មន្ត្រីជាន់ខ្ពស់ក្រសួងធនធានទឹក ដឹកនាំកិច្ចប្រជុំពិភាក្សាការងារជាមួយគណៈប្រតិភូដៃគូអភិវឌ្ឍន៍អូស្ត្រាលី និងធនាគារពិភពលោក
ភ្នំពេញ៖ នៅសាលប្រជុំ នៃគណៈកម្មាធិការជាតិទន្លេមេគង្គកម្ពុជា នាព្រឹកថ្ងៃព្រហស្បតិ៍ ៦រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៧ ខែមិថុនា ឆ្នាំ២០២៤ នេះ ឯកឧត្តមបណ្ឌិត អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម តំណាងដ៏ខ្ពង់ខ្ពស់របស់ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម ប្រធានគណ:កម្មាធិការជាតិទន្លេមេគង្គកម្ពុជា និងជាប្រធានអាជ្ញាធរទន្លេសាប បានអញ្ជើញដឹកនាំកិច្ចប្រជុំពិភាក្សាការងារជាមួយគណៈប្រតិភូដៃគូអភិវឌ្ឍន៍អូស្ត្រាលី និងធនាគារពិភពលោក (WB)។
សូមជម្រាបថា កិច្ចប្រជុំនាពេលនេះមានការចូលរួមពីឯកឧត្តម ហ៊ែល តូនី អនុប្រធានក្ដាប់រួមអាជ្ញាធរទន្លេសាប និងលោក លោកស្រីជាមន្រ្តីមកពីនាយកដ្ឋានពាក់ព័ន្ធនៃក្រសួងធនធានទឹក និងឧតុនិយម អគ្គលេខាធិការដ្ឋានគណៈកម្មាធិការជាតិទន្លេមេគង្គកម្ពុជា ព្រមទាំងលោក លោកស្រី តំណាងដៃគូអភិវឌ្ឍន៍មកពីស្ថានទូតអូស្រ្តាលី តំណាងក្រសួងការបរទេស និងពាណិជ្ជកម្មអូស្រ្តាលី ភាពជាដៃគូទឹកអូស្ត្រាលី និងធានាគារពិភពលោកជាច្រើនរូបផងដែរ។
ឯកឧត្តមរដ្ឋលេខាធិការបានបញ្ជាក់ថា គោលបំណងនៃកិច្ចប្រជុំ គឺដើម្បីស្តាប់ និងពិភាក្សាលើសេចក្តីព្រាងគំនិតគោលនៃសមាសធាតុទី១ នៃកម្មវិធីដែលមានសក្តានុពលសម្រាប់ដោះស្រាយបញ្ហាប្រឈមក្នុងការគ្រប់គ្រង និងការអភិវឌ្ឍធនធានទឹកក្នុងលក្ខខណ្ឌនៃការផ្លាស់ប្តូរអាកាសធាតុនៅកម្ពុជា ជាពិសេសការតាមដាន និងការគ្រប់គ្រងអាងបឹងទន្លេសាបឱ្យមានប្រសិទ្ធភាព និងនិរន្តរភាព។
ជាលទ្ធផល ឯកឧត្តមរដ្ឋលេខាធិការបានឱ្យដឹងថា កិច្ចប្រជុំបានឯកភាពលើគំនិតគោលនៃសមាសធាតុទី១នៃកម្មវិធី និងបានស្នើឱ្យបង្កើតក្រុមការងារមួយដែលមានសមាសភាពមកពីនាយកដ្ឋានពាក់ព័ន្ធនៃក្រសួងធនធានទឹក និងឧតុនិយម អាជ្ញាធរទន្លេសាប គណៈកម្មាធិការជាតិទន្លេមេគង្គកម្ពុជា តំណាងដៃគូអភិវឌ្ឍន៍មកពីស្ថានទូតអូស្រ្តាលី និងធានាគារពិភពលោក ដើម្បីពិភាក្សាលើលក្ខខណ្ឌការងារលម្អិតសម្រាប់រៀបចំសមាសធាតុទី១ នៃកម្មវិធី ៕
