សហគ្រាសគ្រប់គ្រងសំរាម សំណល់រឹងទីប្រជុំជន រាជធានីភ្នំពេញជូនដំណឹងស្ដីពី ថ្លៃសេវាប្រមូលសំរាម និងសំណល់រឹងនៅភ្នំពេញ
ភ្នំពេញ៖ សហគ្រាសគ្រប់គ្រងសំរាម សំណល់រឹងទីប្រជុំជន រាជធានីភ្នំពេញជូនដំណឹងដល់បងប្អូនប្រជាពលរដ្ឋ ទាំងអស់ នៅរាជធានីភ្នំពេញ មេត្តាជ្រាបថា សហគ្រាស បានទទួលសំណួរ និងមតិយោបល់ជាច្រើនពាក់ព័ន្ធតម្លៃសេវាប្រមូល សំរាម នៅរាជធានីភ្នំពេញ ថាមានការតម្លើងថ្លៃមួយគុណនឹងពីរ។
សូមបញ្ជាក់ថា ចំពោះថ្លៃសេវាប្រមូលសំរាម សំណល់រឹង សម្រាប់ខែសីហា ឆ្នាំ២០២៤ ពុំមានការដំឡើងថ្លៃមួយគុណនឹងពីរ ដូចដែលបងប្អូនមួយចំនួនបានភាន់ច្រឡំ នោះទេ ជាការពិតនោះ តម្លៃគឺនៅរក្សាដដែលទៅតាមតារាងតម្លៃដែលបានផ្សព្វផ្សាយជូន រួចហើយ។
ថ្លៃសេវាសំរាមដែលបងប្អូនបានឃើញនៅក្នុងប្រព័ន្ធទូទាត់អេឡិចត្រូនិក (តាមទូរស័ព្ទដៃ) គឺជា៖ ថ្លៃសេវាសំរាម ខែកក្កដា ឆ្នាំ២០២៤ ដែលមិនទាន់បានបង់ និង- ថ្លៃសេវាសំរាម ខែសីហា ឆ្នាំ២០២៤ ដែលត្រូវបង់ចន្លោះពីថ្ងៃទី០១ ដល់ថ្ងៃទី១៥ នៃខែបន្ទាប់ ឧទាហរណ៍់៖ ផ្ទះលេខ ៥៩០ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ជាប្រភេទផ្ទះល្វែងជាន់ ផ្ទាល់ដី (មិនប្រកបអាជីវកម្ម) ដែលមានតម្លៃសេវាសំរាម ១ ខែ = ២.៥ ដុល្លារអាមេរិក។
តម្លៃសេវាក្នុងប្រព័ន្ធនឹងបង្ហាញសរុប= ៥ដុល្លារ
(៥ ដុល្លារនេះ គឺជាតម្លៃប្រចាំខែកក្កដា ដែលមិនទាន់បានបង់ ២.៥ ដុល្លារ + ខែសីហា ២.៥ ដុល្លារ) បញ្ជាក់៖ បើបងប្អូនបង់ថ្លៃប្រមូលសំរាមចន្លោះពីថ្ងៃទី០១ ដល់ថ្ងៃទី១៥ នៃខែបន្ទាប់ តម្លៃប្រមូលសំរាម នឹងបង្ហាញ ក្នុងប្រព័ន្ធតែ១ខែទេ តែបើបងប្អូនបង់ថ្លៃប្រមូលសំរាមចន្លោះពីថ្ងៃទី១៦ ដល់ថ្ងៃទី៣០ នៃខែបន្ទាប់ តម្លៃប្រមូលសំរាមនឹងបង្ហាញក្នុងប្រព័ន្ធចំនួន២ខែ (ដែលបងប្អូនមានការភាន់ច្រឡំថា ថ្លៃប្រមូលសំរាម មានការតម្លើងថ្លៃមួយគុណនឹងពីរ ការពិតគឺមិនមានការតម្លើងតម្លៃទេ)សូមបងប្អូនប្រជាពលរដ្ឋទាំងអស់ មេត្តាជ្រាបជាព័ត៌មាន និងចូលរួមបំពេញកាតព្វកិច្ចបង់ថ្លៃសេវាប្រមូលសំរាម ទាំងអស់គ្នា ដើម្បីចូលរួមថែរក្សាបរិស្ថាននៅរាជធានីភ្នំពេញ។
សម្រាប់ព័ត៌មានបន្ថែម សូមមេត្តាទំនាក់ទំនងមកទីស្នាក់ការកណ្តាល សហគ្រាសគ្រប់គ្រងសំរាម សំណល់រឹង ទីប្រជុំជនរាជធានីភ្នំពេញ ដែលមានអាសយដ្ឋានស្ថិតនៅតំបន់អភិវឌ្ឍន៍អូស៊ីអាយស៊ី (OCIC) វិថីបឹងទទឹងថ្ងៃ ភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ឬ ទំនាក់ទំនងតាមទូរស័ព្ទលេខ ០៨១ ៦៤៦ ២២២ / ០១១៦៤៦ ២២២៕
