ដំណើរទស្សនកិច្ចផ្លូវការ របស់សម្តេចមហាបវរធិបតី ហ៊ុន ម៉ាណែត នៅសាធារណរដ្ឋសិង្ហបុរី ទទួលបានលទ្ធផលប្រកបដោយផ្លែផ្កា
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ចប់ទស្សនកិច្ចផ្លូវការរយៈពេល ២ថ្ងៃ នៅសាធារណរដ្ឋសិង្ហបុរី ពីថ្ងៃទី១៨ ដល់ថ្ងៃទី១៩ ខែមិថុនា ឆ្នាំ២០២៤ ដោយភាគីទាំងពីរបានបញ្ជាក់សាជាថ្មីនូវការប្តេជ្ញាដ៏មុតមាំក្នុងការធ្វើឱ្យកាន់តែស៊ីជម្រៅបន្ថែមទៀតនូវទំនាក់ទំនងដ៏យូរអង្វែង និងកិច្ចសហប្រតិបត្តិការជិតស្និទ្ធលើគ្រប់វិស័យ។
ក្នុងឱកាសនោះសម្តេចធិបតីនាយករដ្ឋមន្ត្រី បានអញ្ជើញជួបសម្តែងការគួរសមជាមួយឯកឧត្តម ថាមេន
ស្ហ្សានមូហ្គារ៉ាត់ណាម (Tharman SHANMUGARATNAM) ប្រធានាធិបតីនៃសាធារណរដ្ឋសិង្ហបុរី នៅមុនជំនួបទ្វេភាគីជាមួយឯកឧត្តមនាយករដ្ឋមន្ត្រី ឡរ៉េន វ៉ុង (Lawrence WONG)។ សម្តេចធិបតីក៏បានជួបជាមួយឯកឧត្តមទេសរដ្ឋមន្រ្តី លី សៀនលុង (LEE Hsien Loong) អតីតនាយករដ្ឋមន្ត្រីសិង្ហបុរីផងដែរ។ កិច្ចពិភាក្សាប្រកបដោយអត្ថន័យទាំងនេះ គ្របដណ្តប់លើវិស័យជាច្រើន រួមមាន សន្តិសុខនយោបាយ ការពារជាតិ ពាណិជ្ជកម្ម និងការវិនិយោគ ហិរញ្ញវត្ថុ សន្តិសុខស្បៀង និងថាមពល ការប្រែប្រួលអាកាសធាតុ ទេសចរណ៍ ការអប់រំបណ្តុះបណ្តាលបច្ចេកទេស និងវិជ្ជាជីវៈ (TVET) ឌីជីថលូបនីយកម្ម និងការផ្លាស់ប្តូររវាងប្រជាជន និងប្រជាជន។ សម្តេចធិបតីនាយករដ្ឋមន្ត្រី និងថ្នាក់ដឹកនាំសិង្ហបុរីបានរំលឹកឡើងវិញនូវមិត្តភាពរវាង ព្រះករុណា ព្រះវររាជបិតា ព្រះបរមរតនកោដ្ឋ និងអតីតនាយករដ្ឋមន្ត្រី លី ក្វាន់យូ (LEE Kuan Yew) ខណៈប្រទេសទាំងពីរត្រៀមប្រារព្ធ
ខួបអនុស្សាវរីយ៍លើកទី៦០នៃការបង្កើតទំនាក់ទំនងការទូតនៅឆ្នាំក្រោយ។ ថ្នាក់ដឹកនាំសិង្ហបុរី បានផ្តាំផ្ញើថ្វាយព្រះពរសព្វសាធុការ នៅក្នុងឱកាសព្រះរាជពិធីបុណ្យចម្រើនព្រះជន្ម សម្តេចព្រះមហាក្សត្រី នរោត្តម មុនិនាថ សីហនុ នៅថ្ងៃទី១៨ ខែមិថុនា។
