ប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង ស្នើឲ្យរួមគ្នាទប់ស្កាត់ និងបង្រ្កាបការកាប់ទន្រ្ទានដីរដ្ឋខុសច្បាប់
ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្ត និងប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង បានថ្លែងអាជ្ញាធរពាក់ព័ន្ធទាំងអស់ រួមគ្នាក្នុងការទប់ស្កាត់ និងបង្រ្កាបការកាប់ទន្រ្ទានដីរដ្ឋខុសច្បាប់ ។
ក្នុងឱកាសអញ្ជើញដឹកនាំកិច្ចប្រជុំគណៈបញ្ជាការឯកភាពរដ្ឋបាល ខេត្តស្ទឹងត្រែង នាថ្ងៃទី២០ មីនានេះ ឯកឧត្ដម ស្វាយ សំអ៊ាង បានមានប្រសាសន៍ថា កាលពីថ្ងៃទី២៣ ខែកុម្ភៈ កន្លងទៅនេះ ឯកឧត្តមក៏ធ្លាប់បានលើជាសំណួរដែរថា តើយើងត្រូវប្រើប្រាស់កម្លាំងយ៉ាងមិចដើម្បីទៅបង្រ្កាបការកាប់ទន្ទ្រានដីនឹងបាន។ ក្នុងន័យនេះឯកឧត្តម ក៏បានជំរុញទៅដល់កម្លាំងដើម្បីសហការមានទាំងអាវុធហត្ថ មានទាំងនគរបាល ឬកម្លាំងប៉ុស្តិ៍រដ្ឋបាលរបស់យើងអាចជាកម្លាំងប្រមូលផ្ដុំ ជាមួយជំនាញរបស់យើងអាចទៅធ្វើការបង្រ្កាបទប់ស្កាត់បាន នូវក្នុងកម្រិត២០០នាក់ ទៅ៣០០នាក់។
ជាមួយគ្នានេះ ឯកឧត្តមអភិបាលខេត្ត បានបញ្ជាក់ថា បើដាក់កម្លាំងប៉ុណ្ណឹងហើយនូវតែធ្វើមិនបានទៀត យើងត្រូវតែអន្តរាគមន៍បន្ទាន់ ចៀសវាងកុំឲ្យគេថាយើងអត់ទាន់ធ្វើផង យើងស្នើទៅលើ។
ឯកឧត្តមអភិបាលខេត្ត បានគូសបញ្ជាក់ថា បើយើងស្នើទៅលើប្រាកដជាចាត់កម្លាំងមកហើយ ព្រោះឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងប្រធានគណៈកម្មការថ្នាក់ជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ក៏លោកបញ្ជាក់ជាមួយគណៈបញ្ជាការឯកភាពខេត្ត ច្បាស់លាស់ថា ក្នុងករណីខេត្តអន្តរាគមន៍បែបមិច គឺលោកនឹងអន្តរាគមន៍ភ្លាម ទោះជាប្រើប្រាស់រូបភាពអ្វីក៏ដោយ។
ឯកឧត្ដម ស្វាយ សំអ៊ាង ថ្លែងថា «សូមឲ្យលើកផែនការ ហើយប្រើប្រាស់កម្លាំងរបស់យើងសិនមាននគរបាល, អាវុធហត្ថ និងប៉ុស្តិ៍រដ្ឋបាល ហើយមានទាំងកម្លាំងខេត្ត និងកម្លាំងគណៈបញ្ជាការឯកភាពស្រុក ដើម្បីរួមគ្នាក្នុងការបង្រ្កាបទប់ស្កាត់ការកាប់ទន្រ្ទានដីរដ្ឋខុសច្បាប់» ។
ឯកឧត្តមអភិបាលខេត្ត ក៏ស្នើឲ្យអាជ្ញាធរ ដែលនៅក្នុងសមត្ថកិច្ចនីមួយៗដែលមានបទល្មើស ត្រូវស្នើឲ្យរដ្ឋអំណាចដែលមានអភិបាលស្រុក គឺជូនដំណឹងឲ្យបានទៅដល់ក្រុមអាណាធិបតេយ្យដែលបានទន្រ្ទានដីរដ្ឋខុសច្បាប់ទាំងនោះឲ្យបានដឹងថាបងប្អូនមកកាន់កាប់នេះខុស ហើយត្រូវបញ្ឈប់សកម្មភាព និងត្រូវចាកចេញ ក្នុងករណីថា បើបងប្អូនមិនអនុវត្តនូវតែបន្តសកម្មភាពយើងនឹងចាត់វិធានការទៅតាមច្បាប់ ៕
