ឯកឧត្តម ឆាយ ឫទ្ធិសែន អញ្ជើញជាអធិបតីក្នុងពិធីមីទ្ទីញអបអរសាទរខួបលើកទី៧៣ ថ្ងៃកំណើតគណបក្សប្រជាជនកម្ពុជា នៅស្រុកសាមគ្គីមានជ័យ និងស្រុកទឹកផុស

ភ្នំពេញ៖ នាព្រឹកថ្ងៃអាទិត្យ ៩រោច ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៣០ ខែមិថុនា ឆ្នាំ២០២៤ ឯកឧត្តម ឆាយ ឫទ្ធិសែន សមាជិកគណៈកម្មាធិការកណ្តាលគណបក្សប្រជាជនកម្ពុជា អនុប្រធានទី១ ក្រុមការងាររគណបក្សចុះមូលដ្ឋានខេត្តកំពង់ឆ្នាំង និងប្រធានក្រុមការងារថ្នាក់កណ្ដាលចុះមូលដ្ឋានស្រុកសាមគ្គីមានជ័យ និងស្រុកទឹកផុស បានអញ្ជើញជាអធិបតីក្នុងពិធីមីទ្ទីញអបអរសាទរខួបលើកទី៧៣ ថ្ងៃកំណើតគណបក្សប្រជាជនកម្ពុជា (២៨ មិថុនា ១៩៥១-២៨ មិថុនា ២០២៤) នៅស្រុកសាមគ្គីមានជ័យ និងស្រុកទឹកផុស ខេត្តកំពង់ឆ្នាំង ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ប្រធាន អនុប្រធាន សមាជិក សមាជិកា ថ្នាក់កណ្ដាល ថ្នាក់មូលដ្ឋាន ស្រុកសាមគ្គីមានជ័យ និងស្រុកទឹកផុសសរុបជិត ៥០០រូប។

បន្ទាប់ពីបានស្ដាប់ការអានសុន្ទរកថាទាំងស្រុងរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ដោយលោកប្រធានគណៈកម្មាធិការគណបក្ស និងចំណាប់អារម្មណ៍ ការប្ដេជ្ញាចិត្តរបស់តំណាងអង្គមីទ្ទីញនៃស្រុកទាំងពីររួចមក ឯកឧត្តម ឆាយ ឫទ្ធិសែន បានពាំនាំនូវប្រសាសន៍ផ្ដាំផ្ញើសួរសុខទុក្ខប្រកបដោយមនោសញ្ចេតនា សេចក្តីស្រលាញ់យ៉ាងជ្រាលជ្រៅ សេចក្តីនឹករឭក និងពរសព្ទសាធុការពីសំណាក់ សម្ដេចអគ្គមហាសេនាបតីតេជោ ហ៊ុន សែន បិតាស្ថាបនិកសន្ដិភាពប្រធានគណបក្សប្រជាជនកម្ពុជា, សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្ស, និងសម្ដេចមហាបវរធិបតី ហ៊ុន ម៉ាណែត អនុប្រធានគណបក្សជូនដល់អង្គពិធីទាំងមូល។

ក្នុងឱកាសនោះ ឯកឧត្តមប្រធានក្រុមការងារ បានផ្ដល់អនុសាសន៍បន្ថែមដូចខាងក្រោម៖

-សមាជិក សមាជិកាទាំងអស់ត្រូវយកស្មារតី និងអនុសាសន៍នៃសេចក្តីថ្លែងការសម្ដេចតេជោ ហ៊ុន សែន ប្រធានគណបក្ស ទៅអនុវត្តឱ្យបានជោគជ័យ ចេញជាលទ្ធផលជាក់ស្តែងនៅតាមមូលដ្ឋានរបស់ខ្លួន។

-សមាជិក និងថ្នាក់ដឹកនាំមូលដ្ឋានត្រូវរួមគ្នាថែរក្សា ការពារឱ្យបានគង់វង្ស នូវសុខសន្តិភាពទោះក្នុងតម្លៃណាក៏ដោយ ដើម្បីចូលរួមអភិវឌ្ឍន៍ប្រទេសជាតិមានការរីកចម្រើនលើគ្រប់វិស័យ តាមរយៈការចូលរួមអនុវត្តគោលនយោបាយភូមិ ឃុំ សង្កាត់មានសុវត្ថិភាព, ការកម្ចាត់ចោលនយោបាយនិងចលនាជ្រុលនិយមរួមទាំងចលនាបដិវត្តន៍ពណ៌នានាផងដែរ។

-ត្រូវខិតខំផ្សព្វផ្សាយស្នាដៃរបស់បក្ស និងថែរក្សាសមិទ្ធផលដែលកសាងរួច និងត្រូវខិតខំកសាងសមិទ្ធផលថ្មីៗបន្ថែមទៀត តាមរយៈការអនុវត្តគោលនយោបាយរបស់គណបក្សដើម្បីសម្រេចចក្ខុវិស័យកម្ពុជាជាប្រទេសមានប្រាក់ចំណូលមធ្យមកម្រិតខ្ពស់ឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

