ឯកឧត្តម សួស ប្រាថ្នា លើកពីកត្តាគន្លឹះសំខាន់ៗ ៣ ដើម្បីឱ្យយន្តការច្រកចេញចូលតែមួយ នៅរដ្ឋបាលថ្នាក់ក្រោមជាតិអាចអនុវត្តការងារ បានដោយរលូន និងទទួលបានជោគជ័យ ស្របតាមគោលការណ៍ និងនីតិវិធីជាធរមាន
ភ្នំពេញ៖ ក្នុងសន្និសីទសារព័ត៌មាន រៀបចំដោយក្រុមអ្នកនាំពាក្យក្រសួងមហាផ្ទៃ លើប្រធានបទប្រធានបទ «ការផ្តល់សេវាតាមយន្តការច្រកចេញចូលតែមួយ» កាលពីថ្ងៃទី១៤ ខែមិថុនា ឆ្នាំ២០២៤ ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ក្រសួងមហាផ្ទៃ បានថ្លែងឲ្យដឹងថា ដើម្បីឱ្យយន្តការច្រកចេញចូលតែមួយនៅរដ្ឋបាលថ្នាក់ក្រោមជាតិអាចអនុវត្តការងារ បានដោយរលូន និងទទួលបានជោគជ័យ ស្របតាមគោលការណ៍ និងនីតិវិធីជាធរមាន គឺ មានកត្តាគន្លឹះសំខាន់ៗ ចំនួន៣ រួមមាន៖
១. ក្រសួង ស្ថាប័ន៖ គួរបន្តផ្តល់កិច្ចសហការគាំទ្រ តាមរយៈការបណ្តុះបណ្តាលនិង ការកសាងសមត្ថភាពដល់ថ្នាក់ដឹកនាំនិងមន្ត្រីជំនាញរបស់រដ្ឋបាលថ្នាក់ក្រោមជាតិ អំពី បែបបទ និងនីតិវិធីបច្ចេកទេស សម្រាប់ការផ្តល់សេវាតាមវិស័យជំនាញនីមួយៗនៅអង្គភាព ច្រកចេញចូលតែមួយ ព្រមទាំងចូលរួមតាមដាន ត្រួតពិនិត្យ និងវាយតម្លៃលើការផ្តល់សេវា ទាំងនេះ សំដៅធានាថា រដ្ឋបាលថ្នាក់ក្រោមជាតិ អាចអនុវត្តបានត្រឹមត្រូវតាមគោលការណ៍ បែបបទ និងនីតិវិធីដែលបានកំណត់ប្រកបដោយប្រសិទ្ធភាព តម្លាភាព គណនេយ្យភាព និងបរិយាបន្ន។
២. ចំពោះមន្ត្រីផ្តល់សេវាតាមយន្តការច្រកចេញចូលតែមួយ៖
-ត្រូវសិក្សាស្វែងយល់ឱ្យបានច្បាស់លាស់អំពីលិខិតបទដ្ឋានពាក់ព័ន្ធនឹងការផ្តល់ សេវា ដើម្បីធានាប្រសិទ្ធភាពនៃការផ្តល់សេវាជូនប្រជាពលរដ្ឋ និងប្រកបដោយ តម្លាភាព ឆាប់រហ័ស និងឆ្លើយតបតាមតម្រូវការរបស់ប្រជាពលរដ្ឋ-ត្រូវផ្តោតការយកចិត្តទុកដាក់លើការរៀបចំទីកន្លែងផ្តល់សេវាឱ្យបានសមស្រប និងត្រូវមានភាពរួសរាយរាក់ទាក់បង្កភាពកក់ក្តៅដល់អ្នកមកទទួលសេវា ព្រមទាំង ត្រូវយកចិត្តទុកដាក់ផ្តល់សេវាជូនប្រជាពលរដ្ឋឱ្យបានឆាប់រហ័ស។ ទន្ទឹមនេះ ត្រូវពង្រឹងក្រមសីលធម៌វិជ្ជាជីវៈ ការទទួលខុសត្រូវ និងភាពស្អាតស្អំ ក្នុងការបម្រើ និងផ្តល់សេវាសាធារណៈជូនប្រជាពលរដ្ឋឱ្យបានល្អប្រសើរ។
-ត្រូវធ្វើការផ្សព្វផ្សាយអំពីសារៈប្រយោជន៍ និងតួនាទី ភារកិច្ចរបស់យន្តការច្រក ចេញចូលតែមួយដល់គ្រប់ភាគី អង្គភាព អាជ្ញាធរពាក់ព័ន្ធផ្សេងៗតាមគ្រប់ មធ្យោបាយ និងគ្រប់រូបភាព ដើម្បីបង្កើនការយល់ដឹងដល់ប្រជាពលរដ្ឋ និងអ្នក ពាក់ព័ន្ធ ឱ្យបានកាន់តែទូលំទូលាយ។
-ត្រូវខិតខំកសាងនិងអភិវឌ្ឍសមត្ថភាពរបស់ខ្លួនក្នុងការចូលរួមប្រើប្រាស់កម្មវិធី ព័ត៌មានវិទ្យាសម្រាប់គ្រប់គ្រង និងការផ្តល់សេវាតាមប្រព័ន្ធអនឡាញនៅគ្រប់អង្គ ភាពច្រកចេញចូលតែមួយរាជធានី ខេត្ត ដែលក្រសួងមហាផ្ទៃគ្រោងនឹងដាក់ឱ្យ អនុវត្តជាផ្លូវការនាពេលខាងមុខនេះ។
៣. ចំពោះប្រជាពលរដ្ឋ៖
-សូមអញ្ជើញមកស្នើសុំសេវាដោយផ្ទាល់នៅអង្គភាព ឬការិយាល័យច្រកចេញចូល តែមួយ ដើម្បីស្វែងយល់ពីការផ្តល់សេវាដោយផ្ទាល់
-ចៀសវាងការពឹងពាក់អ្នករត់ការ ដែលធ្វើឱ្យប្រជាពលរដ្ឋត្រូវខាតបង់ថវិកា
-ចូលរួមពិនិត្យ តាមដាន វាយតម្លៃ និងផ្តល់យោបល់ត្រលប់ក្នុងន័យស្ថាបនា ដើម្បី កែលម្អយន្តការផ្តល់សេវានេះឱ្យកាន់តែល្អប្រសើរបន្ថែមទៀត ៕
