ស្លាកលេខយានយន្តនគរបាលជិត ២ពាន់គ្រឿង ត្រូវបានដកចេញពីបញ្ជីគ្រប់គ្រង ក្រោយបទបញ្ជារបស់សម្តេចធិបតីហ៊ុន ម៉ាណែត
ភ្នំពេញ៖ ក្រោយសម្តេចធិបតីហ៊ុន ម៉ាណែត នាយករដ្ឋមន្ត្រីកម្ពុជា បញ្ជាឱ្យក្រសួងមហាផ្ទៃធ្វើការគ្រប់គ្រងឱ្យបានហ្មត់ចត់ចំពោះយានយន្តដែលមានបំពាក់ស្លាកលេខនគរបាល ក្រសួងមហាផ្ទៃ បានចេញសេចក្តីសម្រេចប្រកាសលុបចោលនូវយានយន្តប្រើប្រាស់ស្លាកលេខនគរបាលប្រមាណជិត២ពាន់គ្រឿង នៅក្នុងដំណាក់កាលទី១។
យោងតាមសេចក្តីសម្រេចរបស់អគ្គស្នងការដ្ឋាននគរបាលជាតិ នៃក្រសួងមហាផ្ទៃស្តីពី«ការលុបទិន្នន័យចេញពីបញ្ជីគ្រប់គ្រងយានយន្តនគរបាល» ចេញកាលពីថ្ងៃទី១៧ ខែតុលា ឆ្នាំ២០២៤ បានឱ្យដឹងថា ក្រសួងមហាផ្ទៃ បានសម្រេចលុបទិន្នន័យយានយន្តដែលមានប្រើប្រាស់ស្លាកលេខនគរបាលចេញពីបញ្ជីគ្រប់គ្រងយានយន្ត ដែលបំពាក់ស្លាកលេខនគរបាលជាតិ ក្នុងដំណាក់កាលទី១ បានសរុបចំនួន១៩៤៧គ្រឿង។ ក្នុងនោះ ចំណោមយានយន្តសរុបទាំងអស់ដែលបានលុបចេញពីក្នុងបញ្ជីតារាងឧបសម្ព័ន្ធលេខ ៦៦៧ ន.ច.ស ចុះថ្ងៃទី០២ ខែកញ្ញា ឆ្នាំ២០២៤ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈមានដូចជា៖ រថយន្តទេសចរណ៍ចំនួន១១៣៩គ្រឿង រថយន្តដឹកទំនិញធុនស្រាល១៦២គ្រឿង និងទោចក្រយានយន្តចំនួន៦៤៦គ្រឿង។
គួរបញ្ជាក់ថា កាលពីថ្ងៃទី១៥ ខែតុលា ឆ្នាំ២០២៤ កន្លងទៅ ថ្លែងក្នុងពិធីអបអរសាទរខួបអនុស្សាវរីយ៍ លើកទី៣០ ថ្ងៃបង្កើតកងពលតូចលេខ៧០ កងទ័ពជើងគោក (១៥តុលា ១៩៩៤-១៥តុលា ២០២៤) សម្តេចនាយករដ្ឋមន្រ្តី ហ៊ុន ម៉ាណែត បានបញ្ជាឱ្យក្រសួងមហាផ្ទៃ និងភាគីពាក់ព័ន្ធត្រូវត្រួតពិនិត្យ និងគ្រប់គ្រងឡើងវិញចំពោះយានយន្តដែលមានប្រើស្លាកលេខនគរបាលជាតិ ដើម្បីងាយស្រួលក្នុងការថែរក្សាសណ្តាប់ធ្នាប់។
សម្តេចថ្លែងថា៖«ខ្ញុំឃើញក្រសួងការពារជាតិ អគ្គសម្ភារបច្ចេកទេស បានចេញគោលការណ៍ណែនាំ អារឿងឡាន [ន.ប]-[ខ.ម] ថ្ងៃមុន..ឯកឧត្តមអភិសន្តិបណ្ឌិត ស សុខា ក្រសួងមហាផ្ទៃ ក៏បានចេញការណែនាំរឿងស្លាកលេខ ន.ប សូមគ្រប់គ្រងឱ្យបាន ទាំងការចេញលេខឱ្យ ទាំងការប្រើប្រាស់»។
មួយវិញទៀត អគ្គសម្ភារបច្ចេកទេស បានចេញសេចក្តីប្រកាសថា ចាប់ពីពេលនេះតទៅ គឺប្រើប្រាស់ឱ្យចំគោលដៅ មានតែនាយទាហានជាន់ខ្ពស់ដែលត្រូវប្រើស្លាកលេខ ន.ប ខ.ម ហើយនាយទាហានផ្សេងត្រូវប្រើស្លាកលេខខ្មៅធម្មតា។ នេះបើតាមសម្តេចធិបតី ហ៊ុន ម៉ាណែត។ ក្នុងនោះ សម្តេច ក៏បានមានប្រសាសន៍ផងដែរថា ការប្រើស្លាកលេខបែបនេះនូវគ្រប់កម្រិតនាយទាហាន ប៉ូលិសបានបង្កភាពច្របូកច្របល់។ សម្តេចថ្លែងថា៖«ប៉ុន្តែផ្ទុយទៅវិញ វាធ្វើឱ្យច្របូកច្របល់ អ្នកបើកមិនពិតប្រាកដ ជូនកាលបើកសាហាវជាងអ្នកពិតប្រាកដ ដល់អ៊ីចឹង ដល់អ្នកពិតប្រាកដទៅខូចឈ្មោះ នេះគឺជាបញ្ហា»៕
