ប្រជាការពារមកពី៦ឃុំ មកហ្វឹកហាត់នៅអធិការដ្ឋាននគរបាលស្រុកភ្នំស្រុក ដើម្បីចូលរួមកាពារសន្តិសុខ សុវត្ថិភាព ជូនប្រជាពលរដ្ឋក្នុងឱកាសបុណ្យចូលឆ្នាំ

ភ្នំពេញ៖ ក្នុងឱកាសបុណ្យចូលឆ្នាំជិតឈានមកដល់គ្រប់អធិការដ្ឋាននគរបាលស្រុក ក្រុង ត្រូវមកហ្វឹកហាត់រៀនសូត្រដើម្បីចូលរួមកាពារសន្តិសុខ សុវត្ថិភាព ជូនប្រជាពលរដ្ឋក្នុងឱកាសបុណ្យចូលឆ្នាំនេះ ។ ជាក់ស្តែងនៅអធិការដ្ឋាននគរបាលស្រុកភ្នំស្រុក នៅថ្ងៃទី០៩ ខែមេសា ឆ្នាំ២០២៤នេះ បាន ប្រមូលកម្លាំងប្រជាការពារមកពី៦ឃុំក្នុងស្រុកចំនួន៨៥នាក់ ធ្វើការហ្វឹកហ្វាត់ពីលំហាត់របៀបនិងផ្សព្វផ្សាយពីភារកិច្ច របៀបរបបធ្វើសកម្មភាពនិងសិទ្ធរបស់ប្រជាការពារ ។

លោកវរសេនីយ៍សេនីយ៍ឯក ប៉ិក  គឹមហ៊ាក អធិការនគរបាលស្រុកភ្នំស្រុក បានឲ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ សិទ្ធិ  ឡោះ ស្នងការនគរបាលខេត្តបន្ទាយមានជ័យ អធិការដ្ឋាននគរបាលស្រុក បានប្រមូលកម្លាំងប្រជាការពារទាំង៦ឃុំ មកហ្វឹកហាត់ពីលំហាត់របៀបនិងផ្សព្វផ្សាយពីភារកិច្ច របៀបរបបធ្វើសកម្មភាពនិងសិទ្ធរបស់ប្រជាការពារ ដើម្បីឲ្យកម្លាំងប្រជាការពារជាកម្លាំងដ៏រឹងមាំសំដៅធានាសន្តិសុខ សណ្តាប់ធ្នាប់ សាធារណៈក្នុងមូលដ្ឋានរបស់ខ្លួន រក្សាបានសន្តិសុខ និងការពារទ្រព្យសម្បត្តិផ្ទាល់ខ្លួននិងក្រុមគ្រួសាររបស់ខ្លួន ជាពិសេសការអភិវឌ្ឍសេដ្ឋកិច្ចគ្រួសារនីមួយៗនិងចូលរួមការអភិវឌ្ឍសេដ្ឋកិច្ចជាតិ។

លោកអធិការបានបញ្ជាក់ថា ភារកិច្ចរបៀបរបបធ្វើសកម្មភាពនិងសិទ្ធរបស់ប្រជាការពារ គឺ ប្រជាការពារមានភារកិច្ចចូលរួមជាមួយកម្លាំងនគរបាលឬកងរាជអាវុធហត្ថឬអាជ្ញាធរដែនដី ក្នុងការយាមល្បាតការពារសន្តិសុខភូមិ ឃុំ សង្កាត់ ការពារកន្លែងកំសាន្តសប្បាយ ពិធីបុណ្យទានឬការរៀបចំសណ្តាប់ធ្នាប់ទីសាធារណៈណាមួយតាមការចាត់តាំងរបស់អាជ្ញាធរមានសមត្ថកិច្ចនៅមូលដ្ឋាននោះ។ ប្រជាការពារមានភារកិច្ចជួយក្រើនរំលឹក ដាស់តឿនប្រជាពលរដ្ឋក្នុងមូលដ្ឋានឲ្យចេះប្រុងប្រយ័ត្នការពារទ្រព្យសម្បត្តិ ផ្ទះសំបែង សត្វពា  ហនៈរំលឹកដាស់តឿនរាល់ការឆ្វេសប្រហែសនានា ដែលជាអំណោយផលងាយស្រួលដល់ការប្រព្រឹត្តល្មើសនិងជយយអប់រំយុវជន យុវនារីក្នុងមូលដ្ឋានឲ្យអនុវត្តល្អ ជៀសវាងនូវរាល់អំពើអបាយមុខផ្សេងៗ ព្រមជាមួយនោះក៏មានភារកិច្ចរាយការណ៍ពីមុខសញ្ញាឬបាតុភាពសង្ស័យទាក់ទិនដល់សន្តិសុខ សណ្តាប់ធ្នាប់ជូននគរបាល ដើម្បីចាត់វិធានការការពារសុវត្ថិភាពភូមិ ឃុំ សង្កាត់មានប្រសិទ្ធិភាព។

ប្រជាការពារមានសិទ្ធឃាត់ចាប់ខ្លួនជនប្រព្រឹត្តបទល្មើសជាក់ស្តែងនានាដើម្បីប្រគល្យនគរបាលឬកងរាជអាវុធហត្ថឬអាជ្ញាធរមានសមត្ថកិច្ចផ្សេងទៀតដើម្បីចាត់ការតាមនិតិវិធី។ជាមួយគ្នានោះប្រជាការពារពុំមានសិទ្ធិទទួលបាននូវារបំ  ពាក់អាវុធនោះឡើយ។

នាឱកាសនោះលោកវរសេនីយ៍ឯក ប៉ិក គឹមហ៊ាក បានផ្តាំផ្ញើដល់កម្លាំងប្រជាការពារទាំងអស់ ឲ្យចូលរួមឲ្យសកម្មបំផុតជាកម្លាំងនគរបាលប៉ុស្តិ៍ក្នុងការការពារសន្តិសុខ សណ្តាប់ធ្នាប់ សុវត្ថិភាព ជូនថ្នាក់ដឹកនាំ គ្រប់លំដាប់ថ្នាក់និងប្រជាពលរដ្ឋមកលេងសំសាន្តសប្បាយតាមទីវត្តអារាម រម្មណីយដ្ឋាននានាក្នុងមូលដ្ឋានក្នុងឱកាសបុណ្យចូលឆ្នាំខាងមុខនេះ ដើម្បីធានាបានសន្តិសុខ សណ្តាប់ធ្នាប់ល្អ និងការពារសន្តិសុខ សណ្តាប់ធ្នាប់ សុវត្ថិភាពមូលដ្ឋានរបស់ខ្លួនដើម្បិភូមិ ឃុំ សង្កាត់ មានសុវត្ថិភាព។

នាឱកាសនោះ លោកអធិការក៏បានប្រគល់សារុង០១នាក់១ ដែលជាអំណោយរបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បន្ទាយមានជ័យ ដល់ប្រជាការពារមកហ្វឹលហាត់នោះផងដែរ៕