ឯកឧត្តម ស្វាយ សំអ៊ាង៖ កិច្ចការទំនាស់បញ្ហាដីធ្លីមួយចំនួន យើងដោះស្រាយក្រៅប្រព័ន្ធតុលាការ មានភាពងាយស្រួល

ភ្នំពេញ៖ ឯកឧត្តម ស្វាយ សំអ៊ាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តស្ទឹងត្រែង បានលើកឡើងថា កិច្ចការទំនាស់បញ្ហាដីធ្លីមួយចំនួន យើងដោះស្រាយក្រៅប្រព័ន្ធតុលាការមានភាពងាយស្រួល ក្នុងន័យសម្របសម្រួល ។

ថ្លែងក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តស្ទឹងត្រែង នាថ្ងៃទី២០ ខែមីនានេះ ឯកឧត្ដម ស្វាយ សំអ៊ាង បានមានប្រសាសន៍ថា រាជរដ្ឋាភិបាលអាណត្តិទី៧ ដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានរៀបចំនូវយន្តការ ដែលហៅថា គណកម្មការដោះស្រាយក្រៅប្រព័ន្ធតុលាការ ដើម្បីជំរុញកិច្ចការងារនេះ ឲ្យបានធំជាងមុនថែមទៀត ។

ឯកឧត្តមអភិបាលខេត្ត បានបន្តថា កន្លងមកក្នុងនាមអាជ្ញាធរ និងជំនាញ យើងតែងតែថា ការសម្របសម្រួលក្រៅប្រព័ន្ធតុលាការ កុំទាន់អាលរុញ ប៉ុន្តែឯកឧត្តមថា ករណីខ្លះប្រសិនបើយើងមិនរុញទៅតាមផ្លូវតុលាការទេគឺជាការលំបាក ហើយធ្វើឲ្យបញ្ហានឹងកាន់កើនឡើង។

ឯកឧត្តមយល់ថា ករណីដែលមិនអាចសម្របសម្រួលបានក្នុងកម្រិតសមត្ថកិច្ច និងអាជ្ញាធរ ត្រូវតែអនុវត្តទៅតាមផ្លូវច្បាប់ដោយកសាងសំណុំរឿងបញ្ជូនទៅតុលាការ ដើម្បីដោះស្រាយតាមផ្លូវច្បាប់ នេះពាក់ព័ន្ធទៅនឹងដីដែលមាន ប័ណ្ណកម្មសិទ្ធិច្បាស់លាស់ក្នុងការកាន់កាប់។ ដោយឡែកដីអាណាធិបតេយ្យក៏ដោយ បើក្នុងករណីថា សម្របសម្រួលមិនទទួលលទ្ធផល យើងក៏ត្រូវអនុវត្តតាមផ្លូវច្បាប់ដែរ ។

ជាមួយគ្នានោះឯកឧត្តមអភិបាលខេត្ត បានស្នើដល់គណៈបញ្ជាការឯកភាពនៃរដ្ឋបាលក្រុង ស្រុក ត្រូវធ្វើការណែនាំទៅដល់កងកម្លាំងទាំងបី ឲ្យសហការអនុវត្តរាល់សកម្មភាព បាតុភាព ដែលបង្កឡើងដោយក្រុមអាណាធិបតេយ្យ ឲ្យបានម៉ឺងម៉ាត់ ៕