មន្ត្រីជាន់ខ្ពស់ក្រសួងសុខាភិបាល ដឹកនាំប្រជុំថ្នាក់ដឹកនាំមន្ទីរពេទ្យ ព្រះកុសមៈ ដើម្បីកែលម្អពង្រឹង និងពង្រីកគុណភាពការផ្តល់សេវាជូនពលរដ្ឋ

ភ្នំពេញ៖ ឯកឧត្តមសាស្រ្តាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាភិបាលមន្ទីរពេទ្យមិត្តភាពកម្ពុជា-ចិន ព្រះកុសមៈ នាថ្ងៃទី៨ ខែកក្កដា ឆ្នាំ ២០២៤ បានអញ្ជើញចូលរួមប្រជុំជាមួយថ្នាក់ដឹកនាំមន្ទីរពេទ្យ មិត្តភាពកម្ពុជា ចិន ព្រះកុសមៈ ដើម្បីពិនិត្យមើលពីការអភិវឌ្ឍរបស់មន្ទីរពេទ្យនាពេលកន្លងមក និងរកមើលចំណុចគន្លឹះ ដើម្បីកែលម្អពង្រឹង និងពង្រីកគុណភាព សមត្ថភាព សក្ក័សិទ្ធភាព នៃសេវាពិនិត្យព្យាបាលនិងថែទាំ ជូនប្រជាពលរដ្ឋទាំងអស់អោយកាន់តែល្អប្រសើរឡើងថែមទៀត ។

ឯកឧត្តមសាស្រ្តាចារ្យ បានថ្លែងអំណរគុណនិង កោតសរសើរ ការខិតខំប្រឹងប្រែងបំពេញភារកិច្ចរបស់ថ្នាក់ដឹកនាំ និងមន្រ្តី បុគ្គលិករបស់មន្ទីរពេទ្យ នាពេលកន្លងមក ដែលធ្វើឱ្យមន្ទីរពេទ្យនេះ មានការប្រែប្រួលរីកចម្រើនគួរជាទីមោទនៈ ទទួលបានការគាំទ្រពីសាធារណជន ដែលអញ្ជើញមកទទួលសេវាយ៉ាងច្រើនកុះករ ។

ឯកឧត្តមសាស្រ្តាចារ្យ ឡឹម តារា ក៏បានផ្តល់ជាយោបល់ និងគំនិតមួយចំនួនបន្ថែមទៀតដល់ថ្នាក់ដឹកនាំមន្ទីរពេទ្យ (ដែលមានការចូលរួមចាប់តាំងពីលោកនាយក រហូតដល់លោក លោកស្រីប្រធាន និងអនុប្រធានការិយាល័យ) ដើម្បីអនុវត្តការងារកែទម្រង់អង្គភាព ពង្រឹង និងពង្រីកការផ្តល់សេវាថែទាំព្យាបាលជូនប្រជាពលរដ្ឋទូទៅឱ្យកាន់តែមានប្រសិទ្ធភាព សុវត្ថិភាព ប្រកបដោយក្រមសីលធម៏វិជ្ជាជីវៈល្អប្រពៃ ដើម្បីចូលរួមចំណែកសម្រេចបាននូវយុទ្ធសាស្រ្តអាទិភាពរបស់ក្រសួងសុខាភិបាល និងគោលនយោបាយបញ្ចកោណដំណាក់កាលទី១ និងផែនទីបង្ហាញផ្លូវរបស់រាជរដ្ឋាភិបាលក្នុងការឈានឆ្ពោះទៅរកការគ្របដណ្តប់សុខភាពជាសកលឆ្នាំ២០៣៥ខាងមុខនេះ ៕