សម្ដេចធិបតី ខិតខំលើកទឹកចិត្ត ឲ្យក្រុមហ៊ុនវិនិយោគនានាចូលមកកម្ពុជា ខណៈរាជរដ្ឋាភិបាល ផ្ដល់ការអនុគ្រោះជាច្រើនតាមច្បាប់វិនិយោគថ្មី
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងបញ្ជាក់ថា សម្ដេចខិតខំលើកទឹកចិត្ត ឱ្យក្រុមហ៊ុនវិនិយោគនានាចូលមកកម្ពុជា ខណៈរាជរដ្ឋាភិបាលបានផ្ដល់ការអនុគ្រោះជាច្រើនតាមច្បាប់វិនិយោគថ្មី ។
ក្នុងឱកាសអញ្ជើញ សម្ពោធ រោងចក្រដំឡើងរថយន្តរបស់ក្រុមហ៊ុនតូយ៉ូតា នៅព្រឹកថ្ងៃទី២ ខែឧសភា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត បានមានប្រសាសន៍ថា និមិត្តរូបក្រុមហ៊ុនតូយ៉ូតាចូលមកកម្ពុជាតាំងពីទសវត្ស៩០ បានចាប់ផ្ដើមផ្ដល់សេវានៅឆ្នាំ៩៣ គឺ៣១ឆ្នាំគត់ ចាប់ផ្ដើមពីក្រុមហ៊ុនដោយគ្រាន់តែផ្ដល់សេវាជួសជុល ដោយសារកាលនោះមានឡានអ៊ុនតាក់ច្រើនជាតូយ៉ូតា ឈានទៅដល់ការបង្កើតរោងចក្រ បង្គុំ និងផលិតនៅទីនេះ នេះហើយជានិមិត្តរូបដែលកម្ពុជាចង់បាន ។
សម្តេចធិបតីថ្លែងថា «ខ្ញុំថា ខំទាក់ម៉ូយ មកថ្មីជាកិច្ចការសំខាន់ ហើយអ្វីដែលសំខាន់គឺធ្វើឱ្យអ្នកសម្រេចចិត្តមកហើយមានភាពជោគជ័យមានភាពកក់ក្ដៅ នៅជាមួយកម្ពុជាយូរ និងសម្រេចចិត្តបង្កើតនិងការវិនិយោគនិងដំឡើងការវិនិយោគដោយសារការទុកចិត្តមកលើកម្ពុជា នេះជានិមិត្តរូបដែលសំខាន់ ហើយខ្ញុំសូមអរគុណ ចំពោះក្រុមហ៊ុនតូយ៉ូតា ដែលបានសម្រេចចិត្ត»។
សូមជម្រាបជូនថា ក្រុមហ៊ុន តូយ៉ូតា ស៊ុយស៊ូ មេនូហ្វេកឈឺរីង បានទទួលវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជាបង្កើតរោងចក្រផ្តុំ និងដំឡើងរថយន្តតូយ៉ូតា ដែលមានទីតាំងក្នុងតំបន់សេដ្ឋកិច្ច ពិសេស រ៉ូយ៉ាល់ គ្រុប ភ្នំពេញ លើផ្ទៃដីសរុប ៤២,៩៧១ម៉ែត្រការ៉េ។ រោងចក្រនេះមានសមត្ថភាពដំឡើងរថយន្តចំនួន ២ប្រភេទ ទី១៖ ជាប្រភេទ SUV ម៉ាក FORTUNER និងទី២៖ ជាប្រភេទ Pick-UP ម៉ាក HILUX ដែលមានទុនវិនិយោគចំនួន ៣៦,៧៨១,០០០ដុល្លារអាម៉េរិក និងមានបុគ្គលិកសរុបចំនួន ១៥០នាក់ ហើយមានសមត្ថភាពដំឡើងរថយន្តចំនួន ១,៣២០គ្រឿងសម្រាប់ផ្គត់ផ្គង់តម្រូវការទីផ្សារ (Market demand) ឆ្នាំ២០២៤ ក្នុងនោះរថយន្ត FORTUNER ចំនួន ២៩០គ្រឿង និងរថយន្ត HILUX ចំនួន ១,០៣០គ្រឿង។
ក្រៅពីរោងចក្ររបស់ក្រុមហ៊ុនតូយ៉ូតា បច្ចុប្បន្នកម្ពុជាមានរោងចក្រផ្គុំ និងដំឡើងរថយន្ត សរុបចំនួន៥រួចមកហើយរួមមាន៖
ទី១៖ រោងចក្ររបស់ក្រុមហ៊ុន DAEHAN AUTO (CAMBODIA) CO., LTD. ចាប់ផ្តើមប្រតិបត្តិការឆ្នាំ២០២២, នៅខេត្តស្វាយរៀង, ផលិតរថយន្ត SAMYUNG។
ទី២៖ រោងចក្ររបស់ក្រុមហ៊ុន RMA AUTOMOTIVE (CAMBODIA) CO LTD. ចាប់ផ្តើមឆ្នាំ២០២២, នៅខេត្តពោធិ៍សាត់, ផលិតរថយន្ត FORD។
ទី៣៖ រោងចក្ររបស់ក្រុមហ៊ុន CAMKO MOTOR CO., LTD. ចាប់ផ្តើមឆ្នាំ២០២២, នៅខេត្តកោះកុង, ផលិតរថយន្ត HYUNDAI។
ទី៤៖ រោងចក្ររបស់ក្រុមហ៊ុន HGB MOTORS ASSEMBLY CO., LTD. ចាប់ផ្តើមឆ្នាំ២០២៣, នៅខេត្តបន្ទាយមានជ័យ, ផលិតរថយន្ត KIA។
និងទី៥៖ រោងចក្ររបស់ក្រុមហ៊ុន GTV MOTOR CO., LTD. នៅខេត្តកណ្តាល, និងកំពុងដំណើរការសាកល្បង៕
