សម្ដេចធិបតី៖ ក្នុងរយៈពេល១ឆ្នាំមកនេះ រាជរដ្ឋាភិបាលបានទូលស្នើសុំព្រះមហាក្សត្រលុបឈ្មោះមន្ត្រីដែលប្រព្រឹត្តខុសច្បាប់ និងសីលធម៌សង្គម ចេញពីក្របខណ្ឌមន្ត្រីរាជការបានជាច្រើនរូប

ភ្នំពេញ៖ ក្នុងឱកាសដែលសម្តេចបានធ្វើសេចក្តីថ្លែងការណ៍ពិសេសមួយ ស្តីពីសមិទ្ធផល១ឆ្នាំ របស់រាជរដ្ឋាភិបាលនីតិកាលទី៧ នៃរដ្ឋសភា ២២ សីហា ឆ្នាំ២០២៣ – ២២សីហា ឆ្នាំ២០២៤ នៅយប់ថ្ងៃទី២២ ខែសីហា ឆ្នាំ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី៖ ក្នុងរយៈពេល ១ឆ្នាំនៃរាជរដ្ឋាភិបាល អាណត្តិទី៧ នេះ រាជរដ្ឋាភិបាលបានទូលស្នើសុំព្រះមហាក្សត្រលុបឈ្មោះមន្ត្រីដែលប្រព្រឹត្តខុសច្បាប់ និងសីលធម៌សង្គម ចេញពីក្របខណ្ឌមន្ត្រីរាជការបានជាច្រើនរូប។

ក្រៅពីនេះ រាជរដ្ឋាភិបាលក៏បានទូលស្នើសុំព្រះមហាក្សត្រដកហូតគោរមងារ អ្នកឧកញ៉ា ឧកញ៉ា ដែលបានប្រព្រឹត្តខុសច្បាប់ និងសីលធម៌សង្គម ចេញពីគោរមងារ អ្នកឧកញ៉ា និងឧកញ៉ា បានជាច្រើនរូបផងដែរ។

សម្តេចធិបតី ហ៊ុន ម៉ាណែត បានលើកឡើងថា ក្នុងរយៈពេល១២ខែ ក្រោមការដឹកនាំរបស់រាជរដ្ឋាភិបាល អាណត្តិទី៧ នៃរដ្ឋសភា រាជរដ្ឋាភិបាលបានបណ្តេញ និងទម្លាក់ឋានន្តរ សក្តិដល់មន្រ្តីនគរបាល យោធិន មន្រ្តីរាជការជាច្រើននាក់ក្រោយពីពួកគេបានប្រព្រឹត្តខុសនឹងវិជ្ជាជីវៈ និង ខ្វះក្រមសីលធម៌ រួមទាំងបានស្នើរដល់អង្គព្រះមហាក្សត្របញ្ចប់តំណែងតួនាទីដល់ឧកញ៉ាមួយចំនួនផង ដែរ បន្ទាប់ពីពួកគេប្រព្រឹត្តខុសច្បាប់ និងខុសក្រមសីលធម៌ផ្សេងៗជាដើមនោះ ៕