-ត្រូវខិតខំបន្តចិញ្ចឹមចលនាដូចភ្លៀងរលឹម និងពង្រឹងពង្រីកសមាជិកគណបក្ស តាមរយៈការអនុវត្តនយោបាយ សតិអារម្មណ៍ ចាត់តាំង និងអភិក្រមការងារសមូហភាពដឹកនាំម្នាក់ៗទទួលខុសត្រូវ។

បន្ទាប់ពីបានប្រារព្ធមីទ្ទីញគណបក្សរួច ក្នុងនាមប្រធានក្រុមការងារគណបក្សចុះមូលដ្ឋានស្រុក ឯកឧត្តមប្រធាន និងក្រុមការងារអមដំណើរ បានអញ្ជើញចុះត្រួតពិនិត្យស្ថានភាពការងារមូលដ្ឋានមួយចំនួនដូចខាងក្រោម៖

-ពិនិត្យខ្សែផ្លូវល្បាយក្រួស ១ខ្សែ ប្រវែង ១៧០០ម៉ែត្រ ទទឹង ៥ម៉ែត្រ ស្ថិតនៅភូមិ ត្បែងខ្ពស់ ឃុំតាំងក្រសាំង ស្រុកទឹកផុស ជាគម្រោងសាកល្បងប្រើប្រាស់ទឹកថ្នាំពង្រឹងគុណភាពផ្លូវ(stabilizer)របស់ក្រុមហ៊ុន Greenway ដោយសហការជាមួយអាជ្ញាធរមូលដ្ឋាន ហើយគ្រោងនឹងបើកការដ្ឋាននាពេលខាងមុខ។

-ពិនិត្យវឌ្ឍនភាពការងារសាងសង់ផ្ទះសំណាញ់សម្រាប់ដាំដុះបន្លែ និងជាមជ្ឈមណ្ឌលបណ្តុះបណ្តាលសហគមន៍គំរូជូនប្រជាកសិករ ១កន្លែង ទទឹង ១០ម៉ែត្រ និងបណ្ដោយ ២០ម៉ែត្រ ស្ថិតនៅក្នុងស្នាក់ការគណបក្សឃុំតាំងក្រសាំង ដែលបានស្ថាបនាសម្រេចបាន១០០%។

-ពិនិត្យស្រះទឹកសហគមន៍ ១កន្លែង មានបណ្ដោយ ៥០ម៉ែត្រ និងទទឹង៤០ម៉ែត្រ ដែលបានជីករួចរាល់ជាស្ថាពរ ស្ថិតនៅភូមិក្រាំងស្គារ ឃុំក្រាំងស្គារ ស្រុកទឹកផុស។

-ពិនិត្យវឌ្ឍនភាពការសាងសង់អគារប្រជុំស្នាក់ការគណបក្ស ដែលមានបណ្ដោយ ២២,៩ម៉ែត្រ និងទទឹង ៩,៥ម៉ែត្រ និងការជួសជុលស្នាក់ការចាស់គណបក្ស នៅស្នាក់ការគណបក្សឃុំក្រាំងស្គារ ទើបនឹងបញ្ចប់ជាស្ថាពរ។

នាឱកាសនោះ ឯកឧត្តមប្រធានក្រុមការងារ ក៏បានអញ្ជើញជួបសំណេះសំណាល និងសាកសួរសុខទុក្ខជាមួយបងប្អូនប្រជាពលរដ្ឋនៅក្នុងមូលដ្ឋាន ដោយបានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ប្រកបដោយសេចក្តីនឹករលឹក និងអំណោយដ៏ថ្លៃថ្លារបស់ សម្ដេចតេជោ ហ៊ុន សែន បិតាស្ថាបនិកសន្ដិភាព និងជាប្រធានគណបក្សប្រជាជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចពញាចក្រី ហេង សំរិន ប្រធានកិត្តិយសគណបក្ស, និងសម្ដេចមហាបវរធិបតី ហ៊ុន ម៉ាណែត អនុប្រធានគណបក្ស និងលោកជំទាវបណ្ឌិត ជូនដល់បងប្អូនប្រជាពលរដ្ឋទាំងអស់ផងដែរ។

ឯកឧត្តមប្រធាន បានមានប្រសាសន៍ថា សុខទុក្ខរបស់ប្រជាជន គឺការទទួលខុសត្រូវរបស់សម្ដេច ដែលជាប្រមុខដឹកនាំរាជរដ្ឋាភិបាល ដែលបានខិតខំថែរក្សា ការពារ អភិវឌ្ឍសមិទ្ធផលគ្រប់វិស័យ ក្រោមម្លប់សុខសន្ដិភាពពេញលេញ ៕