ឯកឧត្ដម កៅ កោសល ចូលរួមជាគណៈអធិបតី ក្នុងសិក្ខាសាលាស្ដីពីការលើកកម្ពស់ផលិតផលខ្មែរ នៅខេត្តកំពង់ចាម

ភ្នំពេញ៖ ឯកឧត្ដម កៅ កោសល ប្រតិភូរាជរដ្ឋាភិបាលកម្ពុជាទទួលបន្ទុកជា អគ្គនាយកនៃអគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម និង ឯកឧត្តម គន់ សុភា អភិបាលរងខេត្តកំពង់ចាម នាថ្ងៃសុក្រ ទី១៥ ខែមីនា ឆ្នាំ២០២៤ បានអញ្ជើញចូលរួមជាគណៈអធិបតីក្នុងសិក្ខាសាលាស្តីពី ការលើកកម្ពស់ផលិតផលខ្មែរ ដែលរៀបចំឡើងនៅមន្ទីរពាណិជ្ជកម្មខេត្តកំពង់ចាម។

គោលបំណងនៃសិក្ខាសាលានេះ គឺដើម្បីជួយអភិវឌ្ឍផលិតផលខ្មែរឱ្យមានតម្លៃស្របតាមទីផ្សារ ប្រកបដោយភាពប្រកួតប្រជែងជាមួយនឹងផលិតផលនាំចូល បំផុសឱ្យប្រជាជនខ្មែរចូលរួមប្រើប្រាស់ផលិតផលក្នុងស្រុកឱ្យបានច្រើន បង្កើនផលិតភាព ឱកាសការងារ និងប្រាក់ចំណូល។

សូមបញ្ជាក់ថា ខេត្តកំពង់ចាម មានផលិតផលសក្តានុពលសំខាន់ៗដូចជា ស្រូវ ដំឡូងមី ស្វាយចន្ទី កៅស៊ូ ម្រេច ពោត ស្វាយកែវរមៀត និងចេក។

ក្នុងសិក្ខាសាលានេះ បានអញ្ជើញវាគ្មិនមកពីនាយកដ្ឋានអភិវឌ្ឍន៍ទីផ្សារ នាយកដ្ឋានកម្មសិទ្ធិបញ្ញា នៃក្រសួងពាណិជ្ជកម្ម វិទ្យាស្ថានស្តង់ដារកម្ពុជា នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ តំណាងក្រុមហ៊ុន អ៉ីអន (ខេមបូឌា) ខូអិលធីឌី និងតំណាងសហគ្រាស គ្រាប់ស្វាយចន្ទីចំការលើ ខេត្តកំពង់ចាម ដើម្បីធ្វើបទឧទ្ទេសនាមចែករំលែកបទពិសោធន៍ ចំណេះ ជំនាញជូនដល់សិក្ខាកាម ទៅលើប្រធានបទសំខាន់ៗចំនួន៥ រួមមាន៖ ១- ការអភិវឌ្ឍផលិតផលខ្មែរស្របតាមតម្រូវការទីផ្សារបច្ចុប្បន្ន ២-ការវេចខ្ចប់ផលិតផលខ្មែរឱ្យមានសោភ័ណភាពស្របតាមស្តង់ដារ ៣- ការកសាងម៉ាកយីហោផលិតផលខ្មែរ ៤- បែបបទនៃការបញ្ជូនផលិតផលខ្មែរចូលផ្សារអ៉ីអន និង ៥- ការចែករំលែកបទពិសោធន៍ជាក់ស្តែងអំពីគន្លឹះ នៃការធ្វើអាជីវកម្ម ៕