ភ្នំពេញ៖ យោងតាមរបាយការណ៍ របស់អគ្គនាយកដ្ឋានកៅស៊ូ បានឱ្យដឹងថា នៅឆមាសទី១ ឆ្នាំ២០២៤នេះ កម្ពុជារកចំណូលបានជាង ២១៥លានដុល្លារអាមេរិក ពីការលក់ផលិតផលកៅស៊ូ។
របាយការណ៍របស់អគ្គនាយកដ្ឋានកៅស៊ូបានបញ្ជាក់ថា «ចំណូលពីការនាំចេញជ័រកៅស៊ូ គិតត្រឹមឆមាសទី១ ឆ្នាំ២០២៤ មានចំនួន២១៣ ៤៣៥ ៨៤១ ដុល្លារ ចំណែកការនាំចេញឈើកៅស៊ូ មានចំនួន១ ៦០១ ៣៨៦ដុល្លារ»។
បើតាមរបាយការណ៍, គិតត្រឹមឆមាសទី១ ឆ្នាំ២០២៤ ជ័រកៅស៊ូមានតម្លៃ ១,៥១៧ដុល្លារ ក្នុង១តោន កើនឡើងចំនួន១០៧ដុល្លារ ក្នុង១តោន ស្មើនឹង៧.៥៦% ធៀបនឹងរយៈពេលដូចគ្នា នៃឆ្នាំមុន។ ចំណែកតម្លៃ នៃការនាំចេញឈើកៅស៊ូ ជាមធ្យមក្នុងខែមិថុនា ឆ្នាំ២០២៤ មានតម្លៃ២២២ដុល្លារ ក្នុងមួយម៉ែត្រគីប។
សូមជម្រាបថា ផ្ទៃដីកៅស៊ូសរុបមានចំនួន ៤០៧ ១៧២ហិកតា ក្នុងនោះ ផ្ទៃដីចៀរជ័រមានចំនួន ៣២០ ១៨៤ហិកតា ស្មើនឹង៧៨.៦៤% និងផ្ទៃដីថែទាំមានចំនួន ៨៦,៩៨៨ហិកតា ស្មើនឹង២១.៣៦%។ ក្នុងឆ្នាំ២០២៣កន្លងទៅ កម្ពុជារកចំណូលបាន ពីការលក់ផលិតផលកៅស៊ូ មានប្រមាណចំនួន ៥៣៧.៩លានដុល្លារអាមេរិក កើនឡើងប្រមាណចំនួន៦.២លានដុល្លាអាមេរិក ស្មើនឹង១.២% ធៀបឆ្នាំ២០២២៕
