ប.ស.ស. បើកវគ្គបណ្ដុះបណ្ដាលលើកដំបូងលើជំនាញពិធីការជាតិ និងអន្ដរជាតិ ដើម្បីបង្កើនសមត្ថភាពមន្ត្រី និងបុគ្គលិករបស់ខ្លួន
ភ្នំពេញ៖ បេឡាជាតិសន្ដិសុខសង្គម នៃក្រសួងការងារ និងបណ្ដុះបណ្ដាលវិជ្ជាជីវៈ នាព្រឹកថ្ងៃទី៩ ខែឧសភា ឆ្នាំ២០២៤នេះ បានសហការជាមួយវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ រៀបចំវគ្គបណ្ដុះបណ្ដាលជំនាញ ស្ដីពី ពិធីការជាតិ និងអន្ដរជាតិ ជូនដល់មន្រ្តីរាជការក្រោមឱវាទបេឡាជាតិសន្ដិសុខសង្គម រយៈពេល២ថ្ងៃ ចាប់ពីថ្ងៃទី ៩-១០ ខែឧសភា ឆ្នាំ២០២៤ នៅសាលប្រជុំករុណា ស្នាក់ការកណ្ដាល ប.ស.ស. រាជធានីភ្នំពេញ ។
ពិធីបើកវគ្គបណ្ដុះបណ្ដាលនេះ ប្រព្រឹត្តទៅក្រោមអធិបតីភាព ឯកឧត្តម ម៉េង ហុង អគ្គនាយក ប.ស.ស.ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ និងមានការធ្វើបទបង្ហាញដោយគ្រូឧទ្ទេស មកពីវិទ្យាស្ថានជាតិការទូត និងទំនាក់ទំនងអន្តរជាតិ នៃក្រសួងការបរទេស និងសហប្រតិបត្តិការអន្តរជាតិ ដោយមានវត្តមានសិក្ខាកាមចូលរួមសរុបប្រមាណ ១០០នាក់។
មានប្រសាសន៍ក្នុងពិធីបើកវគ្គបណ្ដុះបណ្ដាល ឯកឧត្តមអគ្គនាយក ប.ស.ស.ស្ដីទី បានថ្លែងឡើងថា ការអភិវឌ្ឍន៍ធនធាន មន្រ្តីរាជការ និងបុគ្គលិក នៅក្នុងបេឡាជាតិសន្ដិសុខសង្គម ជាទស្សនវិស័យអាទិភាពចាំបាច់ និងមានសារៈសំខាន់បំផុត ជាក់ស្ដែងក្នុងវគ្គបណ្ដុះបណ្ដាលនេះ គឺជាវគ្គបណ្ដុះបណ្ដាលលើកទី៤៥ហើយ ដែល ប.ស.ស. រៀបចំឡើង ហើយវគ្គបណ្ដុះបណ្ដាលនាឱកាសនេះ ក៏បណ្ដុះបណ្ដាលលើកដំបូងដែលផ្តោតសំខាន់អំពីរបៀបរបបនៃការរៀបចំព្រឹត្តិការណ៍ផ្លូវការនានា ការរៀបចំទស្សនកិច្ចផ្លូវការ ការរៀបចំកិច្ចប្រជុំ សន្និសីទ សិក្ខាសាលា ពិធីចុះហត្ថលេខា និងកម្មវិធីនានា ជាពិសេសការបង្ហាញគន្លឹះពាក់ព័ន្ធ និងរបៀបរៀបចំខ្លួន និងឥរិយាបថ តាមរយៈការស្លៀកពាក់ កាយវិការ ក្នុងកម្មវិធីផ្លូវការផ្សេងៗទៀត។
វគ្គបណ្ដុះបណ្ដាលនាឱកាសនេះ ជាគំនិតផ្ដួចផ្ដើមដោយផ្ទាល់របស់ ឯកឧត្តមអគ្គនាយក ប.ស.ស.ស្ដីទី ដើម្បីធានាការងារពិធីការ និងការងារផ្សេងៗទៀត ត្រូវបានអនុវត្តតាមស្ដង់ដារួមមួយ និងអនុលោមទៅតាមប្រពៃណី ឬក្រឹត្យក្រមដែលត្រូវបានទទួលស្គាល់ជាលក្ខណៈជាតិ និងអន្ដរជាតិ។
ឯកឧត្តមអគ្គនាយក ប.ស.ស. ស្ដទី សង្ឃឹមយ៉ាងមុតមាំថា សិក្ខាកាមទាំងអស់ដែលមកពីនាយកដ្ឋាននីមួយៗ នឹងខិតខំសិក្សារៀនសូត្រ នូវចំណុចខ្វះខាតរបស់ខ្លួន និងត្រូវបំពេញបន្ថែមប្រកបដោយការយកចិត្តទុកឱ្យបានខ្ពស់ ដើម្បីក្រេបចំណេះដឹងសម្រាប់យកមកអនុវត្តក្នុងអង្គភាពរបស់ខ្លួនឱ្យកាន់តែមានប្រសិទ្ធភាព៕
