រូបសំណាកសេះសមុទ្រកម្ពុជាល្បីខ្លាំងដល់សិង្ហបុរី យកទៅចុះផ្សាយធៀបគ្នានឹងរូបសំណាកត្រីក្បាលតោរបស់ខ្លួន

ភ្នំពេញ៖ រូបសំណាកសេះសមុទ្ររបស់កម្ពុជា មិនត្រឹមតែកំពុងផ្ទុះការចាប់អារម្មណ៍ខ្លាំងនៅក្នុងស្រុកនោះទេ ប៉ុន្តែវាកំពុងទាក់ទាញការចាប់អារម្មណ៍មកពីក្រៅប្រទេសផងដែរ រហូតដល់កាលពីប៉ុន្មានថ្ងៃមុននេះ សារព័ត៌មានសិង្ហបុរីបានយកទៅចុះផ្សាយ ប្រដូចទៅនឹងទឹករូបត្រីក្បាលតោបាញ់ទឹកនៅប្រទេសខ្លួន ដែលគេហៅថា «Merlion» (មើឡាយអិន)។

«រូបសំណាកសេះសមុទ្ទរបស់ប្រទេសកម្ពុជា ប្រដូចទៅនឹងទឹក Merlion របស់ Singapore ដូចគ្នា ប៉ុន្តែខុសគ្នា» នេះជាអ្វីដែលសារព័ត៌មានសិង្ហបុរី Mothership (https://mothership.sg/2024/04/singapot-cambodias-seahorse-merlion/) បានយកមកចុះផ្សាយ ដោយដាក់ជាចំណងជើងធំៗ។ សារព័ត៌មានដដែល បានបន្តចុះផ្សាយថា កន្លែងទាក់ទាញទេសចរណ៍ចុងក្រោយបង្អស់របស់ប្រទេសកម្ពុជា (រូបសេះសមុទ្ទបាញ់ទឹក) បានធ្វើឱ្យមានការភ្ញាក់ផ្អើលក្នុងចំណោមប្រជាជនសិង្ហបុរី និងអ្នកទេសចរដែលធ្លាប់​បានទៅលេងប្រទេសកោះមួយនេះ ដោយសារតែវាមានរូបរាងស្រដៀងទៅនឹង Merlion ដ៏ល្បីល្បាញ ជារូបសំណាកសម្គាល់របស់ប្រទេស។

រូបចម្លាក់សេះសមុទ្ទក្នុងខេត្តកំពត ត្រូវបានសម្ពោធជាផ្លូវការនៅថ្ងៃទី១០ ខែមេសា ឆ្នាំ២០២៤ ហើយបានបង្ហាញនូវភាពអស្ចារ្យប្រហាក់ប្រហែលនឹង Merlion របស់ប្រទេសសិង្ហបុរី។ ពលរដ្ឋ និងអ្នកលេងបណ្តាញសង្គមបានបង្ហាញការភ្ញាក់ផ្អើលខ្លះក្នុងន័យសាទរ និងខ្លះទៀតក្នុងន័យចំអន់លេង ដោយប្រៀបធៀបទៅនឹងរូបសំណាកតោខ្លួនត្រីបាញ់ទឹកនៅសិង្ហបុរី និងដែលបានដាក់ឈ្មោះក្រៅផ្លូវការឱ្យខេត្តកំពតថា«សិង្កាពត-Singapot» ស្រដៀងនឹងប្រទេស សិង្ហបុរីដែលភាសាអង់គ្លេសហៅថា ស៊ីងហ្គាពួរ។

សារព័ត៌មានសិង្ហបុរី Mothership ចុះផ្សាយទៀតថា ទាំងសេះសមុទ្ទកម្ពុជា និង Merlion មានកម្ពស់ប្រហែល៨ម៉ែត្រដូចគ្នា ដោយវាមាន​លក្ខណៈ​ពិសេសរួមមួយ ដោយមានការបាញ់​បង្ហូរ​ទឹក​ចូលទៅក្នុងសមុទ្ទ តាមមាត់របស់វា។ មិនខុសគ្នាពីអ្នកដែលទៅលេង Merlion នៅសិង្ហបុរីនោះទេ អ្នកទេសចរដែលមកលេងសេះសមុទ្ទនៅកំពត ក៏ចូលចិត្តធ្វើត្រាប់តាមរូបសំណាក ដោយឈរចំហមាត់បាញ់ទឹកចូលសមុទ្រ ឬមួយយក​មាត់ធ្វើជាត្រងទឹកដែលបាញ់ចេញពីរូបសំណាកពីចម្ងាយ។ ចំណុចរួមរបស់រូបសំណាកទាំងពីរមិនមែនមានតែប៉ុននេះទេ ពោលគឺចំណុចរួមសំខាន់បំផុតរបស់វា គឺសាងសង់ឡើងដើម្បីបន្ថែមសន្ទុះដល់វិស័យទេសចរណ៍។

សេះសមុទ្ទត្រូវបានគេរាយការណ៍ថា តំណាងឱ្យ «ទ្រព្យសម្បត្តិនៃជីវចម្រុះ» នៅក្នុងទឹកដីនៃខេត្តកំពត។ សេះសមុទ្ទតំណាងឱ្យភាពអត់ធ្មត់ និងសុភមង្គល លើកទឹកចិត្តអ្នកស្រុក និងអ្នកទេសចរឱ្យរីករាយជាមួយបរិស្ថានដ៏ស្ងប់ស្ងាត់។ ខេត្តកំពតមានចម្ងាយប្រហែល១៦០គីឡូម៉ែត្រពីរាជធានីភ្នំពេញ និងចំណាយពេលប្រមាណ៣ម៉ោងសម្រាប់ការធ្វើដំណើរដោយរថយន្ត និងអាចឈានដល់៤ទៅ៥ម៉ោង សម្រាប់ការធ្វើដំណើរដោយខ្សែរថភ្លើង៕