ដើម្បីធ្វើឱ្យកាន់តែស៊ីជម្រៅ និងពង្រីកវិសាលភាពនៃកិច្ចសហប្រតិបត្តិការទ្វេភាគី សម្តេចធិបតី ហ៊ុន ម៉ាណែត និងនាយករដ្ឋមន្រ្តី ឡរ៉េន វ៉ុង បានឯកភាពឱ្យមានការរៀបចំក្នុងពេលឆាប់ៗ កិច្ចពិគ្រោះយោបល់នយោបាយលើកទី២ រវាងក្រសួងការបរទេសនៃប្រទេសទាំងពីរ។ នាយករដ្ឋមន្រ្តីទាំងពីរ បានសម្តែងនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការបន្ថែមទៀត ក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ដូចជាការឆបោកតាមប្រព័ន្ធអ៊ីនធឺណិត ការផ្សព្វផ្សាយព័ត៌មានក្លែងក្លាយ និងការជួញដូរគ្រឿងញៀន និងទន្ទឹងរង់ចាំការចុះហត្ថលេខាក្នុងពេលឆាប់ៗលើអនុស្សរណៈនៃការយោគយល់ ដើម្បីពង្រឹងកិច្ចសហការនៅក្នុងវិស័យនេះ។ នាយករដ្ឋមន្ត្រីទាំងពីរ ក៏បានមូលមតិគ្នា ក្នុងការបន្តការផ្លាស់ប្តូរទស្សនកិច្ចរវាងមន្រ្តីយោធា ការចែករំលែកព័ត៌មាន បទពិសោធន៍ និងឧត្តមានុវត្ត។
ដើម្បីជំរុញពាណិជ្ជកម្ម និងការវិនិយោគ សម្តេចធិបតី ហ៊ុន ម៉ាណែត និង នាយករដ្ឋមន្ត្រី ឡរ៉េន វ៉ុង បានគូសបញ្ជាក់ថាសិង្ហបុរីស្ថិតក្នុងចំណោមវិនិយោគិនធំជាងគេនៅកម្ពុជា ខណៈសេដ្ឋកិច្ចប្រទេសទាំងពីរមានលក្ខណៈបំពេញបន្ថែមឱ្យគ្នាទៅវិញទៅមក។ នាយករដ្ឋមន្ត្រីទាំងពីរ បានឯកភាពជំរុញស្ថាប័នសាធារណៈ និងឯកជនពាក់ព័ន្ធនៃប្រទេសទាំងពីរ ឱ្យរួមគ្នាកំណត់វិស័យសក្តានុ-ពលនានាសម្រាប់កិច្ចសហប្រតិបត្តិការឈ្នះ-ឈ្នះ ដោយចាប់ផ្តើមពីការផលិត និងការផ្គត់ផ្គង់ស្បៀងអាហារ។
ចំពោះការផ្លាស់ប្តូររវាងប្រជាជន និងប្រជាជន សម្តេចធិបតី ហ៊ុន ម៉ាណែត និង នាយករដ្ឋមន្រ្តី ឡរ៉េន វ៉ុង បានសម្តែងនូវការពេញចិត្តចំពោះការកើនឡើងនៃជើងហោះហើរត្រង់ដល់ចំនួន ៥០ ជើងក្នុងមួយសប្តាហ៍ និងការកើនឡើងនៃចំនួនអ្នកធ្វើដំណើររវាងប្រទេសទាំងពីរ។ នាយករដ្ឋមន្ត្រីទាំងពីរមានទស្សនៈរួម ថាការជំរុញរំហូរទេសចរ រួមទាំងទេសចរពីប្រទេសទីបី ជាវិស័យមួយទៀតដែលត្រូវពង្រឹង។ ចំពោះវិស័យអប់រំ នាយករដ្ឋមន្ត្រី ឡរ៉េន វ៉ុង បានសន្យាថានឹងផ្តល់ការគាំទ្របន្ថែមទៀតដល់ការកសាងសមត្ថភាពទៅតាមតម្រូវការរបស់កម្ពុជា រួមមានការបណ្តុះបណ្តាលគ្រូបង្គោលក្នុងវិស័យ TVET ផងដែរ។ សម្តេចធិបតីនាយករដ្ឋមន្ត្រី បានសម្តែងនូវអំណរគុណចំពោះរដ្ឋាភិបាលសិង្ហបុរី ដែលបានគាំទ្រដល់ការអភិវឌ្ឍមូលធនមនុស្សរបស់កម្ពុជា។
