រដ្ឋមន្ត្រីក្រសួងសេដ្ឋកិច្ចថា កម្ពុជារំពឹងកំណើនសេដ្ឋកិច្ចដល់៦ភាគរយនៅឆ្នាំ២០២៤នេះ កើនឡើងជាងឆ្នាំមុន
ភ្នំពេញ៖ សេដ្ឋកិច្ចរបស់ប្រទេសកម្ពុជា ត្រូវបានព្យាករថា នឹងសម្រេចបាននូវអត្រា៦ភាគរយនៅឆ្នាំ២០២៤ ពោលគឺកើនឡើងពី៥ភាគរយនៅឆ្នាំ២០២៣។ នេះបើតាម ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍កាលពីថ្ងៃពុធទី១២ ខែមិថុនា ឆ្នាំ២០២៤ ក្នុងអំឡុងពេលថ្លែងសុន្ទរកថា ក្នុងពិធីសម្ពោធស្ថានបេសកកម្មថ្មីរបស់ធនាគារអភិវឌ្ឍន៍អាស៊ីនៅរាជធានីភ្នំពេញ។
បើតាម ឯកឧត្តមឧបនាយករដ្ឋមន្ត្រី កំណើននេះ ត្រូវបានជំរុញដោយការងើបឡើងវិញនៃសេដ្ឋកិច្ចពិភពលោក ជាពិសេសជំរុញពីដៃគូពាណិជ្ជកម្មរបស់កម្ពុជា។ ឯកឧត្តមឧបនាយករដ្ឋមន្ត្រី បានបន្ថែមថា សកម្មភាពសេដ្ឋកិច្ចក្នុងស្រុកនៅតែបន្តមានស្ថិរភាព និងនិន្នាការវិជ្ជមាន គួបផ្សំនឹងការខិតខំប្រឹងប្រែងយ៉ាងម៉ឺងម៉ាត់របស់រាជរដ្ឋាភិបាល ក្នុងការលើកកម្ពស់ការអនុវត្តគោលនយោបាយ និងយុទ្ធសាស្ត្ររបស់ខ្លួន។
ឯកឧត្តមឧបនាយករដ្ឋមន្ត្រី បានកត់សម្គាល់ផងដែរ ពីលទ្ធផលសំខាន់ៗដែលកម្ពុជាសម្រេចបាន ក្នុងការធានាអធិបតេយ្យភាពជាតិ សណ្តាប់ធ្នាប់សង្គម សន្តិសុខ សុវត្ថិភាព និងស្ថិរភាពនយោបាយ ក៏ដូចជាការរក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ ក្នុងរយៈពេលពីរទសវត្សរ៍កន្លងមកនេះ។ កម្ពុជាបានផ្លាស់ប្ដូរមុខមាត់ថ្មី កសាងមូលដ្ឋានគ្រឹះដ៏រឹងមាំនៃសេដ្ឋកិច្ចជាតិសម្រាប់ការអភិវឌ្ឍ និងលើកកម្ពស់ជីវភាពរស់នៅរបស់ប្រជាពលរដ្ឋទូទាំងប្រទេស តាមរយៈការអភិវឌ្ឍជាបន្តបន្ទាប់នៃពាណិជ្ជកម្មអន្តរជាតិ ដោយផ្អែកលើគោលការណ៍ពហុភាគីនិយម។
កម្ពុជាបានទាក់ទាញការវិនិយោគផ្ទាល់ពីបរទេសកាន់តែច្រើនឡើង ដោយសារការកែលម្អបរិយាកាសធុរកិច្ច និងការវិនិយោគ ការអភិវឌ្ឍហេដ្ឋារចនាសម្ព័ន្ធរូបវន្ត ដូចជាផ្លូវ ស្ពាន ប្រឡាយ និងបណ្តាញអគ្គិសនី ព្រមទាំងការអភិវឌ្ឍធនធានមនុស្សជាបន្តបន្ទាប់។ ឯកឧត្តមឧបនាយករដ្ឋមន្ត្រី បានអះអាងថា កម្ពុជាកំពុងដើរលើផ្លូវដើម្បីទៅសម្រេចបាននូវគោលដៅក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។
សូមបញ្ជាក់ថា ការអត្ថាធិប្បាយរបស់ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន យ៉ាងដូច្នេះ ស្របពេលធនាគារពិភពលោកព្យាករថា កំណើនសេដ្ឋកិច្ចកម្ពុជានឹងកើនដល់៥,៨ភាគរយក្នុងឆ្នាំ២០២៤ និង៦,១ភាគរយក្នុងឆ្នាំ២០២៥ ជាមួយការរំពឹងទុកអំពីការកើនឡើងនូវការវិនិយោគហេដ្ឋារចនាសម្ពន្ធ និងអត្ថប្រយោជន៍ដែលនឹងកើតចេញពីកិច្ចព្រមព្រៀងពាណិជ្ជកម្មនានា ដែលកម្ពុជាមានជាមួយបណ្តាប្រទេសនៅក្នុងតំបន់ ៕
