លោកជំទាវ សុវណ្ណ វណ្ណារតន៍ ដឹកនាំបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ ក្នុងខណ្ឌចំការមន

ភ្នំពេញ៖ លោកជំទាវ សុវណ្ណ វណ្ណារតន៍ អនុប្រធានទី១ ក្រុមការងារគណបក្សចុះមូលដ្ឋានខណ្ឌចំការមន តំណាងឯកឧត្តម ហេង សួរ ប្រធានក្រុមការងារគណបក្សចុះមូលដ្ឋានខណ្ឌចំការមន រួមជាមួយ លោកជំទាវ មុំ សណ្ដាប់ សមាជិកព្រឹទ្ធសភា និងលោកប្រធានគណៈកម្មាធិការគណបក្សខណ្ឌចំការមន បានអញ្ជើញចូលរួមពិធីបិទយុទ្ធនាការឃោសនាបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ អាណត្តិទី៤ ឆ្នាំ២០២៤ ដែលរៀបចំធ្វើនៅមុខសាលមហោស្រពកោះពេជ្រ រាជធានីភ្នំពេញ ដោយមានសមាជិក សមាជិកាចូលរួមសរុបប្រមាណ ៦០០នាក់។

លោកជំទាវ សុវណ្ណ វណ្ណារតន៍ បានគូសបញ្ជាក់ថា ការប្រារព្ធពិធីបិទយុទ្ធនាការឃោសនាបោះឆ្នោតនេះ ក្នុងគោលបំណងបង្ហាញឲ្យសាធារណជនឃើញពីសាមគ្គីភាព និងកម្លាំងប្រៀបឈ្នះដាច់ខាតរបស់គណបក្សប្រជាជនកម្ពុជាក្នុងម្លប់សុខសន្តិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងសម្ដេចធិបតី ហ៊ុន ម៉ាណែត ជាអនុប្រធានគណបក្ស និងជានាយករដ្ឋមន្រ្តីនៃកម្ពុជា។

លោកជំទាវ បានបញ្ជាក់ទៀតថា ការបោះឆ្នោតជ្រើសរើសក្រុមប្រឹក្សារាជធានី ខណ្ឌ អាណត្តិទី៤ ដែលនឹងប្រព្រឹត្តទៅនៅថ្ងៃទី២៦ ខែឧសភា ឆ្នាំ២០២៤ខាងមុខនេះ កាន់តែមានសារៈសំខាន់ និងជាព្រឹត្តិការណ៍ប្រវត្តិសាស្ត្រថ្មីមួយទៀតរបស់ប្រទេសកម្ពុជា។

ជាមួយគ្នានោះ លោកជំទាវ បានក្រើនរំលឹកដល់លោក លោកស្រី ដែលជាប្រធាន សមាជិក សមាជិកា ក្រុមប្រឹក្សាសង្កាត់ទាំង៥ ក្នុងខណ្ឌចំការមន ត្រូវត្រៀមលក្ខណៈសម្បត្តិ ថែរក្សាសុខភាព និងពិនិត្យឯកសារបម្រើឱ្យការបោះឆ្នោតឱ្យបានត្រឹមត្រូវ និងត្រូវចូលរួមបោះឆ្នោត ដើម្បីជ្រើសរើសក្រុមប្រឹក្សារាជធានី ក្រុមប្រឹក្សាខណ្ឌ អាណត្តិទី៤ នៅថ្ងៃទី២៦ ខែឧសភា ឆ្នាំ២០២៤ ខាងមុខនេះ ដើម្បីឱ្យគណបក្សប្រជាជនកម្ពុជាទទួលបានជ័យជំនះ សំដៅធានាបាននូវ សុខសន្តិភាព និងការអភិវឌ្ឍប្រទេសជាតិ ៕