ក្នុងវិស័យថាមពល និងការប្រែប្រួលអាកាសធាតុ នាយករដ្ឋមន្រ្តីទាំងពីរ បានសាទរ
លទ្ធផលជាផ្លែផ្កានៃកិច្ចប្រជុំក្រុមការងារលើកទី១ ដែលមានរដ្ឋមន្ត្រីថាមពលនៃប្រទេសកម្ពុជា សិង្ហបុរី និងឡាវ ជាសហប្រធាន នៅថ្ងៃទី២៩ ខែឧសភា ឆ្នាំ២០២៤ ដើម្បីសម្រួលដល់ពាណិជ្ជកម្មអគ្គិសនីឆ្លងកាត់ព្រំដែន។ នាយករដ្ឋមន្ត្រីទាំងពីរ មានការតាំងចិត្តរួម ក្នុងការអនុវត្តគម្រោងនេះឱ្យបានជោគជ័យ ដើម្បីជំរុញការអភិវឌ្ឍបណ្តាញអគ្គិសនីអាស៊ាន (ASEAN Power Grid)។ ថ្នាក់ដឹកនាំទាំងពីរ បានកត់សម្គាល់ដោយពេញចិត្តពីវឌ្ឍនភាពនៃកិច្ចសហប្រតិបត្តិការឥណទានកាបូន ស្របតាមមាត្រា៦ នៃកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ និងទន្ទឹងរង់ចាំការចុះហត្ថលេខាលើកិច្ចព្រមព្រៀងអនុវត្តពាក់ព័ន្ធកិច្ចសហប្រតិបត្តិការនេះ ក្នុងពេលឆាប់ៗខាងមុខ។
នាយករដ្ឋមន្រ្តីទាំងពីរ បានសង្កត់ធ្ងន់អំពីសារសំខាន់កាន់តែខ្លាំងឡើងនៃកិច្ចសហប្រតិបត្តិការបច្ចេកវិទ្យាទូរគមនាគមន៍ព័ត៌មានវិទ្យា (ICT) និងបច្ចេកវិទ្យាឌីជីថល។ នាយករដ្ឋមន្រ្តីទាំងពីរ បានរួមគ្នាធ្វើជាសាក្សី និងអបអរសាទរចំពោះការដាក់ឱ្យដំណើរការជាផ្លូវការនូវគម្រោងច្រករបៀងតម្លាភាពហិរញ្ញវត្ថុ (FTC) រវាងធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី ក្នុងគោលបំណងបង្កើតហេដ្ឋារចនាសម្ព័ន្ធឌីជីថលគាំទ្រ ដើម្បីសម្រួលដល់ពាណិជ្ជកម្ម និងការទទួលបានហិរញ្ញប្បទានដល់សហគ្រាសធុនតូច និងមធ្យមនៅប្រទេសកម្ពុជា និងនៅប្រទេសសិង្ហបុរី។ ជាមួយគ្នានេះ នាយករដ្ឋមន្រ្តីទាំងពីរ បានស្វាគមន៍ការចុះហត្ថលេខាលើអនុស្សរណៈនៃការយោគយល់រវាងក្រសួង ប្រៃសណីយ៍ និងទូរគមនាគមន៍កម្ពុជា និងក្រសួងគមនាគមន៍ និងព័ត៌មានសិង្ហបុរី ស្តីពីកិច្ចសហប្រតិបត្តិការលើរដ្ឋាភិបាលឌីជីថល ក្នុងដំណើរទស្សនកិច្ចនេះ។
