សម្តេចធិបតី៖ កំពង់ផែពហុបំណងកំពត នឹងចូលរួមចំណែកក្លាយជាសរសៃឈាមដ៏សំខាន់ថ្មីមួយទៀត សម្រាប់ការដឹកជញ្ជូនតាមផ្លូវសមុទ្រកម្ពុជា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា កំពង់ផែពហុបំណងកំពតនឹងចូលរួមចំណែកក្លាយជាសរសៃឈាមដ៏សំខាន់ ថ្មីមួយទៀត សម្រាប់ការ ដឹកជញ្ជូនតាមផ្លូវសមុទ្រកម្ពុជា និងធ្វើឱ្យប្រសើរឡើងនូវសកម្មភាព ពាណិជ្ជកម្ម និង ការផ្លាស់ប្ដូរទំនិញ រួមទាំងជួយជំរុញកំណើនសេដ្ឋកិច្ចនៅខេត្តកំពត ក៏ដូចជាការអភិវឌ្ឍសង្គមសេដ្ឋកិច្ចកម្ពុជាផងដែរ។

សម្តេចធិបតី ហ៊ុន ម៉ាណែត បានថ្លែងយ៉ាងដូច្នេះ ក្នុងឱកាសដែលសម្តេចអញ្ជើញសម្ពោធបើកឱ្យប្រើប្រាស់ជាផ្លូវការកំពង់ផែពហុបំណងកំពត នាព្រឹកថ្ងៃទី៦ ខែមិថុនា ឆ្នាំ២០២៤នេះ។

ក្នុងឱកាសនោះ សម្តេចធិបតី ហ៊ុន ម៉ាណែត បានមានប្រសាសន៍ថា ក្នុងការចាប់ផ្តើមអភិវឌ្ឍដំបូង កំពង់ផែពហុបំណងកំពត មានឈ្មោះ “កំពង់ផែអន្តរជាតិកំពត” ដើម្បីធានា នូវភាពស្របច្បាប់ពេញលេញដោយអនុលោមតាមច្បាប់ស្តីពីការដឹកជញ្ជូនតាមផ្លូវទឹក និងភាពសមស្របទៅនឹងការប្រើឈ្មោះកំពង់ផែជាទូទៅនៅកម្ពុជា ក៏ដូចជា នៅតាមបណ្តាប្រទេសនានា លើពិភពលោក។

សម្តេចធិបតី នាយករដ្ឋមន្ត្រី បានបន្តថា បញ្ចៀសការភ័ន្តច្រឡំថា នៅខេត្តកំពត ឬនៅប្រទេសយើង មានកំពង់ផែអន្តរជាតិតែមួយគត់ ដែលបំពេញមុខងារសម្រាប់អនុញ្ញាតឱ្យនាវាសមុទ្របរទេសចូលចេញបាន ខ្ញុំក៏បានសម្រេចដាក់ចេញអនុក្រឹត្យផ្លាស់ប្ដូរឈ្មោះទៅជា “កំពង់ផែពហុបំណងកំពត” វិញ, ដោយបានកំណត់ គោលបំណងយ៉ាងច្បាស់របស់កំពង់ផែនេះ ក្នុងការបម្រើសេវាឱ្យនាវាដែលធ្វើនាវាចរណ៍ជាលក្ខណៈ អន្តរជាតិចូលចេញ, ផ្ទេរផ្ទុក, លើកដាក់ និង រក្សាទុកទំនិញជាកុងតឺន័រ ទំនិញទូទៅ និង អ្នកដំណើរ។

សម្តេចធិបតី បានបញ្ជាក់ថា ទោះបីជាកំពង់ផែពហុបំណងកំពត គឺជាការបោះទុនវិនិយោគដោយវិស័យឯកជនដែលមានក្រុមហ៊ុន កំពតផត ជាអង្គភាពគ្រប់គ្រងប្រតិបត្តិការអាជីវកម្ម និងទទួលបន្ទុកធ្វើទំនើបកម្មអភិវឌ្ឍកំពង់ផែនេះក៏ពិតមែន ក៏កំពង់ផែនេះ នឹងចូលរួមចំណែកក្លាយជាសរសៃឈាមដ៏សំខាន់ ថ្មីមួយទៀត សម្រាប់ការ ដឹកជញ្ជូនតាមផ្លូវសមុទ្រកម្ពុជា។

សូមបញ្ជាក់ថា វិស័យកំពង់ផែ គឺជាវិស័យអាទិភាពមួយ ក្នុងចំណោមវិស័យអាទិភាពនានា ដែលរាជរដ្ឋាភិបាល យកចិត្តទុកដាក់ជំរុញការអភិវឌ្ឍ ដោយយើងត្រូវខិតខំបន្តបង្កើនថវិកាវិនិយោគ និង កៀរគរហិរញ្ញប្បទាន ព្រមទាំងពង្រឹងប្រសិទ្ធភាពនៃការប្រើប្រាស់ ដើម្បីបន្តអភិវឌ្ឍហេដ្ឋារចនាសម្ព័ន្ធកំពង់ផែ ឱ្យកាន់ត រីកចម្រើនថែមទៀត។ ដោយឡែក កំពង់ផែពហុបំណងកំពតនេះ គឺត្រូវចាត់ទុកថា នឹងក្លាយជាកំពង់ផែទឹកជ្រៅមួយទៀតនៅកម្ពុជា និង ជាកំពង់ផែដ៏ទំនើប និងមានសារៈសំខាន់ ដែលជួយបំពេញបន្ថែមលើ មុខងាររបស់កំពង់ផែស្វយ័តក្រុងព្រះសីហនុ និង កំពង់ផែស្វយ័តភ្នំពេញ ៕