មនុស្ស ៣នាក់រងរបួសធ្ងន់ ក្នុងហេតុការណ៍បាញ់ប្រហារគ្នា កណ្ដាលក្រុងព្រះសីហនុ រវាងចិនពីរក្រុម
ភ្នំពេញ៖ យ៉ាងហោចណាស់មានមនុស្ស៣នាក់ ក្នុងនោះមានម្នាក់ជាជនជាតិខ្មែរត្រូវបញ្ចូនទៅសង្គ្រោះនៅមន្ទីរពេទ្យភ្លាមៗ បន្ទាប់ពីជួបហេតុការណ៍បាញ់ប្រហារគ្នារវាងជនជាតិចិន២ក្រុម នៅចំណុចក្បែរសណ្នាគារសមុទ្ទខៀវ ស្ថិតក្នុងក្រុងព្រះសីហនុ កាលពីយប់ថ្ងៃទី២ ខែកញ្ញា ឆ្នាំ២០២៤ ។
យោងតាមសេចក្ដីរាយការណ៍ពីប្រជាពលរដ្ឋនៅទីតាំងកើតហេតុ បានឱ្យដឹងថា មុនដំបូងគេឃើញភាគីទាំង២ ណាត់គ្នាមកនិយាយការងារនៅក្នុងសណ្ឋាគារយីហោ ប្លូបេ ប៉ុន្តែមិនដឹងមានបញ្ហាអ្វីទេ ស្រាប់តែមួយសន្ទុះក្រោយមក ភាគីទាំងពីរបានទាស់សម្ដីគ្នាហើយភាគីជនរងគ្រោះ បានដើរចេញពីសណ្ឋាគារ ក៏ត្រូវភាគីម្ខាងទៀតយកកាំភ្លើងខ្លីមិនស្គាល់ម៉ាកបាញ់ជាច្រើនគ្រាប់ បណ្ដាលឱ្យជនជាតិចិន២នាក់រងរបួស ព្រមទាំងផ្លាតគ្រាប់ទៅត្រូវសន្តិសុខដែលកំពុងឈរយាមកាមនៅខាងមុខសណ្ឋាគាររងរបួសធ្ងន់។
ក្រោយកើតហេតុ គេសង្កេតឃើញវត្តមានរបស់សមត្ថកិច្ចចម្រុះ ចុះមកដល់ទីតាំងខាងលើ និងបញ្ជូនជនរងគ្រោះទៅកាន់មន្ទីរពេទ្យភ្លាមៗ ព្រមទាំងធ្វើការឃាត់ខ្លួនជនសង្ស័យក្នុងករណីបាញ់ប្រហារនេះ បានចំនួន៧នាក់ ដើម្បីធ្វើការសាកសួរនៅស្នងការដ្ឋាននគរបាលខេត្តព្រះសីហនុ ខណៈមូលហេតុពិតប្រាកដនៃករណីផ្ទុះអាវុធខាងលើនេះ សមត្ថកិច្ចជំនាញនៅមិនទាន់អាចទម្លាយចេញបាននៅឡើយទេ៕
