កាកបាទក្រហមកម្ពុជាខេត្តបន្ទាយមានជ័យ បើកវគ្គផ្សព្វផ្សាយ ស្តីពី ចលនាកាកបាទក្រហម អឌ្ឍចន្ទក្រហម ដល់និស្សិតសាកលវិទ្យាល័យបៀលប្រាយ
ភ្នំពេញ៖ កាកបាទក្រហមកម្ពុជា មានឈ្មោះដើមថា សមាគមជាតិកាកបាទក្រហមខ្មែរត្រូវបានបង្កើតឡើងនៅថ្ងៃទី១៨ ខែកុម្ភៈឆ្នាំ១៩៥៥ និងគោលបំណងដើម្បីផ្តល់ជំនួយសង្គ្រោះនិងធ្វើជាជំនួយការឲ្យអាជ្ញាធរសាធារណៈក្នុងវិស័យមនុស្សធម៌ អាចនិយាយបានថាទីណាមានទុក្ខទីនោះមានកាកបាទក្រហមកម្ពុជា នេះគឺជាការលើកឡើងរបស់លោកស្រីសុខ លាភា ជានាយិការងប្រតិបត្តិសាខាកាកបាទក្រហមខេត្ត ក្នុងពិធីបើកវគ្គផ្សព្វផ្សាយស្ដីពីចលនាកាកបាទក្រហម អឌ្ឍចន្ទក្រហមដល់និស្សិតនៃសាកលវិទ្យាល័យបៀលប្រាយសាខាខេត្តបន្ទាយមានជ័យ នាព្រឹកថ្ងៃទី១៣ ខែមីនា ឆ្នាំ២០២៤។
លោកស្រី មឿត លាភា មន្ត្រីសាខាកាកបាទក្រហមខេត្តនិងលោកស្រីសុខ លាភានាយិការងក្រុមប្រតិបត្តិបានលើកឡើងថា កាកបាទក្រហមកម្ពុជាគឺជាស្ថាប័នមនុស្សធម៌ធំជាងគេក្នុងព្រះរាជាណាចក្រកម្ពុជា ហើយកាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន ជាប្រធានគឺត្រូវប្រកាន់នូវគោលការណ៍គ្រឹះទាំងប្រាំពីររួមមាន៖ ភាពមនុស្សធម៍ ភាពមិនលំអៀង ឯកភាព ឯករាជភាព អព្យាក្រឹតភាព នៃសេវាកម្មស្ម័គ្រចិត្ត។
លោកស្រីបានបន្តថា ក្នុងស្ថានភាពដែលរាជរដ្ឋាភិបាលកម្ពុជាបើកប្រទេសឡើងវិញលើគ្រប់វិស័យ ក្រោយជំងឺកូវីដ១៩ក្នុង ស្មារតីដោះស្រាយការលំបាកលើកកម្ពស់ជីវភាពនិងសុខុមាលភាពរបស់ប្រជាពលរដ្ឋរងគ្រោះកាកក្រហមកម្ពុជាបានបំផុសនូវកម្លាំងមនុស្សធម៍ ជាពិសេសសម្រាប់ជនគ្រប់មជ្ឈដ្ឋានឲ្យចូលរួមជាមួយសមាគមជាតិតាមរយៈយុទ្ធនាការកាកបាទក្រហមដោះស្រាយបញ្ហាប្រឈមនានានឹងបន្តពង្រឹងភាពធន់ក្នុងសហគមន៍។
លោកស្រីបានបញ្ជាក់ថា ពិភពលោកកំពុងស្ថិតនៅក្នុងបរិបត់នៃការផ្លាស់ប្តូរយ៉ាងស្មុគស្មាញប្រឈមប្រទាក់ក្រឡាគ្នាដូចជាបញ្ហាប្រដាប់អាវុធ ការប្រែប្រួលអាកាសធាតុ បានបង្កឲ្យមានលក្ខណៈគ្រោះមហន្តរាយកាន់តែញឹកញាប់ និងធ្ងន់ធ្ងរជាងមុនចំពោះមនុស្សសត្វនិងរុក្ខជាតិជំងឺឆ្លងពិតមែនតែគេអាចគ្រប់គ្រងបានមួយកម្រិតប៉ុន្តែវីរូសបំលែងថ្មីនៃជំងឺផ្សេងៗទៀតកំពុងលេចឡើងជាបន្តបន្ទាប់ ទោះបីជាពិភពលោក ឈមនឹងបញ្ហាជាច្រើនបែបនេះក្ដីក៏ព្រះរាជាណាចក្រកម្ពុជាបន្តស្ថិតនៅក្រោមម្លប់សន្ដិភាពស្ថិរភាពនយោបាយអភិវឌ្ឍន៍លើគ្រប់វិស័យធ្វើឱ្យកាកបាទក្រហមកម្ពុជា នៅតែបំពេញតួនាទីជាជំនួយការឲ្យអាជ្ញាធរសាធារណៈនិងវិស័យមនុស្សធម៌រួមចំណែកជាមួយរាជរដ្ឋាភិបាលបន្តការលើកកម្ពស់គោលការណ៍គ្រឹះនិងតម្លៃមនុស្សធម៌ ជីវភាពរស់នៅរបស់ប្រជាជនកាត់បន្ថយភាពរងគ្រោះនិងជួយប្រជាពលរដ្ឋដោយមិនប្រកាន់ពូជសាសន៍ ពណ៌សំបុរ និន្នាការនយោបាយនោះឡើយ ៕
