គណៈកម្មការរៀបចំការប្រឡង រៀបចំការងារបច្ចេកទេសឱ្យបានគ្រប់ជ្រុងជ្រោយធានាដល់ដំណើរការប្រឡងប្រជែងជ្រើសរើសគ្រូបង្រៀននៅបឋមសិក្សា នាចុងសប្តាហ៍នេះប្រព្រឹត្តទៅដោយទៅរលូន

ភ្នំពេញ៖ នារសៀលថ្ងៃទី៩ ខែកក្កដា ឆ្នាំ២០២៤ គណៈកម្មការរៀបចំការប្រឡងប្រជែង បានរៀបចំកិច្ចប្រជុំពិភាក្សាការងារត្រៀមលក្ខណៈ សម្រាប់ដំណើរការប្រឡងប្រជែងជ្រើសរើសគ្រូបង្រៀននៅបឋមសិក្សា ឱ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា ដែលដឹកនាំដោយឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាអនុប្រធានគណៈកម្មការរៀបចំការប្រឡង ដោយមានការចូលរួមពី ថ្នាក់ដឹកនាំ និងមន្រ្តីជំនាញក្រសួងជាច្រើនរូប ជាប្រធាន អនុប្រធាន និងសមាជិកនៃគណៈកម្មការ និងអនុគណៈកម្មការការប្រឡងប្រជែងជ្រើសរើសគ្រូបង្រៀនបឋមសិក្សា នៅសាលាភូមិន្ទរដ្ឋបាល។

អង្គប្រជុំបានពិនិត្យ និងពិភាក្សាលម្អិតទៅលើការងារសំខាន់ៗមួយចំនួនដែលគាំទ្រដល់ការប្រឡងប្រជែង រួមមាន៖ ១).ការរៀបចំប្លង់មណ្ឌល និងបន្ទប់ប្រឡង ព្រមទាំងលេខតុបេក្ខជនតាមវេននីមួយៗ, ២).កំណត់តួនាទីភារកិច្ច និងការទទួលខុសត្រូវរបស់អនុគណៈកម្មការនានា, ៣).កំណត់នីតីវិធី និងសេចក្តីណែនាំ ព្រមទាំងព័ត៌មាននានាពាក់ព័ន្ធការប្រឡងដល់បេក្ខជន, ៤).ការរៀបចំបិទបញ្ជីឈ្មោះបេក្ខជនចូលប្រឡងនៅតាមមណ្ឌលប្រឡងនីមួយៗ, ៥).ការត្រៀមរថយន្តសង្រ្គោះបន្ទាន់ រថយន្តពន្លត់អគ្គីភ័យ និងសម្ភារៈការពារទឹកភ្លៀង, ៦).ការរក្សាទុកសន្លឹកកិច្ចការប្រឡង និងការធ្វើកំណែសន្លឹកកិច្ចការបេក្ខជន និង៧).បញ្ហាផ្សេងៗ។

សូមរម្លឹកផងដែរថា ការប្រឡងប្រជែងជ្រើសរើសគ្រូបង្រៀននៅបឋមសិក្សា ក្នុងក្របខណ្ឌក្រសួងអប់រំ យុវជន និងកីឡា មានបេក្ខជនចូលរួមការប្រឡងចំនួន ៣៨,១៦៨នាក់ (ស្រី ២៨,៤៥៦នាក់) ដែលនឹងប្រព្រឹត្តទៅតាមកាលបរិច្ឆេទដូចខាងក្រោម៖
-ថ្ងៃទី១៣ និង១៤ ខែកក្កដា ឆ្នាំ២០២៤ នៅមណ្ឌលប្រឡង សាកលវិទ្យាល័យភូមិន្ទភ្នំពេញ (RUPP)
-ថ្ងៃទី២០ និង២១ ខែកក្កដា ឆ្នាំ២០២៤ នៅមណ្ឌលប្រឡង សាលាភូមិន្ទរដ្ឋបាល (ERA) និងសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច (RULE) ៕