និយ័តករសន្តិសុខសង្គម ជូនដំណឹង ស្តីពីការដាក់ឱ្យដំណើរការជាផ្លូវការនូវគេហទំព័រ និងទំព័រហ្វេសប៊ុករបស់និយ័តករសន្តិសុខសង្គម

ភ្នំពេញ៖ និយ័តករសន្តិសុខសង្គម (ន.ស.ស.) មានកិត្តិយសសូមជម្រាបជូន ក្រសួង-ស្ថាប័ន, ដៃគូអភិវឌ្ឍន៍ ពាក់ព័ន្ធ, គ្រឹះស្ថានឯកជន, និងសាធារណជន ឱ្យបានជ្រាបថា៖ ន.ស.ស. ដាក់ឱ្យដំណើរការជាផ្លូវការ នូវគេហទំព័រ និងទំព័រហ្វេសប៊ុក (Facebook Page) ដែលមានអាសយដ្ឋាន និងឈ្មោះដូចខាងក្រោម៖

ចាប់ពីថ្ងៃជូនដំណឹងនេះតទៅ៖
-គេហទំព័រ៖ https://www.ssr.gov.kh
-ទំព័រហ្វេសប៊ុក៖ និយ័តករសន្តិសុខសង្គម – Social Security Regulator

គេហទំព័រផ្លូវការនេះបង្ហាញជូននូវមាតិកា ឬមុខងារសំខាន់ៗ រួមមាន៖ (១) អំពី ន.ស.ស. (២) ច្បាប់ និងបទប្បញ្ញត្តិ (៣) មតិត្រលប់ និងពាក្យបណ្ដឹង (៤) ការបោះពុម្ពផ្សាយ និង (៥) ព័ត៌មាន ពាក់ព័ន្ធនឹងសកម្មភាពសំខាន់ៗរបស់ ន.ស.ស.។ ដោយឡែកទំព័រហ្វេសប៊ុកផ្លូវការរបស់ ន. ស. ស. ដើរតួនាទីជាថ្នាលមួយសម្រាប់ផ្សព្វផ្សាយព័ត៌មាន ឬព្រឹត្តិការណ៍សំខាន់ៗពាក់ព័ន្ធនឹងប្រតិបត្តិការប្រចាំថ្ងៃ របស់ស្ថាប័ន។

គេហទំព័រ និងទំព័រហ្វេសប៊ុកខាងលើជាប្រភពព័ត៌មានផ្លូវការរបស់ ន.ស.ស. ដែលមានតួនាទី និងភារកិច្ចគ្រប់គ្រង និងត្រួតពិនិត្យកិច្ចដំណើរការនៃការអនុវត្តរបបសន្តិសុខសង្គមនានា ដោយស្ថាប័ន ប្រតិបត្តិករសន្តិសុខសង្គម ដើម្បីធានានូវប្រសិទ្ធភាព, ភាពត្រឹមត្រូវ, និងតម្លាភាព។

សេចក្តីដូចបានជម្រាបជូនខាងលើ សូម ក្រសួង-ស្ថាប័ន, ដៃគូអភិវឌ្ឍន៍ពាក់ព័ន្ធ, គ្រឹះស្ថានឯកជន, និងសាធារណជនជ្រាបជាព័ត៌មាន ៕