កងការពារព្រំដែនលេខ ៦០១ យោធភូមិភាគពិសេស ប្រារព្ធពិធីបើកវគ្គហ្វឹកហ្វឺនបំប៉នជំនាញការពារព្រំដែន
ភ្នំពេញ៖ នៅថ្ងៃទី១៥ ខែឧសភា ឆ្នាំ២០២៤ ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរង យោធភូមិភាគពិសេស តំណាងដ៏ខ្ពង់ខ្ពស់ ឯកឧត្ដម ឧត្ដមសេនីយ៍ឯក ពូ សាប៊ុតឌី មេបញ្ជាការរង កងទ័ពជើងគោក មេបញ្ជាការយោធភូមិភាគពិសេស បានអញ្ជើញជាអធិបតីក្នុងពិធីបើកវគ្គហ្វឹកហ្វឺនបំប៉នជំនាញការពារព្រំដែន របស់កងការពារព្រំដែនលេខ ៦០១ ។
វគ្គហ្វឹកហ្វឺននេះ មានសិក្ខាកាមចូលរួមរៀនសូត្រចំនួន ៥០នាក់ គ្រូ ៥នាក់ រយះពេល ៩១ថ្ងៃ ដែលសិក្សាលើមុខវិជ្ជា ដូចជា ៖ ជំនាញព្រំដែន យុទ្ធវិធី ឋានលេខា អប់រំចិត្តសាស្ត្រ និងលំហាត់របៀប ។
របាយការណ៍ស្វាគមន៍ក្នុងពិធីនេះ លោកវរសេនីយ៍ឯក លន់ លុច មេបញ្ជាការ កងការពារព្រំដែនលេខ ៦០១ បានថ្លែងអំណរគុណយ៉ាងជ្រាលជ្រៅចំពោះ ឯកឧត្ដម មេបញ្ជាការរង យោធភូមិភាគពិសេស ដែលបានចំណាយពេលដ៏មានតម្លៃផ្ដល់កិត្តិយស អញ្ជើញជាអធិបតីក្នុងពិធីបើកវគ្គហ្វឹកហ្វឺនរបស់កងការពារព្រំដែនលេខ ៦០១ នាឱកាសនេះ។
លោកមេបញ្ជាការ កងការពារព្រំដែនលេខ ៦០១ ក៏បានរាយការណ៍អំពីលទ្ធផលសម្រេចបានកន្លងមកជូន ឯកឧត្ដម អធិបតី និងធ្វើបានធ្វើការណែនាំការងាររៀនសូត្រមួយចំនួនដល់សិក្ខាកាមទាំងអស់ផងដែរ ។
អញ្ជើញសំណេះសំណាល និងផ្ដាំផ្ញើនាឱកាសនេះ ឯកឧត្ដម ឧត្ដមសេនីយ៍ទោ ម៉ៅ សាភឿន មេបញ្ជាការរង យោធភូមិភាគពិសេស បានថ្លែងកោតសរសើរចំពោះ អង្គភាពកងការពារព្រំដែនលេខ ៦០១ ដែលបានខិតខំយកចិត្តទុកដាក់បំពេញភារកិច្ចទាំងការងារស្នូល និងការកសាងជំរុំជម្រករបស់អង្គភាព ព្រមទាំងបំពេញការងារភារកិច្ចដែលថ្នាក់លើប្រគល់ជូន សម្រេចបានលទ្ធផលល្អប្រសើរជាបន្តបន្ទាប់ ។
ទន្ទឹមនឹងនេះដែរ ឯកឧត្ដម មេបញ្ជាការរង យោធភូមិភាគពិសេស បានផ្ដាំផ្ញើដល់សិក្ខាកាមទាំងអស់ ត្រូវគោរពវិន័យកងទ័ព គោរពបទបញ្ជា យកចិត្តទុកដាក់ខិតខំរៀនសូត្រគ្រប់មុខវិជ្ជា ដែលគ្រូបានឧទ្ទេសនាម ទាំងក្នុងថ្នាក់ និងលើទីលាន ដោយប្រកាន់នូវទិសស្លោក ស៊ូបង្ហូរញើសលើទីលានហ្វឹកហាត់ មិនបង្ហូរឈាមនៅលើសមរភូមិ ពង្រឹងសាមគ្គីភាពរវាងមិត្តរួមអាវុធ ចេះជួយគ្នាទៅវិញទៅមក អប់រំណែនាំគ្នារកអ្វីដែលល្អ ក្នុងការបង្កើនប្រសិទ្ធភាព និងគុណភាពរបស់វគ្គហ្វឹកហ្វឺន ដើម្បីយកចំណេះដឹងទាំងនេះមកបម្រើការងារជូនអង្គភាព និងបានជំរុញឱ្យប្អូនៗសិក្ខាកាមទាំងអស់ ត្រូវមានទស្សនស្មោះត្រង់ ជឿជាក់លើការដឹកនាំរបស់រាជរដ្ឋាភិបាល ពិសេសគាំទ្រយ៉ាងពេញទំហឹងរាល់បទបញ្ជាដ៏ខ្ពង់ខ្ពស់ប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត ដែលជាប្រមុខដឹកនាំដ៏ឈ្លៀសវៃ និងប្រកាសគាំទ្រយ៉ាងពេញទំហឹងចំពោះការអនុវត្តគម្រោង ព្រែកជីកហ្វូណន-តេជោ ដែលជាគំនិតផ្ដួចផ្ដើមរបស់សម្ដេចអគ្គមហាសេនាបតីតេជោ ហ៊ុន សែន ៕