នាយករដ្ឋមន្ត្រីទាំងពីរ ក៏បានផ្លាស់ប្តូរទស្សនៈលើបញ្ហាតំបន់ និងអន្តរជាតិសំខាន់ៗដែលជាក្តីកង្វល់រួម។ ថ្នាក់ដឹកនាំទាំងពីរ មានទស្សនៈរួមថា ការរក្សាឯកភាព និងមជ្ឈភាពអាស៊ាន គឺជាកត្តាសំខាន់សម្រាប់សន្តិភាព ស្ថិរភាព និងវិបុលភាពក្នុងតំបន់ និងប្តេជ្ញាធ្វើការជិតស្និទ្ធជាមួយគ្នា ឆ្លងកាត់ភាពស្មុគស្មាញនៃភូមិសាស្រ្តនយោបាយ ដើម្បីធានាថា ឯកភាព និងមជ្ឈភាពអាស៊ាន នៅតែរឹងមាំ ហើយអាស៊ាននៅតែបន្តស្ថិតនៅលើមាគ៌ាអភិវឌ្ឍន៍។ នាយករដ្ឋមន្រ្តីទាំងពីរ ក៏បានគូសបញ្ជាក់អំពីភាពចាំបាច់បន្ទាន់ក្នុងការពន្លឿនបញ្ចប់នូវក្រមប្រតិបត្តិនៅសមុទ្រចិនខាងត្បូង។
ដោយមើលឃើញពីសារសំខាន់នៃការចូលរួមរបស់វិស័យឯកជន សម្តេចធិបតី បានអញ្ជើញថ្លែងសុន្ទរកថាក្នុងវេទិកាធុរកិច្ចកម្ពុជា-សិង្ហបុរី ដែលក្នុងឱកាសនោះ សម្តេចធិបតី បានលើកទឹកចិត្តដល់អ្នកចូលរួមប្រមាណ ៥០០នាក់ ឱ្យស្វែងរកឱកាសធុរកិច្ចនៅកម្ពុជា និងធ្វើការវិនិយោគរួមគ្នាឈ្នះ-ឈ្នះក្នុងវិស័យនានា។ សម្តេចធិបតី បានអញ្ជើញទស្សនាវិទ្យាស្ថានពហុបច្ចេកវិទ្យាណានយ៉ាង និងមជ្ឈមណ្ឌលនវានុវត្តន៍អេឡិចត្រូនិក និងអ៊ីនធឺណិត និងទស្សនាអគារហេដ្ឋារចនាសម័្ពន្ធរបស់ក្រុមហ៊ុនកាភែល (Kappel’s Infrastructure@Changi)។ ក្នុងថ្ងៃទីមួយនៃទស្សនកិច្ច សម្តេចធិបតីនាយករដ្ឋមន្រ្តី បានអញ្ជើញទស្សនាសួនអ័រគីដេជាតិ ដែលផ្កាអ័រគីដេបង្កាត់ពូជថ្មីមួយត្រូវបានដាក់ឈ្មោះ វ៉ាន់ឈ័នថេ ហ៊ុន ម៉ាណែត ដើម្បីជាកិត្តិយសគោរពជូនសម្តេចធិបតី។
សម្តេចធិបតីនាយករដ្ឋមន្រ្តី បានសម្តែងនូវអំណរគុណយ៉ាងជ្រាលជ្រៅចំពោះ ឯកឧត្តម ឡរ៉េន វ៉ុង ដែលបានផ្តល់បដិសណ្ឋារកិច្ចដ៏កក់ក្តៅជូនគណៈប្រតិភូកម្ពុជា និងបានអញ្ជើញ ឯកឧត្តម ឡរ៉េន វ៉ុង បំពេញទស្សនកិច្ចផ្លូវការនៅកម្ពុជានាពេលឆាប់ៗ ដែល ឯកឧត្តម ឡរ៉េន វ៉ុង បានទទួលយកដោយក្តីរីករាយ។
ខាងក្រោមនេះជាអត្ថបទសំខាន់នៃដំណើរទស្សនកិច្ចផ្លូវការ របស់សម្ដេចធិបតី ហ៊ុន ម៉ាណែត នៅសិង្ហបុរី៖
១.កម្ពុជា និងសិង្ហបុរី ឯកភាពក្នុងការជំរុញកិច្ចសហប្រតិបតិ្តការឱ្យកាន់តែរឹងមាំ និងប្រកបដោយវិបុលភាព
https://www.hotnews-asia.com/detail/329495
២.ប្រធានាធិបតីសិង្ហបុរី បង្ហាញសុទិដ្ឋិនិយមថា សក្ដានុពលនៃធនធានមនុស្សវ័យក្មេងរបស់កម្ពុជា គឺជាកម្លាំងចលករនៃការជំរុញការអភិវឌ្ឍរបស់កម្ពុជាលើគ្រប់វិស័យ
https://www.hotnews-asia.com/detail/329519
