បរទេស៖ នាយករដ្ឋមន្ត្រីកាតា និងរដ្ឋមន្ត្រីការបរទេស លោក Sheikh Mohammed bin Abdulrahman bin Jassim Al Thani បានឲ្យដឹងកាលពីថ្ងៃពុធថាស្ថានភាពនៅក្នុងតំបន់គឺ មានភាពរសើបខ្លាំង។
នាយករដ្ឋមន្ត្រីបានធ្វើការកត់សម្គាល់នេះក្នុងការសន្ទនាជាមួយនាយករដ្ឋមន្ត្រីរ៉ូម៉ានី លោក Marcel Ciolacu។
យោងតាមសេចក្តីថ្លែងការណ៍ដែលចេញផ្សាយដោយក្រសួងការបរទេសកាតា ភាគីទាំងពីរបានផ្លាស់ប្តូរទស្សនៈស្តីពីទំនាក់ទំនងទ្វេភាគី និងការវិវត្តចុងក្រោយបង្អស់នៅមជ្ឈិមបូព៌ា ដោយសង្កត់ធ្ងន់ជាពិសេសលើការបន្ធូរបន្ថយ និងលើកកម្ពស់សន្តិភាព ជាពិសេសនៅតំបន់ហ្គាហ្សាស្ទ្រីបដែលហែកហួរដោយសង្រ្គាម។
សេចក្តីថ្លែងការណ៍បានដកស្រង់សម្តីនាយករដ្ឋមន្ត្រីកាតាថា តំបន់កំពុងឆ្លងកាត់លក្ខខណ្ឌដ៏រសើប ហើយបានឃើញការកើនឡើងនៅក្នុងវិធីផ្សេងៗគ្នាក្នុងរយៈពេលប៉ុន្មានថ្ងៃថ្មីៗនេះ។
លោកក៏បានអំពាវនាវដល់សហគមន៍អន្តរជាតិឱ្យទទួលខុសត្រូវចំពោះការបញ្ឈប់ជម្លោះនៅតំបន់ហ្គាហ្សា និងបានសង្កត់ធ្ងន់លើសារៈសំខាន់នៃការបដិសេធពីការប្រើប្រាស់ជំនួយមនុស្សធម៌ជាឧបករណ៍សម្រាប់ឥទ្ធិពលនយោបាយ។
