោកស្រី Harris។
គួរបញ្ជាក់ រវាងជម្រើសទាំងពីរខាងលើ កូនដំរីទឹក Moo Deng បានជ្រើសរើសយកចានផ្លែឈើ ដែលមានឆ្លាក់ឈ្មោះ Trump នៅលើនោះ ហើយទទួលបានការចាប់អារម្មណ៍ខ្លាំង និងមានការចែកចាយពេញបណ្តាញសង្គម៕
