ឯកឧត្ដមរដ្ឋមន្រ្តី ថោ ជេដ្ឋា អញ្ជើញចូលរួមពិសាអាហារថ្ងៃត្រង់ និងពិភាក្សាការងារជាមួយគណៈប្រតិភូក្រុមប្រឹក្សាភិបាលធនាគារអភិវឌ្ឍន៍អាស៊ី (ADB)

ភ្នំពេញ៖ នៅថ្ងៃពុធ ២រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២១ ខែសីហា ឆ្នាំ២០២៤នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចូលរួមពិសាអាហារថ្ងៃត្រង់ និងពិភាក្សាការងារជាមួយគណៈប្រតិភូក្រុមប្រឹក្សាភិបាលធនាគារអភិវឌ្ឍន៍អាស៊ី(ADB) នៅភោជនីយដ្ឋាន Rose Wood រាជធានីភ្នំពេញ។

សូមជម្រាបថា កិច្ចពិភាក្សាបានផ្ដោតលើកិច្ចសហប្រតិបត្តិការបន្តជាមួយធនាគារអភិវឌ្ឍន៍អាស៊ី (ADB) និងទិសដៅអនាគតនៃកំណើនសម្រាប់កម្ពុជា ជាពិសេសការគ្រប់គ្រងទឹកជំនន់ និងគ្រោះរាំងស្ងួត ព្រមទាំងការគ្រប់គ្រងទឹកឱ្យមានប្រសិទ្ធភាព និងមានភាពធន់ទៅនឹងការប្រែប្រួលអាកាសធាតុ។

ក្នុងឱកាសនោះដែរ ឯកឧត្តមរដ្ឋមន្រ្តីបានបញ្ជាក់និងសង្កត់ធ្ងន់ទៅលើផែនការជាយុទ្ធសាស្រ្តពេលបច្ចុប្បន្ននិងទៅអនាគត ដោយផ្តោតលើការគ្រប់គ្រងនិងការស្តុកទឹក ការគ្រប់គ្រងផ្ទៃរងទឹកភ្លៀង និងវិធានការឆ្លើយតបទៅនឹងហានិភ័យនៃគ្រោះទឹកជំនន់ និងគ្រោះរាំងស្ងួត។

សូមបញ្ជាក់ថា ក្រសួងធនធានទឹក និងឧតុនិយម មានចក្ខុវិស័យ និងផែនការច្បាស់លាស់ក្នុងការសម្រេចយុទ្ធសាស្រ្តបញ្ចកោណដំណាក់កាលទី១ នៃរាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដោយបានអនុវត្តនូវផែនការសកម្មភាពការងារដូចជា៖ ១).ធ្វើឱ្យប្រសើរឡើងសន្តិសុខទឹក, ២).ធ្វើទំនើបកម្មប្រព័ន្ធធារាសាស្រ្ត និងហេដ្ឋារចនាសម្ព័ន្ធរូបវន្តធារាសាស្រ្តនានា, ៣).ពង្រឹងការប្រើប្រាស់បច្ចេកវិទ្យាទំនើបក្នុងការឆ្លើយតបទៅនឹងការប្រែប្រួលអាកាសធាតុ, ៤).ពង្រឹងយន្តការគ្រប់គ្រង និងការអភិរក្សធនធានទឹក និង៥).អភិវឌ្ឍធនធានមនុស្សដើម្បីត្រៀមខ្លួនក្នុងការអនុវត្តនិងដំណើរការមជ្ឈមណ្ឌលផ្ទុកទិន្នន័យឱ្យមានប្រសិទ្ធភាព ៕