ក្រសួងបរិស្ថាន បើកសិក្ខាសាលាថ្នាក់តំបន់ស្តីពី “ការចែករំលែកចំណេះដឹងការរចនាអគារបៃតងនៅកម្ពុជា”
ភ្នំពេញ៖ នៅព្រឹកថ្ងៃទី៧ ខែឧសភា ឆ្នាំ២០២៤ ឯកឧត្តម ជួប ប៉ារីស៍ រដ្ឋលេខាធិការក្រសួងបរិស្ថាន បានអញ្ជើញជាអធិបតីបើកសិក្ខាសាលាថ្នាក់តំបន់ ស្តីពី “ការចែករំលែកចំណេះដឹងការរចនាអគារបៃតងនៅកម្ពុជា” និងមានការអញ្ជើញចូលរួមពីឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ថ្នាក់ដឹកនាំក្រសួងបរិស្ថាន លោកស្រី គណៈប្រតិភូនៃប្រទេសមេគង្គ និងសាធារណរដ្ឋកូរ៉េ ព្រមទាំងលោកស្រីតំណាងក្រសួងស្ថាប័នពាក់ព័ន្ធ វិស័យឯកជន ឧស្សាហកម្មសំណង់ ក្រុមហ៊ុនស្ថាបត្យករ ក្រុមហ៊ុនសំណង់ ដៃគូអភិវឌ្ឍន៍ ក្រុមការងារបច្ចេកទេស និងសាកលវិទ្យាល័យនៅកម្ពុជា ជាច្រើនរូបទៀត នៅសណ្ឋាគារ Hyatt Regency Phnom Penh រាជធានីភ្នំពេញ។
ថ្លែងទៅកាន់អង្គសិក្ខាសាលា ឯកឧត្តម ជួប ប៉ារីស៍ បានលើកឡើងថា ការរួមបញ្ចូលគោលគំនិតអគារបៃតងទៅក្នុងវិស័យសំណង់របស់កម្ពុជា តាមរយៈការលើកកម្ពស់ការយល់ដឹងជាសាធារណៈ នឹងគាំទ្រដល់ប្រទេសកម្ពុជាក្នុងការពន្លឿនការសម្រេចបាននូវគោលដៅ នៃការអភិវឌ្ឍន៍ដែលបំភាយឧស្ម័នទាប និងលើកកម្ពស់ប្រសិទ្ធភាពធនធានតាមរយៈការផ្លាស់ប្តូរអាកប្បកិរិយាក្នុងការកាត់បន្ថយការប្រើប្រាស់ទឹក និងថាមពលនៅក្នុងអគារ។ គោលគំនិតអគារបៃតង ដែលផ្ដោតលើការប្រើប្រាស់ធនធានប្រកបដោយប្រសិទ្ធភាព រួមមាន៖ ថាមពល ទឹក ការប្រើប្រាស់ដី សម្ភារសំណង់ ការគ្រប់គ្រងសំណល់ និងការចូលរួមកាត់បន្ថយការបំភាយឧស្ម័នផ្ទះកញ្ចក់ ការបំពុលបរិយាកាសក្នុងអគារ ផលប៉ះពាល់លើសហគមន៍ក្នុងពេលសាងសង់ ពេលប្រើប្រាស់អគារ។
ឯកឧត្តមរដ្ឋលេខាធិការបានគូសបញ្ជាក់ទៀតថា ក្រសួងបរិស្ថាន បាននិងកំពុងអនុវត្តជាជំហានៗនូវយុទ្ធសាស្រ្តចក្រាវិស័យបរិស្ថាន ក្នុងការលើកកម្ពស់កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកប ដោយចីរភាព គឺភាពស្អាត ភាពបៃតង និងចីរភាព។ តាមរយៈការដាក់បញ្ចូលគោលគំនិតអគារបៃតងទៅក្នុងវិស័យសំណង់កម្ពុជា នឹងគាំទ្រដល់ការពន្លឿនការសម្រេចបាននូវគោលដៅ នៃការអភិវឌ្ឍន៍បៃតង។
គួរបញ្ជាក់ថា សិក្ខាសាលាថ្នាក់តំបន់ ស្តីពី “ការចែករំលែកចំណេះដឹងការរចនាអគារបៃតងនៅកម្ពុជា” ធ្វើឡើងក្នុងគោលបំណងចម្បងមួយចំនួនរួមមាន៖ ១)ចែករំលែកចំណេះដឹង និងបទពិសោធន៍នៃការរៀបចំប្រព័ន្ធអគារបៃតងថ្នាក់ជាតិ ជាមួយប្រទេសជាសមាជិកក្នុងតំបន់ទន្លេមេគង្គ និងសាធារណរដ្ឋកូរ៉េ ២)ចែករំលែកផែនទីបង្ហាញផ្លូវ និងផែនការងារ ព្រមទាំងពិគ្រោះយោបល់និងទទួលធាតុចូលកែលម្អបន្ថែមសម្រាប់ការអនុវត្តជំហានបន្ទាប់ ៣)ផ្តួចផ្តើមការផ្លាស់ប្តូរចំណេះដឹងពាក់ព័ន្ធការអនុវត្តអគារបៃតង និងបទដ្ឋានគតិយុត្តិជាមួយប្រទេសមួយចំនួនក្នុងតំបន់ទន្លេមេគង្គ និង៤)កសាងបណ្តាញ និងស្វែងរកកិច្ចសហប្រតិបត្តិការនាពេលអនាគតក្នុងតំបន់ ដើម្បីជំរុញការអនុវត្តអគារបៃតង ដើម្បីបរិស្ថានសំណង់ប្រកបដោយនិរន្តរភាព និងអគារដែលបញ្ចេញកាបូនតិច៕
