ស្នងការនគរបាលខេត្តកំពង់ធំ ថ្លែងអំណរគុណ ដល់កងកម្លាំងគ្រប់លំដាប់ថ្នាក់ទូទាំងខេត្ត សម្រាប់កិច្ចប្រតិបត្តិការ រក្សាសន្តិសុខ សណ្តាប់ធ្នាប់ សាធារណៈ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ

ភ្នំពេញ៖ នារសៀលថ្ងៃទី២៣  ខែមេសា ឆ្នាំ២០២៤ លោកឧត្តមសេនីយ៍ទោ ម៉ែន លី ស្នងការនគរបាលខេត្តកំពង់ធំ បានអញ្ជើញដឹកនាំកិច្ចប្រជុំប្រចាំខែមេសា និងផ្សព្វផ្សាយសភាពការណ៍ថ្មីៗ ដល់កងកម្លាំងនគរបាលជាតិ នៃស្នងការដ្ឋាននគរបាលខេត្ត។

យោងតាមរបាយការណ៍ អានដោយលោកវរសេនីយ៍ឯក ហួត សារ៉ាវុធ នាយការិយាល័យសរុបផែនការ គិតពីថ្ងៃទី១៥ ខែមីនា ឆ្នាំ២០២៤ ដល់ថ្ងៃទី១៥ ខែមេសា ឆ្នាំ២០២៤ បានឲ្យដឹងថា៖
១.សភាពការណ៍ សន្ដិសុខ មានភាពស្ងប់ស្ងាត់ ធម្មតា មិនមានអ្វីកើតឡើង គួរឱ្យកត់សម្គាល់ឡើង។
២.សភាពការណ៍ បទល្មើសព្រហ្មទណ្ឌ កើតមានឡើង ០១លើក លើ ០២លើក ថយចុះ ០១លើក ស្មើនឹង ៥០%។
៣.សភាពការណ៍ សណ្ដាប់ ធ្នាប់សាធារណៈ និងគ្រោះថ្នាក់ផ្សេងៗ កើតឡើង មានចំនួន ១៧លើក លើ ០៩លើក កើនឡើង ០៨លើក ស្មើ ៨៨,៨៨%។

លោកឧត្តមសេនីយ៍ត្រី ខេន ឈុនគ័រ ស្នងការរង ផ្សព្វផ្សាយផែនការ ការពារ រក្សាសន្តិសុខ សណ្តាប់ធ្នាប់ សាធារណៈ និងសុវត្ថិភាពសង្គម ជូនថ្នាក់ដឹកនាំ ជាន់ខ្ពស់ នៃព្រះរាជាណាចក្រកម្ពុជា (ចាប់ពីថ្ងៃទី២៨ ដល់ថ្ងៃទី៣០ ខែមេសា ឆ្នាំ២០២៤)។

លោកឧត្តមសេនីយ៍ទោ ម៉ែន លី ស្នងការនគរបាលខេត្ត បានឯកភាព វាយតម្លៃខ្ពស់ ចំពោះលទ្ធផលការងារ ដែលបងប្អូនកងមន្ត្រីនគរបាលជាតិ សម្រេចបានជោគជ័យគួរជាទីមោទនៈ និងថ្លែងអំណរគុណ ដល់កងកម្លាំងគ្រប់លំដាប់ថ្នាក់ទូទាំងខេត្ត សម្រាប់កិច្ចប្រតិបត្តិការ រក្សាសន្តិសុខ សណ្តាប់ធ្នាប់ សាធារណៈ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង ឆស័ក ពុទ្ធសករាជ ២៥៦៨ នាពេលកន្លងមក ធានាបានសុវត្ថិភាពល្អ ប្រសើរបំផុត ជូនសង្គមជាតិ ស្របតាមគោលនយោបាយភូមិ ឃុំ សង្កាត់ មានសុវត្ថិភាព។

បន្ថែមលើប្រសាសន៍សំណេះសំណាល លោកឧត្តមសេនីយ៍ទោ ស្នងការ ផ្សព្វផ្សាយសភាពការណ៍ ថ្មីៗ ដល់កងកម្លាំងនិងក្រើនរំលឹកលើការងារ៖ ១.ពង្រឹងការគ្រប់គ្រង ប្រមូលផ្តុំកងកម្លាំង តាមបែបបទការងាររដ្ឋបាល អនុវត្តតួនាទី ភារកិច្ច ជាប្រចាំថ្ងៃ, ២.ពង្រឹង របៀបរបបកិច្ចប្រជុំ, ៣.ការងារអត្តសញ្ញាណកម្ម, ៤.ពង្រឹងការគ្រប់គ្រងមុខសញ្ញាក្មេងទំនើង និងគ្រឿងញៀន និង៥.ប្រើប្រាស់វិធានការជំនាញ បញ្ចេញកម្លាំង ល្បាតចំហ ប្រចាំការ នៅតាមគោលដៅងាយរងគ្រោះ សំដៅបង្ការ ទប់ស្កាត់ បង្ក្រាបបទល្មើសគ្រប់ប្រភេទ បានទាន់ពេលវេលា មានប្រសិទ្ធភាពខ្ពស់ ថែមទាំងត្រៀមកិច្ចអន្តរាគមន៍ សង្គ្រោះ ដល់ប្រជាពលរដ្ឋ នាគ្រាជួបប្រទះការលំបាក ក្នុងហេតុការណ៍ ណាមួយដែលអាចកើតមានឡើងជាចៃដន្យ ៕