លោកជំទាវ លឹម រស្មី អញ្ជើញចូលរួមក្នុងវគ្គបណ្តុះបណ្តាលគ្រូបង្គោល ស្តីពី “ទស្សនទានយេនឌ័រ និងស្ត្រីក្នុងភាពជាអ្នកដឹកនាំ”

ភ្នំពេញ៖ នៅថ្ងៃអង្គារ ទី១៣ ខែសីហា ឆ្នាំ២០២៤ លោកជំទាវ ឧត្តមសេនីយ៍ឯក លឹម រស្មី អគ្គនាយករង នៃអគ្គនាយកដ្ឋានអត្តសញ្ញាណកម្ម បានអញ្ជើញចូលរួមក្នុងវគ្គបណ្តុះបណ្តាលគ្រូបង្គោល ស្តីពី “ទស្សនៈទានយេនឌ័រ និងស្ត្រីក្នុងភាពជាអ្នកដឹកនាំ” ក្រោមអធិបតីភាពលោកជំទាវ អុង សុភាវី រដ្ឋលេខាធិការ និងជាប្រធានក្រុមការងារយេនឌ័ររបស់ក្រសួងមហាផ្ទៃ ដែលរៀបចំដោយ ក្រុមការងារយេនឌ័រក្រសួងមហាផ្ទៃ នៅសាលប្រជុំខេត្តបាត់ដំបង ទីស្តីការក្រសួងមហាផ្ទៃ។

វគ្គបណ្ដុះបណ្ដាលនេះក៏មានការអញ្ជើញចូលរួមពី លោកជំទាវអនុរដ្ឋលេខាធិការ ឯកឧត្តមអគ្គនាយក នៃក្រសួងកិច្ចការនារី លោកជំទាវ ឯកឧត្តម លោក លោកស្រី ដែលជាប្រធានក្រុមការងារយេនឌ័រតាមបណ្តាអគ្គនាយកដ្ឋានចំណុះក្រសួងមហាផ្ទៃ អភិបាលរង នៃគណៈអភិបាលទាំង២៥រាជធានី-ខេត្ត សមាជិក សមាជិក នៃក្រុមការងារយេនឌ័រ ក្រសួងមហាផ្ទៃ សរុបចំនួនប្រមាណ ១៤០រូប។

វគ្គបណ្តុះបណ្តាលបានរៀបចំឡើងក្នុងរយៈពេលមួយថ្ងៃពេញ ដោយមានកិច្ចសហការរវាងក្រសួងមហាផ្ទៃ និងក្រសួងកិច្ចការនារី ក្នុងគោលបំណងពង្រឹង និងអភិវឌ្ឍសមត្ថភាពថ្នាក់ដឹកនាំ សមាជិក សមាជិកា នៃក្រុមការងារយេនឌ័រ របស់ក្រសួងមហាផ្ទៃ តាមភាពចាំបាច់ ការផ្លាស់ប្តូរសមាសភាពថ្មីៗ ព្រមទាំងរំលឹកឡើងវិញនូវចំណេះដឹងមូលដ្ឋានអំពីទស្សនៈទានយេនឌ័រ ព្រមទាំងយុត្តវិធីមួយចំនួនក្នុងការបង្កើតភាពអង់អាចនិងភាពជាអ្នកដឹកនាំរបស់ស្រ្តីនិងក្មេងស្រី ៕