ឯកឧត្តមឧបនាយករដ្ឋមន្ត្រី ហ៊ុន ម៉ានី ដឹកនាំកិច្ចប្រជុំក្រុមប្រឹក្សាសាលាភូមិន្ទរដ្ឋបាល (ស.ភ.រ.) ជាលើកដំបូង

ភ្នំពេញ៖ ឯកឧត្តម ហ៊ុន​ ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានដឹកនាំកិច្ចប្រជុំក្រុមប្រឹក្សាសាលាភូមិន្ទរដ្ឋបាលជាលើកដំបូង នារសៀលថ្ងៃទី១៦ ខែឧសភា ឆ្នាំ២០២៤។

កិច្ចប្រជុំប្រព្រឹត្តទៅនៅសាលាភូមិន្ទរដ្ឋបាល ដោយមានការចូលរួមពីឯកឧត្តម លោកជំទាវ ជាសមាជិកស្វ័យប្រវត្តិ សមាជិក ដែលជាថ្នាក់ដឹកនាំជាន់ខ្ពស់នៃទីស្តីការគណៈរដ្ឋមន្ត្រី​ ក្រសួងសេដ្ឋកិច្ច និងហិរញ្ញវត្ថុ​ ក្រសួងអប់រំ យុវជន និងកីឡា ក្រសួងការបរទេស និងសហប្រតិបត្តិការអន្តរជាតិ ក្រសួងមហាផ្ទៃ និងសាស្ត្រាចារ្យឧត្តមសិក្សា ព្រមទាំងគណៈគ្រប់គ្រងសាលាភូមិន្ទរដ្ឋបាល។

ក្នុងកិច្ចប្រជុំ ឯកឧត្តមឧបនាយករដ្ឋមន្ត្រី បានមានប្រសាសន៍បើកកិច្ចប្រជុំ និងប្រកាសសមាសភាពក្រុមប្រឹក្សាសាលាភូមិន្ទរដ្ឋបាល ដែលដាក់ចេញដោយរាជរដ្ឋាភិបាលកម្ពុជា កាលពីថ្ងៃទី៤ ខែមករា ឆ្នាំ២០២៤។ ឆ្លៀតក្នុងឱកាសនេះ ឯកឧត្តមឧបនាយករដ្ឋមន្ត្រី បានរំលេចថា “ទោះបីជាកិច្ចប្រជុំនេះប្រព្រឹត្តទៅនៅក្នុងបន្ទប់តូចក៏ពិតមែន តែសមាសភាពដែលស្ថិតក្នុងបន្ទប់ដ៏តូចនេះពោរពេញដោយឆន្ទៈ ទឹកចិត្ត និងលទ្ធផលការងារដ៏ធំធេង ប្រកបដោយមនសិកាស្នេហាជាតិ”។

ឯកឧត្តមឧបនាយករដ្ឋមន្ត្រី បានអនុញ្ញាតឱ្យឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ នាយកសាលាភូមិន្ទរដ្ឋបាល និងជាសមាជិកស្វ័យប្រវត្តិរបស់ក្រុមប្រឹក្សាសាលាភូមិន្ទរដ្ឋបាល ធ្វើរបាយការណ៍សង្ខេបអំពីសកម្មភាពការងាររបស់សាលាភូមិន្ទរដ្ឋបាល រួមមាន៖ ១)-ការរៀបចំផែនការសកម្មភាព ឆ្នាំ២០២៤ និងវឌ្ឍនភាពការងារ ត្រីមាសទី១ ឆ្នាំ២០២៨ ២)-ការត្រៀមរៀបចំពិធីបិទវគ្គ ឆ្នាំ២០២៣ និងបើកវគ្គ ឆ្នាំ២០២៤ និង ៣)-ការរៀបចំវាយតម្លៃតម្រូវការសិស្សមន្ត្រីជាន់ខ្ពស់ និងសិស្សមន្ត្រីក្រមការ ឆ្នាំ២០២៤។

ក្នុងកិច្ចប្រជុំបានពិនិត្យ និងពិភាក្សាលើការងារខាងលើ ដោយ ឯកឧត្តមបណ្ឌិតសភាចារ្យ ឯកឧត្តមបណ្ឌិត ឯកឧត្តម លោកជំទាវ សមាជិកក្រុមប្រឹក្សាសាលាភូមិន្ទរដ្ឋបាល ដើម្បីប្រមូលមតិយោបល់ ដែលជាធាតុចូលសម្រាប់រៀបចំ និងកែសម្រួលស្ថានភាពការងារទៅមុខបន្តទៀត។

បន្ទាប់ពីបានស្តាប់របាយការណ៍សង្ខេប និងមតិជាធាតុចូលរបស់សមាជិកអង្គប្រជុំ រួចមក ឯកឧត្តមឧបនាយករដ្ឋមន្ត្រី បានមានប្រសាសន៍ណែនាំតម្រង់ទិសបន្ថែមទៅលើសិទ្ធអំណាច និងភារកិច្ចក្រុមប្រឹក្សាសាលាភូមិន្ទរដ្ឋបាល និងកំណត់របៀបរបបប្រជុំសាមញ្ញពីរដងក្នុងមួយឆ្នាំរៀងរាល់ត្រីមាសទី២ និងដើមត្រីមាសទី៤ នៃឆ្នាំនីមួយៗ ឬផ្អែកតាមការចាំបាច់ និងប្រជុំជាវិសាមញ្ញ តាមសំណើរបស់ប្រធានក្រុមប្រឹក្សា ស.ភ.រ ឬនាយក ស.ភ.រ. ឬសមាជិកចំនួនពីរភាគបីឡើងទៅ។

ឯកឧត្តមឧបនាយករដ្ឋមន្ត្រី បានបន្ថែមផងដែរថា “សមត្ថភាព វិជ្ជាជីវៈបច្ចេកទេស ពិតជាមានសារៈសំខាន់ក្នុងការអនុវត្តការងារ តែការផ្សាភ្ជាប់បំណិនទាំងនេះជាមួយមនសិការសេ្នហាជាតិ រឹងរឹតតែបន្ថែមទម្ងន់ដល់ការងារនីមួយៗ ក្នុងការជ្រោងកិត្យានុភាពជាតិកាន់តែខ្ពស់មួយកម្រិតទៀត។ យើងគួរគប្បីរក្សា និងចែករំលែកស្មារតីនេះបន្តដល់ យុវជន យុវនារី មន្ត្រីរាជការ និងសិស្សមន្ត្រីដែលកំពុង និងត្រូវទទួលបានការបណ្តុះបណ្តាលជាបន្តបន្ទាប់គ្រប់ជំនាន់”៕