ឯកឧត្តម ឆាយ ឫទ្ធិសែន ចុះតាមខ្នងផ្ទះពិនិត្យស្ថានភាពកង្វះខាតទឹក និងពិនិត្យរកប្រភពផ្គត់ផ្គង់ទឹកសម្រាប់បរិភោគនិងប្រើប្រាស់ប្រចាំថ្ងៃរបស់ប្រជាពលរដ្ឋរស់នៅស្រុកចំនួន៣ ក្នុងខេត្តតាកែវ

ភ្នំពេញ៖ នាព្រឹកថ្ងៃទី២៧ ខែមេសា ឆ្នាំ២០២៤ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និងថ្នាក់ដឹកនាំក្រសួង ព្រមទាំងមន្ដ្រីជំនាញនៃនាយកដ្ឋានផ្គត់ផ្គង់ទឹកជនបទ និងនាយកដ្ឋានថែទាំសុខភាពជនបទ នៃក្រសួងអភិវឌ្ឍន៍ជនបទ បានចុះតាមខ្នងផ្ទះ ដើម្បីពិនិត្យស្ថានភាពកង្វះខាតទឹក និងពិនិត្យរកប្រភពផ្គត់ផ្គង់ទឹកសម្រាប់បរិភោគនិងប្រើប្រាស់ប្រចាំថ្ងៃរបស់ប្រជាពលរដ្ឋរស់នៅក្នុងស្រុកសំរោង ស្រុកទ្រាំង និងស្រុកគីរីវង្ស ខេត្តតាកែវ ដោយមានការអញ្ជើញចូលរួមពីសំណាក់ លោក ស៊ុត ខុន អភិបាលរងនៃគណៈអភិបាលខេត្តតាកែវ អភិបាលស្រុកទាំងបីផងដែរ ។

ក្នុងដំណើរចុះត្រួតពិនិត្យនេះ ឯកឧត្ដមរដ្ឋមន្ត្រី បានដឹកនាំប្រតិភូចុះពិនិត្យទីតាំងផ្ដល់ប្រភពទឹកជាក់ស្ដែងរួមមាន ពិនិត្យបឹងបត់រការ នៅភូមិព្រៃស្នួល, ស្រះទឹកល្បាំង នៅភូមិដក់ពរ ឃុំរវៀង, ស្រះទឹកត្រពាំងស្រង់ នៅភូមិត្រពាំងស្រង់ ឃុំស្លារ ស្រុកសំរោង, ស្រះសហគមន៍នៅវត្តបារ៉ាយវិហារពីរ នៅភូមិព្រៃស្លឹក ឃុំព្រៃស្លឹក, ស្រះទឹកសហគមន៍នៅភូមិពញាឮ ឃុំប្រាំបីមុំ, ស្រុកទ្រាំង និងបានចុះពិនិត្យ អាងទឹកទន្លាប់ នៅភូមិកំពង់ ឃុំព្រះបាទជាន់ជុំ ស្រុកគីរីវង្ស។

ក្នុងពេលជួបជាមួយប្រជាជនដែលខ្វះទឹកផឹក និងប្រើប្រាស់ប្រចាំថ្ងៃនៅភូមិនៀល ឃុំព្រៃស្លឹក ស្រុកទ្រាំង ខេត្តតាកែវ ឯកឧត្ដមរដ្ឋមន្ត្រី បានសំណេះសំណាល និងចែកពីដុងទឹក និងដឹកទឹក ជូនប្រជាពលរដ្ឋចំនួន ១៤៤គ្រួសារ ដោយក្នុងមួយគ្រួសារទទួលបានពីដុងទឹកចំណុះ ៣០លីត្រ ចំនួន ១ និងក្រមា១ ផងដែរ។

ក្នុងឱកាសនោះ ឯកឧត្ដម ឆាយ ប្ញទ្ធិសែន បានពាំនាំនូវប្រសាសន៍ផ្ដាំផ្ញើសួរសុខទុក្ខប្រកបដោយមនោសញ្ចេតនាស្រលាញ់យ៉ាងជ្រាលជ្រៅ និងពរសព្ទសាធុការពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ជូនចំពោះប្រជាពលរដ្ឋនៅទីនោះ ។

ឯកឧត្តម ឆាយ ឫទ្ធិសែន មានប្រសាសន៍ថា ការចុះពិនិត្យស្ថានភាពជាក់ស្ដែង នៃប្រភពផ្គត់ផ្គង់ទឹកសម្រាប់ប្រើប្រាស់នាពេលនេះ គឺដើម្បីឆ្លើយតបនឹងសភាពការណ៍បច្ចុប្បន្នដែលពិភពលោកកំពុងជួបប្រទះវិបត្តិនៃការប្រែប្រួលអាកាសធាតុ ជាក់ស្ដែងនៅក្នុងប្រទេសកម្ពុជាយើងធាតុអាកាសនៅរដូវប្រាំងឆ្នាំនេះមានការកើនកម្តៅ ដែលជាការព្រួយបារម្ភ ចំពោះប្រជាពលរដ្ឋរស់នៅជនបទប្រឈមនឹងការខ្វះខាតទឹកសម្រាប់បរិភោគ និងប្រើប្រាស់។

សូមបញ្ជាក់ផងដែរថា យោងតាមអនុសាសន៍ដ៏ខ្ពង់ខ្ពស់របស់សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្រសួងអភិវឌ្ឍន៍ជនបទបានរួមចំណែកយកចិត្តទុកដាក់ខ្ពស់បំផុតចំពោះការខ្វះខាតទឹកប្រើប្រាស់របស់ប្រជាជនទូទាំងប្រទេស ។ អាស្រ័យហេតុនេះក្រសួងក៏បានចេញសេចក្ដីណែនាំដល់ថ្នាក់ដឹកនាំ និងអង្គភាពក្រោមឱវាទក្រសួងទាំងអស់ចាត់វិធានការ និងកិច្ចអន្តរាគមន៍បន្ទាន់លើការខ្វះខាតទឹកប្រើប្រាស់ និងទឹកបរិភោគ ដោយសារកត្តាប្រែប្រួលធាតុអាកាស ដោយតម្រូវឱ្យ គ្រប់អង្គភាព មន្ទីរអភិវឌ្ឍន៍ជនបទខេត្តបានចុះធ្វើសកម្មភាពលើប្រភពផ្គត់ផ្គង់ទឹកតាមរយៈវិធានការស្ដាស្រះ ជួសជុល និងខួងអណ្ដូងធ្វើយ៉ាងណាឱ្យប្រជាពលរដ្ឋមានទឹកប្រើប្រាស់ និងទឹកសម្រាប់បរិភោគគ្រប់គ្រាន់៕