គណបក្សហ៊្វុនស៊ិនប៉ិច ប្រកាសទទួលយកលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤

ភ្នំពេញ៖ ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច បានចេញសេចក្តីថ្លែងការណ៍ ប្រកាសទទួលស្គាល់លទ្ធផលបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង ស្រុក-ខណ្ឌ អាណត្តិទី៤ ឆ្នាំ២០២៤ កាលពីថ្ងៃទី២៦ ខែឧសភា ឆ្នាំ២០២៤ កន្លងទៅ។

យោងតាមរយៈសេចក្តីថ្លែងការណ៍គណបក្សហ្វ៊ុនស៉ិនប៉ិច បានបញ្ជាក់យ៉ាងថា ព្រះអង្គម្ចាស់ នរោត្តម ចក្រាវុធ សូមគោរពដឹងគុណ និងថ្លែងអំណរគុណយ៉ាងជ្រាល ជ្រៅបំផុត ជូនចំពោះសមាជិកសមាជិកាក្រុមប្រឹក្សាឃុំ-សង្កាត់ ដែលបានអញ្ជើញទៅបោះឆ្នោតជ្រើសរើស ក្រុមប្រឹក្សារាជធានី-ខេត្ត/ក្រុង ស្រុក-ខណ្ឌ អាណត្តិទី៤ នាថ្ងៃទី២៦ ខែឧសភា ឆ្នាំ២០២៤ កន្លងទៅនេះ។

លទ្ធផលនៃការបោះឆ្នោតជ្រើសរើសក្រុមប្រឹក្សានេះ គឺបានឆ្លុះបញ្ចាំងអំពីលទ្ធិ ប្រជាធិបតេយ្យ សេរី ពហុបក្ស ក្នុងបរិយាកាសល្អប្រសើររបស់គណបក្សនិមួយៗដែលបានចូលរួម ដូច្នេះគណបក្សរាជានិយម ហ៊្វុនស៊ិនប៉ិច សូមប្រកាសទទួលស្គាល់លទ្ធផល ដែលគណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសកាលពីថ្ងៃទី០៤ខែមិថុនា ឆ្នាំ២០២៤នេះ ។

គណបក្សហ៊្វុនស៊ិនប៉ិច ត្រៀមលក្ខណៈសម្បត្តិគ្រប់គ្រាន់ក្នុងការចូលរួមបោះឆ្នោតជ្រើសរើស ក្រុមប្រឹក្សាឃុំ-សង្កាត់ឆ្នាំ២០២៧ និងការបោះឆ្នោតសកលឆ្នាំ២០២៨ខាងមុខ ដោយយកចិត្តទុកដាក់ ខ្ពស់បំផុត ក្នុងការប្រើប្រាស់សំឡេងគាំទ្ររបស់ប្រជារាស្ត្រឱ្យបានត្រឹមត្រូវ ជៀសវាងយកបេះដូងនិងការគាំ ទ្រនេះ ធ្វើជាឈ្នាន់ក្នុងការវាយប្រហារ ឬហែកហួរអ្នកប្រជាធិបតេយ្យផ្សេងទៀត ដើម្បីតែផលប្រយោជន៍ បក្សពួកក្រុមខ្លួន។

គណបក្សរាជានិយម ដឹកនាំដោយ ព្រះអង្គម្ចាស់ នរោត្តម ចក្រាវុធ មាន ការប្ដេជ្ញាខ្ពស់ក្នុងការប្រមែប្រមូល និងបង្រួបបង្រួមអ្នកប្រជាធិបតេយ្យមកពីគ្រប់មជ្ឈដ្ឋាន ដើម្បីចូលរួម ជាមួយព្រះអង្គ ឱ្យក្លាយទៅកម្លាំងអ្នកប្រជាធិបតេយ្យដ៏មុតស្រួចមួយ សម្រាប់ចូលរួមការប្រកួតប្រជែង ដោយសេរី យុត្តិធម៌ តាមរយៈការបោះឆ្នោតនាពេលអនាគត៕