ក្នុងរយៈពេល ៣ទសវត្សរ៍មកនេះ អូស្ត្រាលី ផ្តល់ជំនួយអភិវឌ្ឍន៍ផ្លូវការដល់ដល់កម្ពុជាជាង ១ពាន់លានដុល្លារ
ភ្នំពេញ៖ រដ្ឋាភិបាលអូស្ត្រាលី បានផ្តល់ជំនួយអភិវឌ្ឍន៍ផ្លូវការដល់កម្ពុជាដែលមានទឹកប្រាក់ជាង១ពាន់លានដុល្លារអាម៉េរិក ក្នុងរយៈពេលបីទសវត្សរ៍ដែលគាំទ្រដល់វិស័យអាទិភាពដូចជា៖ ប្រព័ន្ធអប់រំ ពាណិជ្ជកម្ម កសិកម្ម សុខាភិបាល ហេដ្ឋារចនាសម្ព័ន្ធ យេនឌ័រ អភិបាលកិច្ច ការប្រែប្រួលអាកាសធាតុ និងការបោសសម្អាតមីន។
យោងតាមកិច្ចពិគ្រោះយោបល់ថ្នាក់ឧត្តមមន្ត្រី លើកទី៤ ដែលបានប្រព្រឹត្តឡើងដោយសហប្រធានដឹកនាំ គឺឯកឧត្ដម ប្រាក់ ងួនហុង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិកម្ពុជា និងលោកស្រី មីឆេល ចាន់ អនុរដ្ឋលេខាធិការក្រសួងការបរទេស និងពាណិជ្ជកម្មអូស្ត្រាលី នៅរាជធានីភ្នំពេញ កាលពីថ្ងៃទី៤ ខែមេសា ឆ្នាំ២០២៤។ ក្នុងកិច្ចពិគ្រោះយោបល់ ភាគីទាំងពីរបានពិនិត្យ និងតាមដានវឌ្ឍនភាពនៃកិច្ចសហប្រតិបត្តិការលើវិស័យសំខាន់ៗ រួមមាន៖ ការផ្លាស់ប្ដូរទស្សនកិច្ចជាន់ខ្ពស់ ការប្រាស្រ័យទាក់ទងរវាងប្រជាជន និងប្រជាជន សន្តិសុខ ការពារជាតិ ពាណិជ្ជកម្ម វិនិយោគ ទេសចរណ៍ កសិកម្ម វប្បធម៌ អប់រំ កិច្ចសហប្រតិបត្តិការអភិវឌ្ឍន៍ និងភាពជាដៃគូមេគង្គ-អូស្ត្រាលី។ ភាគីទាំងពីរ បានសម្ដែងនូវការពេញចិត្តចំពោះទំនាក់ទំនងយូរអង្វែង ចាប់តាំងពីការបង្កើតទំនាក់ទំនងការទូតក្នុងឆ្នាំ១៩៥២ និងបានឯកភាពជំរុញកិច្ចសហប្រតិបត្តិការឱ្យមានភាពរីកចម្រើនថែមទៀត។ ចំពោះកិច្ចសហប្រតិបត្តិការវិស័យសន្តិសុខ និងការពារជាតិ ភាគីទាំងពីរ ក៏បានឯកភាពគ្នាបន្តជំរុញកិច្ចសហប្រតិបត្តិការក្នុងការប្រយុទ្ធប្រឆាំងការជួញដូរមនុស្ស ការលាងលុយកខ្វក់ ឧក្រិដ្ឋកម្មតាមប្រព័ន្ធអ៊ីនធឺណេត ឧក្រិដ្ឋកម្មឆ្លងដែន និងភេរវកម្ម។ ភាគីទាំងពីរ ក៏បានសង្កត់ធ្ងន់អំពីសារសំខាន់នៃទស្សនកិច្ចរបស់នាវាកងទ័ពជើងទឹកអូស្ត្រាលីមកកាន់កម្ពុជា។
ភាគីទាំងពីរ អបអរសាទរចំពោះការកើនឡើងនៃទំហំពាណិជ្ជកម្មទ្វេភាគីក្នុងរយៈពេលប៉ុន្មានឆ្នាំចុងក្រោយនេះ និងបានឯកភាពគ្នាពង្រឹងកិច្ចសហប្រតិបត្តិការពាណិជ្ជកម្ម និងវិនិយោគ។ បន្ថែមលើនេះ ភាគីទាំងពីរ ក៏មានសុទិដ្ឋិនិយមថា ការដាក់ចេញនូវយុទ្ធសាស្ត្រសេដ្ឋកិច្ចអាស៊ីអាគ្នេយ៍ឆ្ពោះទៅឆ្នាំ២០៤០ របស់អូស្ត្រាលី ការបង្កើតការិយាល័យពាណិជ្ជកម្ម និងវិនិយោគ ប្រចាំស្ថានទូតអូស្ត្រាលីនៅកម្ពុជា និងកិច្ចព្រមព្រៀងសេវាកម្មដឹកជញ្ជូនតាមផ្លូវអាកាសនាពេលថ្មីៗនេះ នឹងជួយជំរុញកំណើន ពាណិជ្ជកម្ម វិនិយោគ ទេសចរណ៍ និងចំណងទាក់ទងរវាងប្រជាជននិងប្រជាជន។ ក្នុងវិស័យកសិកម្ម កម្ពុជាបានអរគុណចំពោះការគាំទ្ររបស់អូស្ត្រាលី រួមមាន៖ កម្មវិធីខ្សែចង្វាក់តម្លៃកសិកម្មកម្ពុជា ការផលិតពូជស្រូវចំប៉ី «ស» ៧០ និងភាពជាដៃគូកម្ពុជា-អូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ ដែលបានដើរតួនាទីយ៉ាងសំខាន់ក្នុងការបង្កើនផលិតភាពកសិកម្ម។ ក្នុងវិស័យវប្បធម៌ កម្ពុជាបានថ្លែងអំណរគុណអូស្ត្រាលីដែលបានផ្តល់ជំនួយដល់ការស្តារ និងការអភិរក្ស បេតិកភណ្ឌវប្បធម៌កម្ពុជា រួមទាំងការប្រគល់មកកម្ពុជាវិញនូវវត្ថុបុរាណចំនួនបី។
ជាមួយគ្នានេះ ភាគីកម្ពុជាក៏បានថ្លែងអំណរគុណរដ្ឋាភិបាលអូស្ត្រាលីចំពោះការគាំទ្រ និងការផ្ដល់ជំនួយដ៏ថ្លៃថ្លាក្នុងការអភិវឌ្ឍធនធានមនុស្សកម្ពុជា ស្ទើរគ្រប់វិស័យ ជាពិសេសការផ្ដល់អាហារូបករណ៍ Australia Awards ដល់យុវជន និងមន្ត្រីកម្ពុជាឱ្យទៅបន្តការសិក្សាថ្នាក់ឧត្តមសិក្សានៅប្រទេសអូស្ត្រាលី ចាប់តាំងពីឆ្នាំ១៩៩៤។ ជាការឆ្លើយតបទៅនឹងសំណើរបស់កម្ពុជា ភាគីអូស្ត្រាលីបានប្រកាសបង្កើនចំនួនអាហារូបករណ៍នេះ ដល់កម្ពុជាពី៤៥ ទៅ៥០កន្លែងក្នុងមួយឆ្នាំ។ ភាគីអូស្ត្រាលី ក៏បានគូសបញ្ជាក់ពីបំណងចង់ឱ្យមានភាពជាដៃគូទំនើប និងចាស់ទុំ ដើម្បីឆ្លើយតបនឹងបញ្ហាប្រឈមនាពេលបច្ចុប្បន្ន និងគូសបញ្ជាក់ពីការរៀបចំសេចក្តីព្រាងផែនការភាពជាដៃគូអភិវឌ្ឍន៍សម្រាប់កម្ពុជាឆ្នាំ២០២៤-២០២៨។ ផែនការនេះ ស្របតាមគោលនយោបាយអភិវឌ្ឍន៍អន្តរជាតិថ្មីរបស់អូស្ត្រាលី និងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា។
ចំពោះភាពជាដៃគូមេគង្គ-អូស្ត្រាលី ភាគីកម្ពុជាកោតសរសើរយ៉ាងជ្រាលជ្រៅចំពោះជំនួយរបស់អូស្ត្រាលី ក្នុងវិស័យនានាដូចជា ការអភិវឌ្ឍធនធានមនុស្ស ការលើកកម្ពស់សិទ្ធិស្ត្រី ការគ្រប់គ្រង ទឹកស្អាតនិងថាមពល ទំនើបកម្មកសិកម្ម សេដ្ឋកិច្ចបៃតង និងសេដ្ឋកិច្ចឌីជីថល ពីការបណ្តុះបណ្តាល និងការកសាងសមត្ថភាពមន្ត្រីការទូតកម្ពុជា តាមរយៈកិច្ចសហប្រតិបត្តិយ៉ាងជិតស្និទ្ធរវាងវិទ្យាស្ថានជាតិការទូត និងទំនាក់ទំនងអន្តរជាតិ និងស្ថានទូតអូស្ត្រាលីប្រចាំកម្ពុជា។ ភាគីអូស្ត្រាលី ក៏បានគូសបញ្ជាក់ពីសារសំខាន់នៃការគាំទ្រភាពធន់ និងវិបុលភាពក្នុងអនុតំបន់មេគង្គ តាមរយៈមូលនិធិ២២២,៥លានដុល្លារអូស្ត្រាលី ក្រោមក្របខ័ណ្ឌភាពជាដៃគូនេះ សម្រាប់រយៈពេល៥ឆ្នាំបន្ទាប់ទៀតផងដែរ៕
