ក្រសួងសុខាភិបាល យកចិត្តទុកដាក់ពង្រឹងគុណភាពស័ក្តសិទ្ធិភាព និងសុវត្ថិភាពការផ្តល់សេវាសុខាភិបាលជូនប្រជាពលរដ្ឋទាំងផ្នែកសាធារណៈ និងឯកជន

ភ្នំពេញ៖ នៅព្រឹកថ្ងៃទី៦ ខែមិថុនា ឆ្នាំ២០២៤ ដោយមានការអនុញ្ញតដ៏ខ្ពង់ខ្ពស់ពី ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមសាស្រ្តាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានគណៈកម្មការជំនាញឯកទេស សម្រាប់ត្រួតពិនិត្យ និងតាមដានការអនុវត្តរបស់មូលដ្ឋានសុខាភិបាលឯកជន នៅព្រះរាជាណាចក្រកម្ពុជា និងឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល រួមជាមួយក្រុមការងារ បានចុះត្រួតពិនិត្យការបម្រើសេវានៅមន្ទីរពេទ្យឯកជន អ័រ ឃីត កោះពេជ្រ។

គោលបំណងនៃគណៈកម្មការជំនាញឯកទេស គឺដើម្បីពង្រឹងតាមដានត្រួតពិនិត្យសេវាសុខាភិបាលឯកជន ឱ្យមានគុណភាព សុវត្ថិភាពត្រឹមត្រូវតាមស្តង់ដានិយាមសុខាភិបាលតែមួយ និងក្លាយទៅជាដៃគូសហការល្អ ជាមួយវិស័យសាធារណៈ និងបំពេញឱ្យគ្នាទៅវិញទៅមកប្រកបដោយប្រសិទ្ធិភាពខ្ពស់។ ក្នុងនោះក្រសួងសុខាភិបាល បាននិងកំពុងខិតខំកែទម្រង់ និងពង្រឹងការអនុវត្តច្បាប់ បទប្បញ្ញត្តិ ដែលទាក់ទងការបម្រើសេវាសុខាភិបាលទាំងសាធារណៈ និងឯកជន ធ្វើយ៉ាងណាឱ្យទទួលបាន និងរក្សាបានប្រសិទ្ធិភាព ស័ក្តសិទ្ធិភាព សុវត្ថិភាព និងសមធម៌ជូនប្រជាពលរដ្ឋទូទៅ ស្របតាមគោលនយោបាយរបស់រាជរដ្ឋាភិបាលអាណត្តិទី៧ ដែលផ្តល់អាទិភាពសំខាន់លើវិស័យសុខាភិបាល។

គណៈកម្មការក្រសួងបានជម្រាបជូនភាគី មន្ទីរពេទ្យអំពីគោលការណ៍ និងគោលនយោបាយរបស់ក្រសួងសុខាភិបាល ពីលក្ខខណ្ឌច្បាប់បច្ចេកទេសស្តង់ដាររបស់មូលដ្ឋានផ្តល់សេវាឯកជន ទាំងហេដ្ឋារចនាសម្ព័ន្ធ សម្ភារៈ ឧបករណ៍វេជ្ជសាស្រ្ត អមវេជ្ជសាស្រ្ត ធនធានមនុស្ស និងផែនការការងារឱ្យបានសមស្របមានប្រសិទ្ធភាពខ្ពស់ និងក៏បានផ្តល់ជូនចំណុចមួយចំនួន ដែលត្រូវបំពេញបន្ថែម ដើម្បីឱ្យការអនុវត្ត ការងារបម្រើសេវារបស់ខ្លួនបានកាន់តែប្រសើរ ស្របតាមអនុលោមភាព និងស្តង់ដារបច្ចេកទេសប្រកបដោយក្រមសីលធម៌វិជ្ជាជីវៈសុខាភិបាល៕