ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានវាយតម្លៃខ្ពស់ចំពោះការរៀបចំ“ បុណ្យទន្លេ លើកទី ៨ នៅខេត្តសៀមរាបក្រោមប្រធានបទ “ ទន្លេដើម្បីសន្តិភាព និងការអភិវឌ្ឍ។
ក្នុងឱកាសអញ្ជើញជាអធិបតីពិធីបើកជាផ្លូវការ ពិធីបុណ្យទន្លេ នាថ្ងៃសៅរ៍ ទី១៦ មីនា ២០២៤នេះ សម្តេចធិបតី នាយករដ្ឋមន្ត្រី បានថ្លែងថា រាជរដ្ឋាភិបាលបានខិតខំជំរុញការអភិវឌ្ឍឱ្យបានគ្រប់ទីកន្លែង ដើម្បីឱ្យប្រជាពលរដ្ឋទទួលបានផលប្រយោជន៍ដូចៗគ្នា ដោយជំរុញវិស័យទេសចរណ៍ដើម្បីពង្រឹងសេដ្ឋកិច្ចនិងបង្កើតឱកាសការងារបង្កើនប្រាក់ចំណូលជូនប្រជាពលរដ្ឋ។
សូមជម្រាបជូនថា បុណ្យទន្លេឆ្នាំ២០២៤នេះ នៅខេត្តសៀមរាប ក្រោមប្រធានបទ “ទន្លេដើម្បីសន្តិភាព និងការអភិវឌ្ឍ” រំពឹងថា នឹងទទួលបានភ្ញៀវទេសចរសរុបមិនក្រោម ៥០ម៉ឺននាក់។
ការរៀបចំពិធីបុណ្យទន្លេ លើកទី៨ឆ្នាំ២០២៤នេះមានសកម្មភាពសំខាន់ៗដូចជា៖ ការសម្តែងសិល្បៈ ការប្រគំតន្ត្រី និងការបាញ់កាំជ្រួចអបអរសាទ មហោស្រពម្ហូបអាហារមេគង្គ និងមេគង្គបូក១ ការតាំងពិព័រណ៍សមិទ្ធផល និងគម្រោងអភិវឌ្ឍន៍ទេសចរណ៍ខេត្តសៀមរាប ការតាំងពិព័រណ៍ផលិតផលទេសចរណ៍ និងផលិតផលទូទៅរបស់ខ្មែរ ការតាំងពិព័រណ៍រូបភាពសត្វស្លាប និងគូរគំនូរ យុទ្ធនាការសំអាតបរិស្ថានតាមក្រុង ស្រុកជាប់ទន្លេក្នុងខេត្តសៀមរាប សិក្ខាសាលា ពង្រឹងគុណភាពផលិតផលនិងសេវាកម្មក្នុងឧស្សាហកម្មទេសចរណ៍ខេត្តសៀមរាប ពិធីលែងកូនត្រី និងជិះទូករាជហង្សមេគង្គ និងមេគង្គបូក១ សកម្មភាពកីឡា, រួមមាន៖ ការជិះកង់កម្សាន្តលក្ខណៈមហាជនជុំវិញបរិវេណអង្គរវត្ត, ការប្រកួត វាយកូនហ្គោល, ការជិះទូកកម្សាន្តលក្ខណៈមហាជន, កីឡាបាញ់ធ្នូមហាជន។
ជាមួយគ្នានេះក៏មានការរៀបចំយុទ្ធនាការសំអាតបរិស្ថានតាមក្រុង ស្រុកជាប់ទន្លេក្នុងខេត្តសៀមរាប និងការប្រឡង ប្រជែងអានអត្ថបទ និងស្មូតកំណាព្យ ក្រោមប្រធានបទ «ទន្លេដើម្បីសន្តិភាព និងការអភិវឌ្ឍ” ពិធីប្រលែងកូនត្រី និងជិះទូករាជហង្សកម្សាន្ត ជាមួយឯកអគ្គរដ្ឋទូតនៃប្រទេសមេគង្គ មេគង្គបូកមួយ និងបវរកញ្ញាពិភពលោក ព្រមទាំងពិធីបណ្តែតកន្ទោងអបអរសាទរពិធីបុណ្យទន្លេជាដើម។
លើសពីនេះទៅទៀត មានទីតាំងសម្រាប់រៀបចំកម្មវិធីនានាក្នុងពិធីបុណ្យទន្លេ តំបន់ A (VIP) សម្រាប់រៀបចំកម្មវិធីបើកជាផ្លូវការពិធីបុណ្យទន្លេ និងឆ្នាំទស្សនាសៀមរាប ២០២៤ ទល់មុខសណ្ឋាគារ GRAND ANGKOR ជាប់ស្ទឹងសៀមរាប។ តំបន់ B សម្រាប់ការតាំងលក់ពិព័រណ៍ផលិតផលខ្មែរទូទៅ និងសកម្មភាពតន្ត្រីកម្សាន្តសប្បាយសម្រាប់មហាជន ចាប់ពីព្រះរាជដំណាក់ដល់ស្ពានវត្តបូព៌។ តំបន់ C សម្រាប់ការតាំងលក់ពិព័រណ៍ទូទៅ និងសកម្មភាពតន្ត្រីកម្សាន្តសប្បាយសម្រាប់មហាជន ចាប់ពីស្ពានវត្តបូព៌រហូតហួស Pub Street។ តំបន់ D សម្រាប់ការតាំងលក់ពិព័រណ៍ទូទៅ និងសកម្មភាពតន្ត្រីកម្សាន្តសប្បាយសម្រាប់មហាជន នៅត្រើយម្ខាងស្ទឹងសៀមរាប។ តំបន់ E សម្រាប់កីឡាបាញ់ធ្នូមហាជន។ នៅលើដងស្ទឹងសៀមរាបសម្រាប់ការជិះទូកកម្សាន្តលក្ខណៈមហាជន។
