ឧត្តមសេនីយ៍ទោ សោម ស៊ុន សំណេះសំណាលសាកសួរសុខទុក្ខ អតីតយុទ្ធជនពិការ ដោយសារសង្គ្រាម នៅឃុំក្រយា ស្រុកសន្ទុក
ភ្នំពេញ៖ កាលពីរសៀលថ្ងៃទី៥ ខែមិថុនា ឆ្នាំ២០២៤ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាប្រធានសមាគមអតីតយុទ្ធជនកម្ពុជាខេត្តកំពង់ធំ បានដឹកនាំសហការី ទៅសំណេះសំណាលសាកសួរសុខទុក្ខ ស្វែងយល់អំពីជីវភាពរស់នៅ របស់បងប្អូនអតីតយុទ្ធជនពិការ ដោយសារសង្គ្រាម កំពុងរស់នៅលើដីសម្បទានសង្គមកិច្ច ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន អតីតនាយករដ្ឋមន្ត្រី ប្រធានសមាគមអតីតយុទ្ធជនកម្ពុជា នៅឃុំក្រយា ស្រុកសន្ទុក ខេត្តកំពង់ធំ ។
លោកព្រិន្ទបាលឯក សំ ប៉ាន អាយុ ៦៥ឆ្នាំ អតីតយុទ្ធជនពិការ ដោយសារសង្គ្រាម បានបញ្ជាក់ថា ក្រោយពីបានទទួលដីសម្បទានសង្គមកិច្ចចំនួន១ហិកតាកន្លះ និងផ្ទះថ្មី ដែលមានអណ្ដូងទឹកស្អាត សម្រាប់ប្រើប្រាស់ មានផ្លូវលំខ្វាត់ខ្វែងនៅក្នុងភូមិ ដែលជាអំណោយដ៏ថ្លៃថ្លារបស់សម្ដេចតេជោ ហ៊ុន សែន គាត់បានខិតខំកសាងជីវភាពថ្មី ដោយបានដាំដុះដំណាំយូរអង្វែង និងដំណាំរួមផ្សំ ព្រមទាំងចិញ្ចឹមសត្វ មាន់ ទា សម្រាប់ដោះស្រាយជីវភាពក្នុងគ្រួសាររបស់គាត់បានល្អប្រសើរ។
ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះលោកព្រិន្ទបាលឯកសំ ប៉ាន និងភរិយាព្រមទាំងក្រុមគ្រួសារ ដែលបានខិតខំកសាងជីវភាពគ្រួសារ ដោយបានខិតខំប្រឹងប្រែងបង្កបង្កើនផលចិញ្ចឹមសត្វ ធ្វើឱ្យជីវភាពរស់នៅប្រចាំថ្ងៃបានធូរធារ គួបផ្សំនិងប្រាក់បៀវត្ស ដែលរាជរដ្ឋាភិបាលបានផ្ដល់ជូនប្រចាំខែ ផងដែរ។
ឧត្តមសេនីយ៍ទោ សោម ស៊ុន បានណែនាំដល់លោកតា សំ ប៉ាន និងភរិយា ព្រមទាំងកូនចៅទាំងអស់ ត្រូវខិតខំថែរក្សាសុខភាព និងបន្តការដាំដុះដំណាំបន្លែបង្ការផ្សេងៗ និងចិញ្ចឹមសត្វ ដើម្បីដោះស្រាយជីវភាពគ្រួសារ ឲ្យបានសមរម្យ នឹងត្រូវចូលរួមអនុវត្តឲ្យបានជោគជ័យ នូវខ្លឹមសារគោលនយោបាយភូមិឃុំ មានសុវត្ថិភាពរបស់រាជរដ្ឋាភិបាល។ ហើយនៅក្នុងឱកាសនេះ ឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្តកំពង់ធំ ក៏បានឧបត្ថម្ភថវិកាមួយចំនួន ជូនក្រុមគ្រួសារលោកតា សំ ប៉ាន ផងដែរ៕