៣.សម្ដេចមហាបវរធិបតី ហ៊ុន ម៉ាណែត អញ្ជើញចូលរួមជាអធិបតីក្នុងវេទិកាធុរកិច្ចកម្ពុជា-សិង្ហបុរី ដែលមានក្រុមហ៊ុន ៣៤៨ ចូលរួម
https://www.hotnews-asia.com/detail/329613
៤.សម្តេចធិបតី ហ៊ុន ម៉ាណែត ផ្តល់កិត្តិយសអញ្ជើញជាអធិបតី ក្នុងពិធីចុះអនុស្សរណៈយោគយល់គ្នា លើឯកសារចំនួន ៣
https://www.hotnews-asia.com/detail/329625
៥.កម្ពុជា និងសិង្ហបុរី មានសក្តានុពលក្នុងការពង្រីក កិច្ចសហប្រតិបត្តិការជាច្រើនបន្ថែមទៀត សម្រាប់ជាផលប្រយោជន៍នៃប្រទេសទាំងពីរ
https://www.hotnews-asia.com/detail/329769
៦.សម្តេចធិបតី ប្រកាសស្វាគមន៍យ៉ាងកក់ក្តៅចំពោះវិនិយោគិនសិង្ហបុរីទាំងអស់ ដើម្បីស្វែងយល់ពីឱកាសដ៏សម្បូរបែប នៅក្នុងទីផ្សារកម្ពុជា
https://www.hotnews-asia.com/detail/329883
៧.នាយករដ្ឋមន្រ្តីកម្ពុជា៖ វេទិកាធុរកិច្ចកម្ពុជា-សិង្ហបុរី បានដើរតួជាវេទិកាសំខាន់មួយ ដើម្បីជំរុញទំនាក់ទំនងកាន់តែស៊ីជម្រៅរវាងសហគមន៍អាជីវកម្ម និងបើកឱកាសដែលមានប្រយោជន៍ទៅវិញទៅមក
https://www.hotnews-asia.com/detail/329899
៨.សម្តេចធិបតី៖ ចំពោះការតភ្ជាប់ និងការអភិវឌ្ឍហេដ្ឋារចនាសម្ព័ន្ធ កំពុងពង្រឹងការតភ្ជាប់ក្នុងតំបន់ និងធានាឱ្យមានលទ្ធភាពចូលដំណើរការប្រកបដោយប្រសិទ្ធភាព ទៅកាន់ច្រករបៀងសេដ្ឋកិច្ចសំខាន់ៗនៅកម្ពុជា និងទូទាំងតំបន់
https://www.hotnews-asia.com/detail/329905
៩.សម្ដេចធិបតី៖ កម្ពុជាបានដាក់ចេញកម្មវិធីពិសេសជំរុញការវិនិយោគនៅខេត្តព្រះសីហនុឆ្នាំ២០២៤ ដោយផ្តល់អត្ថប្រយោជន៍ពិសេសដល់វិនិយោគិន
https://www.hotnews-asia.com/detail/329908
១០.សម្តេចធិបតី៖ សិង្ហបុរីបានក្លាយជាដៃគូពាណិជ្ជកម្ម និងវិនិយោគកំពូលមួយរបស់កម្ពុជា
https://www.hotnews-asia.com/detail/329913
១១.សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចនៅអគារហេដ្ឋារចនាសម្ព័ន្ធ របស់ក្រុមហ៊ុន Keppel
https://www.hotnews-asia.com/detail/329925
១២.សម្តេចធិបតី ហ៊ុន ម៉ាណែត អញ្ជើញបំពេញទស្សនកិច្ចនៅវិទ្យាស្ថានពហុបច្ចេកទេសណានយ៉ាង
https://www.hotnews-asia.com/detail/329949
