អគ្គនាយកដ្ឋានតំបន់ការពារធម្មជាតិ រៀបចំកិច្ចប្រជុំពិគ្រោះយោបល់សម្រាប់ «ការអភិវឌ្ឍសមត្ថភាព ដើម្បីជំរុញសកម្មភាព និងការប្តេជ្ញាចិត្តនៅថ្នាក់ជាតិ និងសកលសម្រាប់កាត់បន្ថយការបំពុលបរិស្ថានដោយប្លាស្ទិក»
ភ្នំពេញ៖ នៅថ្ងៃទី១០ ខែតុលា ឆ្នាំ២០២៤ អគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន បានរៀបចំកិច្ចប្រជុំពិគ្រោះយោបល់សម្រាប់ «ការអភិវឌ្ឍសមត្ថភាព ដើម្បីជំរុញសកម្មភាព និងការប្តេជ្ញាចិត្តនៅថ្នាក់ជាតិ និងសកលសម្រាប់កាត់បន្ថយការបំពុលបរិស្ថានដោយប្លាស្ទិក» នៅសណ្ឋាគារភ្នំពេញអេរ៉ា រាជធានីភ្នំពេញ ដែលដឹកនាំដោយឯកឧត្តម ស្រី ស៊ុនលាន អគ្គនាយក នៃអគ្គនាយកដ្ឋានតំបន់ការពារធម្មជាតិ និងលោក Toma Lida តំណាងUNEP ដោយមានការចូលរួមពីតំណាងក្រសួងសាធារណការ និងដឹកជញ្ជូន តំណាងអគ្គនាយកដ្ឋានគោលនយោបាយ និងយុទ្ធសាស្ត្រ តំណាងរដ្ឋបាលខេត្តកោះកុង ព្រះសីហនុ កែប កំពត លោកប្រធានមន្ទីរបរិស្ថានខេត្តកោះកុង តំណាងមន្ទីរបរិស្ថានខេត្តព្រះសីហនុ កំពត កែប អង្គការFF WEA UNDP GIZ សាកលវិទ្យាល័យភូមិន្ទភ្នំពេញ សាកលវិទ្យាល័យតិចណូ សាកលវិទ្យាល័យភូមិន្ទកសិកម្ម សាកលវិទ្យាល័យបញ្ញាសាស្ត្រា សរុបចំនួន៤០នាក់។
កិច្ចប្រជុំពិគ្រោះយោបល់នេះមានគោលបំណងពិភាក្សាផ្តល់ធាតុចូលពីស្ថានភាពគ្រប់គ្រងសំណល់បា្លស្ទិកពីដៃគូពាក់ព័ន្ធ។ គួរបញ្ជាក់ថា ក្រសួងបរិស្ថាន បានដាក់ចេញនិងអនុវត្តនូវយុទ្ធសាស្ត្រចក្រាវិស័យបរិស្ថាន ដែលផ្តោតលើ«ភាពស្អាត» «ភាពបៃតង» និង«ចីរភាព»។ ចំពោះការគ្រប់គ្រងសំណល់ប្លាស្ទិក ក្រសួងបរិស្ថាន បានដាក់ចេញនូវយុទ្ធនាការ «ថ្ងៃនេះ ខ្ញុំមិនប្រើថង់ប្លាស្ទិកទេ» និងទទួលបានជោគជ័យ ដោយមានការចូលរួមសរុប ៩,៦៨លាននាក់ និងមានការចូលរួមជាបន្តបន្ទាប់ពីសាធារណជន។ ក្រសួងបរិស្ថាន ក៏បន្តដាក់ចេញនូវយុទ្ធនាការ «កម្ពុជាស្អាត ខ្មែរធ្វើបាន» ដែលបាននិងកំពុងមានការចូលរួមពីសិស្សានុសិស្ស និងប្រជាពលរដ្ឋចំនួន ២,៥លាននាក់។
ការបំពុលសមុទ្រដោយសំណល់ប្លាស្ទិក គឺជាបញ្ហាបរិស្ថានមួយដែលសកលលោកកំពុងខិតខំដោះស្រាយ ហើយកម្ពុជា ដែលមានក្រសួងបរិស្ថានជាសេនាធិការបានចូលរួមយ៉ាងសកម្មជាមួយសកលលោកក្នុងការកាត់បន្ថយ និងទប់ស្កាត់សំណល់ប្លាស្ទិក ដើម្បីសុខុមាលភាព និងសុខភាពរបស់ប្រជាពលរដ្ឋ និងរក្សាចីរភាពបរិស្ថាន ប្រព័ន្ធអេកូឡូស៊ី និងជីវៈចម្រុះ ៕
