ប៉េកាំង៖ ប្រទេសចិន និងកូរ៉េខាងត្បូង គួរតែស្វែងរកទំនាក់ទំនងស្ថិរភាព បើទោះបីជាមានការលំបាក នាពេលថ្មីៗនេះ រដ្ឋមន្ត្រីការបរទេសចិន លោក វ៉ាង យី បានប្រាប់សមភាគីកូរ៉េខាងត្បូងកាលពីថ្ងៃចន្ទ នៅក្នុងកិច្ចប្រជុំដ៏កម្រមួយនៅទីក្រុងប៉េកាំង ដែលបានធ្វើឡើងចំពេលមានភាពតានតឹងលើកោះតៃវ៉ាន់ និងប្រទេសដទៃទៀត។
រដ្ឋមន្ត្រីការបរទេសកូរ៉េខាងត្បូង លោក Cho Tae-yul បានឲ្យដឹងថា បណ្តាប្រទេសចាំបាច់ត្រូវរក្សាសន្ទុះលើកិច្ចសហប្រតិបត្តិការ និងគ្រប់គ្រងទំនាក់ទំនងយ៉ាងប្រុងប្រយ័ត្ន។
លោក Cho Tae-yul បានមកដល់ទីក្រុងប៉េកាំងកាលពីថ្ងៃចន្ទ ដែលជាដំណើរទស្សនកិច្ចលើកដំបូងរបស់លោកទៅកាន់ប្រទេសចិនចាប់តាំងពីចូលកាន់តំណែងក្នុងខែមករា និងដំណើរទស្សនកិច្ចលើកដំបូងទៅកាន់ទីក្រុងប៉េកាំងដោយរដ្ឋមន្ត្រីការបរទេសកូរ៉េខាងត្បូងក្នុងរយៈពេលជាងប្រាំមួយឆ្នាំ។
ទំនាក់ទំនងរវាងទីក្រុងប៉េកាំង និងទីក្រុងសេអ៊ូល បានស្ថិតក្រោមភាពតានតឹងថ្មី នៅពេលដែលប្រធានាធិបតីកូរ៉េខាងត្បូង លោក Yoon Suk Yeol បានឲ្យដឹងកាលពីឆ្នាំមុនថា ការគ្រប់គ្រងតាមបែបប្រជាធិបតេយ្យ តៃវ៉ាន់ ដែលចិនអះអាងថា ជាផ្នែកនៃទឹកដីរបស់ខ្លួន គឺជា បញ្ហាសកលមិនមែនគ្រាន់តែជាបញ្ហារវាងចិន និងតៃវ៉ាន់នោះទេ។
លោកប្រធានាធិបតី Yoon Suk Yeol បានបន្ថែមកាលពីឆ្នាំមុនថា ភាពតានតឹងកើនឡើងនៅជុំវិញកោះតៃវ៉ាន់គឺដោយសារតែការព្យាយាមផ្លាស់ប្តូរស្ថានភាពដោយបង្ខំ ហើយគាត់បានប្រឆាំងនឹងការផ្លាស់ប្តូរបែបនេះ។ ប្រទេសចិនបានតវ៉ាដោយបញ្ជាក់ថាការអត្ថាធិប្បាយនេះគឺមិនអាចទទួលយកបានទាំងស្រុង។
បញ្ហាតៃវ៉ាន់បានកើតឡើងម្តងទៀតនៅក្នុងខែមីនា នៅពេលដែលកោះនេះចូលរួមក្នុងកិច្ចប្រជុំកំពូលលទ្ធិប្រជាធិបតេយ្យដែលគាំទ្រដោយសហរដ្ឋអាមេរិកនៅទីក្រុងសេអ៊ូល។ ទីក្រុងប៉េកាំងបានចោទប្រកាន់ទីក្រុងសេអ៊ូលនៅពេលផ្តល់វេទិកាមួយសម្រាប់កងកម្លាំងឯករាជ្យតៃវ៉ាន់។
កាលពីថ្ងៃចន្ទ លោក វ៉ាង យី បានប្រាប់លោក Cho Tae-yul ថាទំនាក់ទំនងចិន-កូរ៉េខាងត្បូងបានប្រឈមមុខនឹងការលំបាក និងបញ្ហាប្រឈម ដែលមិនមែនជាផលប្រយោជន៍រួមរបស់ភាគីទាំងពីរ និងមិនមែនជាអ្វីដែលចិនចង់ឃើញ នេះបើយោងតាមសេចក្តីថ្លែងការណ៍របស់ក្រសួងការបរទេសចិន។
