ឯកឧត្តម ហ្សង់ ហ្រ្វង់ស្វ័រ តាន់៖ អ្នកវិនិយោគកូរ៉េ មើលឃើញកម្ពុជា ជាទិសដៅល្អជាងគេនៅអាស៊ានសម្រាប់ការវិនិយោគ

ភ្នំពេញ៖ ឯកឧត្តម ហ្សង់ ហ្រ្វង់ស្វ័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស និងសហប្រតិបត្តិការអន្តរជាតិ បានលើកឡើងថា អ្នកវិនិយោគកូរ៉េ មើលឃើញកម្ពុជា ជាទិសដៅល្អជាងគេនៅអាស៊ានសម្រាប់ការវិនិយោគ។

ឯកឧត្តម ហ្សង់ ហ្រ្វង់ស្វ័រ តាន់ បានលើកឡើងបែបនេះ នារាត្រីថ្ងៃទី១៨ ខែឧសភា ឆ្នាំ២០២៤ នៅក្នុងសន្និសីទសារព័ត៌មានស្តីពី ដំណើរអញ្ជើញទស្សនកិច្ចផ្លូវការ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅសាធារណរដ្ឋកូរ៉េ រយៈពេល៤ថ្ងៃ។

ឯកឧត្តម ហ្សង់ ហ្រ្វង់ស្វ័រ តាន់ បានលើកឡើងយ៉ាងដូច្នេះថា៖ ជាការពិតក្រុមហ៊ុនកូរ៉េ បានចូលមកដាក់ទុនរកស៊ីនៅកម្ពុជា ជាយូរឆ្នាំមកហើយ ប្រហែលចុងទសវត្សរ៍៩០ ប៉ុន្តែយ៉ាងណាក៏ដោយយើងចង់បានរលកថ្មីនៃការវិនិយោគរបស់កូរ៉េនៅកម្ពុជា ដោយទាក់ទាញជាអាទិ៍គឺសហគ្រាសធុនតូច និងធុនមធ្យមរបស់កូរ៉េ ព្រមទាំងឧស្សាហកម្មប្រើប្រាស់បច្ចេកវិទ្យាខ្ពស់សម្រាប់បម្រើការនាំចេញដូចជា៖ ឧស្សាហកម្មបង្គុំ និងដំឡើងរថយន្ត, ឧស្សាហកម្មអេឡិចត្រូនិច ឬក៏ឧស្សាហកម្មបរិក្ខារអគ្គិសនី និងគ្រឿងម៉ាស៊ីនជាដើម។

ឯកឧត្តមបានបន្តថា មានមូលហេតុដែលធ្វើឱ្យថ្នាក់ដឹកនាំនយោបាយ និងធុរជននៅកូរ៉េ យល់ឃើញថាកម្ពុជា ជាប្រទេសអំណោយផលដល់ការបង្កើតវិនិយោគនៅពេលនេះ មានមូលហេតុច្រើនរួមមាន៖

ទី១. គ្រប់ស្ថាប័នហិរញ្ញវត្ថុអន្តរជាតិ សុទ្ធតែបានព្យាករថានៅឆ្នាំ២០២៤នេះ កំណើនសេដ្ឋកិច្ចនៃប្រទេសកម្ពុជា នឹងមានកម្រិតខ្ពស់ជាងគេក្នុងចំណោមបណ្ដាប្រទេសអាស៊ានទាំង១០ ឬអាចលើស៦ភាគរយ។

ទី២. វិនិយោគិនកូរ៉េ សុទ្ធតែបានថ្លែងប្រាប់សម្តេចធិបតី ហ៊ុន ម៉ាណែត និងគណៈប្រតិភូអមដំណើរ នាំគ្នាពោលសរសើរពលករខ្មែរថា ស្វិតស្វាញ ស្លូតបូត មានចរិតល្អ និងមិនសំចៃកម្លាំង។ ទន្ទឹមនេះ ចៅកែកូរ៉េក៏អាចយល់ឃើញថានៅកម្ពុជាមានប្រជាជនក្មេងដែលមានថាមពល ហើយក៏អាចជំរុញទាកទង់ទាក់ទាញពួកគាត់ឲ្យមកដាក់ទុនរកស៊ីនៅកម្ពុជា។

ទី៣. អ្នកវិនិយោគទុន ត្រូវការស្ថិរភាពនយោបាយ និងសន្តិភាពយូរអង្វែង គហើយនៅក្នុងរយៈពេលប៉ុន្មានឆ្នាំចុងក្រោយនេះកម្ពុជាស្គាល់ស្ថិរភាពនយោបាយពិតប្រាកដ ហើយសន្តិភាពអាចនឹងមានលក្ខណៈយូរអង្វែងច្រើនឆ្នាំតទៅមុខ។

ទី៤. ប៉ុន្មានឆ្នាំចុងក្រោយនេះហេដ្ឋារចនាសម្ព័ន្ធសម្បូរបែបបានលេចចេញជារូបរាងនៅលើទឹកដីកម្ពុជា មានអាកាសយានដ្ឋានអន្តរជាតិថ្មីៗ ដូចជានៅខេត្តសៀមរាប និងរាជធានីភ្នំពេញ ផ្លូវល្បឿនលឿន ហើយនាពេលខាងមុខគឺ ព្រែកជីកហ្វូណនតេជោ។

ទី៥. ក្នុងគ្រានេះទឹកដីកម្ពុជាត្រូវបានគ្របដណ្ដប់ដោយការចូលជាធរមានសឹងដំណាលគ្នានៃកិច្ចព្រមព្រៀងពាណិជ្ជកម្មសេរី ដូចជាកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ, អាស៊ាន-កូរ៉េ និង RZ ៕