ក្រសួងមហាផ្ទៃ ស្នើភាគីជប៉ុនបន្តគាំទ្រលើការបណ្តុះបណ្តាល និងការកសាងធនធានមនុស្ស និងកំណែទម្រង់វិមជ្ឈការ និងវិសហមជ្ឈការ នៅកម្ពុជា

ភ្នំពេញ៖ នៅរសៀលថ្ងៃអង្គារ ទី០៣ ខែកញ្ញា ឆ្នាំ២០២៤នេះ ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ក្រសួងមហាផ្ទៃ បានអនុញ្ញាតឱ្យ លោក NAGASE Kensuke អគ្គទីប្រឹក្សា និងជាអនុប្រធានបេសកកម្មនៃស្ថានទូតជប៉ុន ប្រចាំនៃព្រះរាជាណាចក្រកម្ពុជា និងសហការី ចូលជួបសម្តែងការគួរសម នាទីស្តីការក្រសួងមហាផ្ទៃ។

ឯកឧត្តម សន្តិបណ្ឌិត ម៉ៅ ច័ន្ទតារា បានស្វាគមន៍ចំពោះវត្តមាន លោក NAGASE Kensuke អគ្គទីប្រឹក្សា និងជាអនុប្រធានបេសកកម្ម នៃស្ថានទូត ជប៉ុនប្រចាំកម្ពុជា និងសហការី។

ឯកឧត្តម សន្តិបណ្ឌិត បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល និងប្រជាជនជប៉ុន ដែលជានិច្ចកាល តែងយកចិត្តទុកដាក់ឧបត្ថម្ភគាំទ្រដល់បុព្វហេតុសុខសន្តិភាព និងការអភិវឌ្ឍសេដ្ឋកិច្ចសង្គម នៅកម្ពុជាឱ្យកាន់តែស៊ីជម្រៅ។

ឯកឧត្តមសន្តិបណ្ឌិត បានស្នើសុំឱ្យភាគីជប៉ុនបន្តគាំទ្រលើបញ្ហាសំខាន់ៗមួយចំនួនរួមមាន៖ ការបណ្តុះបណ្តាល និងការកសាងធនធានមនុស្ស ការគាំទ្រលើកំណែទម្រង់វិមជ្ឈការ និងវិសហមជ្ឈការ នៅព្រះរាជាណាចក្រកម្ពុជា។

ជាការឆ្លើយតប លោក NAGASE Kensuke អគ្គទីប្រឹក្សា និងជាអនុប្រធាន បេសកកម្ម នៃស្ថានទូតជប៉ុនប្រចាំកម្ពុជា បានថ្លែងអំណរគុណចំពោះ ឯកឧត្តម សន្តិបណ្ឌិត ម៉ៅ ច័ន្ទតារា រដ្ឋលេខាធិការប្រចាំការ ដែលបានអនុញ្ញាតឱ្យ លោក និងសហការីចូលជួបសម្តែងការគួរសមនាថ្ងៃនេះ។

លោក NAGASE Kensuke បានជម្រាបជូនថា លោកនឹងយកសំណើរបស់ ឯកឧត្តម សន្តិបណ្ឌិត ទៅពិភាក្សាជាមួយភាគីពាក់ព័ន្ធ ហើយលោកក៏ឯកភាព ចំពោះការបន្តពង្រឹង និងពង្រីកកិច្ចសហប្រតិបត្តិការ រវាងភាគីទាំងពីរឱ្យកាន់តែ ស៊ីជម្រៅបន្ថែមទៀត ស្របតាមភាពជាដៃគូយុទ្ធសាស្ត្រគ្រប់ជ្រុងជ្រោយ នៃ ប្រទេសទាំងពីរ។

ជាមួយគ្នានោះដែរ ឯកឧត្តម សន្តិបណ្ឌិត ម៉ៅ ច័ន្ទតារា និង លោក NAGASE Kensuke បានវាយតម្លៃខ្ពស់ ចំពោះកិច្ចសហប្រតិបត្តិការកន្លងមក រវាងភាគីទាំងពីរ រួមមាន ជាអាទិ៍ វិស័យសេដ្ឋកិច្ច នយោបាយ និងសន្តិសុខ។

ជាទីបញ្ចប់ ឯកឧត្តម សន្តិបណ្ឌិត ម៉ៅ ច័ន្ទតារា សូមជូនពរ លោក NAGASE Kensuke សូមទទួលបានជោគជ័យក្នុងអាណត្តិបេសកកម្មការងារនៅកម្ពុជា៕