សម្ដេចមហាបវរធិបតី ព្រមានទុកជាមុន ដល់ក្រុមឆ្លៀតឱកាស ធ្វើឲ្យប៉ះពាល់ដល់គម្រោងព្រែកជីកហ្វូណនតេជោ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងព្រមមានទុកជាមុន ទៅដល់ក្រុមឆ្លៀតឱកាស ដូចជាក្រុមគួកជេរដី អ្នកដើរប្រមូលទិញដី និងទន្រ្ទានដីរដ្ឋ រួមទាំងអង្គការសង្គមស៊ីវិលមួយចំនួន ដែលចង់ធ្វើឲ្យប៉ះពាល់ ដល់គម្រោងសាងសង់ព្រែកជីកហ្វូណនតេជោ។

ក្នុងឱកាសអញ្ជើញសម្ពោធកំពង់ផែពហុបំណងខេត្តកំពត នាថ្ងៃទី៦ ខែមិថុនា ឆ្នាំ២០២៤ នៅក្រុងបូកគោ សម្ដេចធិបតី ហ៊ុន ម៉ាណែត បានមានប្រសាសន៍គូសបញ្ជាក់ថា
គម្រោងព្រែកជីកហ្វូណនតេជោ នឹងចាប់ផ្ដើមបើកការដ្ឋានសាងសង់ នៅថ្ងៃទី៥ ខែសីហា ឆ្នាំ២០២៤ខាងមុខ ខណៈគ្រោងនឹងចំណាយទឹកប្រាក់រហូតដល់ប្រមាណ ១,៧ ពាន់លានដុល្លារ ដោយត្រូវប្រើពេលវេលា៤ឆ្នាំ ដើម្បីសាងសង់បញ្ចប់គម្រោង ។

សម្ដេចធិបតីសង្កត់ធ្ងន់ថា «រឿងនេះជារឿងជាតិគម្រោងព្រះជីកហ្វូណនតេជោ គឺជាប្រយោជន៍ជាតិរបស់ប្រយោជន៍ យើងទាំងមូលដែលត្រូវតែធ្វើនិងត្រូវធ្វើឲ្យបាន។ កម្លាំងមួយចំនួនតូចគឺមិនអាចបំផ្លាញបានទេ»។

សម្ដេចមហាបវរធិបតី បានថ្លែងថា តាមការសិក្សាគឺមានតែប្រជាពលរដ្ឋប្រមាណជាង ១ពាន់គ្រួសារប៉ុណ្ណោះដែលប៉ះពាល់ពីគម្រោងព្រែកជីកនេះ ខណៈក៏ទទួលបានព័ត៌មានថា មានជនឆ្លៀតឱកាសមួយចំនួនបានដើរទិញដី ពីប្រជាពលរដ្ឋដែលនឹងអាចធ្វើឲ្យប៉ះពាល់ ទៅដល់គម្រោងពេលនឹងចាប់ផ្ដើមជីកនៅខែសីហាខាងមុខ។

សម្ដេចព្រមានថា កុំធ្វើឲ្យមានការរារាំងណាមួយ ទៅដល់គម្រោងនេះខណៈភស្តុតាង ងាយរកនោះទេដោយសារតែ បច្ចេកវិទ្យាពេលបច្ចុប្បន្នទំនើប ៕